സൗരോര്‍ജവേലി കെട്ടിയും കിടങ്ങു കീറിയും പണം ഒട്ടേറെ ചെലവഴിച്ചിട്ടും കാട്ടാനശല്യം തടയാനാകാത്തതോടെ കാട്ടാനയെ തടയാന്‍ പുതിയ തന്ത്രമൊരുക്കുന്നു. മലപ്പുറം കരുവാരകുണ്ടിലെ കര്‍ഷകര്‍ ജൈവവേലിയാണ് പരീക്ഷിക്കുന്നത്.

പരിചരണച്ചെലവ് കുറവും എട്ടോ പത്തോ വര്‍ഷത്തിനുശേഷം വിറ്റാല്‍ പണം ലഭിക്കുന്നതുമായ ഔഷധ മരമായ പതിമുഖം കൊണ്ടുള്ള വേലിയാണ് പരീക്ഷിക്കുന്നത്.

പതിമുഖത്തിന്റെ തടിയിലും കൊമ്പുകളിലുമുള്ള മുള്ള് കാട്ടാനകളെയും കാട്ടുപന്നികളെയും കൃഷിയിടത്തില്‍ കടക്കുന്നത് തടയുമെന്നാണ് കര്‍ഷകര്‍ പറയുന്നത്.

പാന്തറ ഇല്ലംപള്ളി ആസാദ് ചെറിയാന്‍ ഇതിനകം 1000 പതിമുഖം നട്ടുപിടിപ്പിച്ചു. 1000 തൈകള്‍കൂടി നട്ടുപിടിപ്പിക്കാനുള്ള തയാറെടുപ്പിലാണ്. നേരത്തേ കരുളായി വനത്തില്‍ ഔഷധ സസ്യങ്ങള്‍ വച്ചുപിടിപ്പിച്ചപ്പോള്‍ പതിമുഖവും നട്ടുവളര്‍ത്തിയിരുന്നു. ഇത് ആനകളെ തടയാന്‍ സഹായകമായിരുന്നു.