ഈ പോലീസുകാരെ ചോദ്യം ചെയ്യാന്‍ ആര്‍ക്കുണ്ട് അധികാരം എന്നാണ് സാധാരണ ചോദിക്കാറുള്ള ചൊല്ല്. എന്നാല്‍ ആ ചോദ്യത്തിന് ഉത്തരം നല്‍കുകയായിരുന്നു യുവ ഐപിഎസ് ഓഫീസറും കൊച്ചി ഡെപ്യൂട്ടി കമ്മിഷണര്‍ ഓഫ് പൊലീസുമായ ഹരിശങ്കര്‍. ഒന്നും രണ്ടും പേരെയല്ല നൂറ്റന്‍പതോളം പോലീസുകാരെയാണ് ഡിസിപി പിടികൂടിയത്.
നിയമം സാധാരണക്കാരായ ജനങ്ങള്‍ മാത്രം പാലിച്ചാല്‍ പോരാ. മറിച്ച് നിയമം നടപ്പിലാക്കുന്ന പോലീസ് ഉദ്യോഗസ്ഥരും നിയമം പാലിക്കണമെന്ന് വാശിയുള്ളയാളാണ് ഹരിശങ്കര്‍. 
ഇന്നലെയാണ് പോലീസുകാര്‍ക്ക് അപ്രതീക്ഷിതമായി എട്ടിന്റെ പണി കിട്ടിയത്. സ്‌റ്റേഷന്‍ ഡ്യൂട്ടിക്കു രാവിലെ എട്ടുമണിക്കു ഹാജരാകണമെന്ന നിര്‍ദേശം പാലിക്കാത്തതിനെത്തുടര്‍ന്ന് കൊച്ചി സിറ്റിയിലെ നൂറ്റന്‍പതോളം പൊലീസുകാര്‍ക്കെതിരെയാണ് ഇന്നലെ നടപടിയെടുത്തത്.

പോലീസുകാരോട് രാവിലെ 7.30ന് തന്നെ സ്‌റ്റേഷനില്‍ ഹാജരാകണമെന്ന് നേരത്തെ ഡിസിപി നിര്‍ദേശിച്ചത് ഏറെ വിവാദമായിരുന്നു. കുടുംബമായി ജീവിക്കുന്ന പോലീസുകാര്‍ക്കും വനിതാ പോലീസുകാര്‍ക്കും ദൂരദേശങ്ങളില്‍ നിന്നെത്തുന്നവര്‍ക്കും ഈ പരിഷ്‌കാരം കനത്ത തിരിച്ചടിയാണെന്നു ചൂണ്ടിക്കാട്ടി പോലീസ് സംഘടന രംഗത്തെത്തിയതോടെ നിലപാട് മയപ്പെടുത്തി സമയം എട്ടുമണിയാക്കാന്‍ ഹരിശങ്കര്‍ നിര്‍ബന്ധിതമായി. 
തുടര്‍ന്ന് ഹരിശങ്കര്‍ നടത്തിയ വയര്‍ലെസ് കോണ്‍ഫറന്‍സിങ്ങിലാണ് എല്ലാ പൊലീസുകാരും കൃത്യം എട്ടുമണിക്കു ഹാജരാകണമെന്ന് നിര്‍ദ്ദേശിച്ചത്. ഇതേത്തുടര്‍ന്നാണ് ഇന്നലെ എട്ടിനു മുഴുവന്‍ പോലീസ് സ്‌റ്റേഷനുകളിലും പരിശോധന നടത്തി ജോലിക്കെത്താത്തവരെ അവധിയിലാക്കാന്‍ ഡി.സി.പി. നിര്‍ദ്ദേശിച്ചത്. അസി. കമ്മിഷണര്‍മാര്‍ക്കായിരുന്നു നിര്‍ദേശം നടപ്പാക്കേണ്ട ചുമതല. ഇതൊക്കെ കുറേ കേട്ടിട്ടുള്ള പോലീസുകാര്‍ അതൊന്നും മൈന്‍ഡ് ചെയ്തില്ല.
അനുസരിക്കാത്ത പോലീസുകാരെ ഒരു പാഠം പഠിപ്പിക്കാന്‍ തന്നെ ഹരിശങ്കര്‍ തീരുമാനിച്ചു. സ്‌റ്റേഷനുകളില്‍ പോലീസുകാര്‍ കൃതൃ സമയത്ത് എത്തുന്നില്ല എന്ന് അറിഞ്ഞതോടെ സ്‌പെഷ്യല്‍ ബ്രാഞ്ച് ഉദ്യോഗസ്ഥരെ അയച്ചു സ്‌റ്റേഷന്‍ ഡയറി പരിശോധിക്കുകയും നൂറ്റി അന്‍പതോളം പോലീസുകാര്‍ എട്ട് മണിക്ക് ഹാജരായിട്ടില്ലെന്ന് കണ്ടെത്തുകയുമായിരുന്നു. ഉടന്‍ തന്നെ നേരത്തേ ഹാജരാകാത്ത പോലീസുകാരുടെ ഹാജര്‍ വെട്ടാന്‍ ഹരിശങ്കര്‍ നിര്‍ദ്ദേശം നല്‍കുകയായിരുന്നു.
അങ്ങനെ ഹരിശങ്കറിന്റെ നിര്‍ദേശം ലംഘിച്ച മുഴുവന്‍ പേരുടെയും ഹാജര്‍ വെട്ടുകയും ചെയ്തു. ജനങ്ങളെ വെള്ളം കുടിപ്പിക്കുന്ന തങ്ങളുടെ മേല്‍ ഒരധികാരം പ്രയോഗിച്ചപ്പോള്‍ പ്രബലരായ പല പോലീസുകാരും ഞെട്ടി. ഈ നടപടിയില്‍ പോലീസുകാര്‍ക്ക് നല്ല അമര്‍ഷവുമുണ്ട്. 
സാധാരണയായി സംസ്ഥാനത്തെമ്പാടുമുള്ള പോലീസ് സ്‌റ്റേഷനുകളില്‍ 9 മണിയോടെയാണ് മുഴുവന്‍ പോലീസുദ്യോഗസ്ഥരും ജോലിക്കു ഹാജരാകുന്നത്. എട്ടിനു ഡ്യൂട്ടിക്ക് ഹാജരാകേണ്ടതുണ്ടെങ്കിലും ജോലിഭാരം കൊണ്ട് നട്ടംതിരിയുന്ന പോലീസുകാര്‍ക്ക് മാനുഷിക പരിഗണനയുടെ പേരിലാണ് ഈ ആനുകൂല്യം സര്‍ക്കാര്‍ അറിവോടെ നല്‍കുന്നത്. കോടതിഡ്യൂട്ടിയും സാധാരണ കേസുകളുടെ അന്വേഷണ ചുമതലയുള്ള പോലീസുകാര്‍ ഇത്തരത്തില്‍ വൈകിയെത്തുന്നത് പോലീസിന്റെ ദൈനംദിന പ്രവര്‍ത്തനത്തെ ബാധിക്കില്ലെന്നതിനാല്‍ ആഭ്യന്തരവകുപ്പ് ഇക്കാര്യത്തില്‍ കടുംപിടുത്തം കാണിക്കാറില്ല. 
എട്ടിനുള്ള ഡിസിപിയുടെ വയര്‍ലെസ് കോണ്‍ഫറന്‍സിങ്ങിനുശേഷം 8.30 മുതല്‍ ഒരു മണിക്കൂര്‍ സ്‌റ്റേഷനുകളില്‍ എസ്എച്ച്ഒയുടെ ബ്രീഫിങ് വേണമെന്നുണ്ടെങ്കിലും അതു നടക്കാറില്ല. ക്രമസമാധാന പാലനം ചിട്ടയുള്ളതാക്കാനാണു കര്‍ശന നിര്‍ദേശം നല്‍കിയതെന്നും ദൂരെനിന്നു ജോലിക്കു വരുന്നവര്‍ക്ക് ഇളവു നല്‍കുമെന്നും ഡിസിപി പറഞ്ഞു. 
അതേസമയം പോലീസുകാര്‍ക്ക് കൂട്ട അവധി അടിച്ചേല്‍പ്പിച്ചതില്‍ സേനാംഗങ്ങള്‍ ഒന്നടങ്കം പ്രതിഷേധത്തിലാണ്. ആഭ്യന്തരമന്ത്രിയുടെ ഇടപെടലിനായി പോലീസുകാര്‍ ശ്രമിക്കുകയാണ്. എന്നാല്‍ വിട്ടുകൊടുക്കില്ലെന്ന ഭാവത്തിലാണ് ഈ യുവ ഐപിഎസ് ഓഫീസര്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha