തിരുനെല്‍വേലി സ്വദേശിയായ 78 വയസ്സുള്ള കൈലാസ സ്വാമി ലോട്ടറി വില്‍പനയാരംഭിച്ചത് ജീവനോപാധി എന്ന നിലയിലല്ല. ദിവസേന കിലോമീറ്ററുകളോളം നടക്കാമല്ലോ എന്ന ചിന്തയില്‍ ഈ ജോലി തുടങ്ങിയിട്ട് കാല്‍ നൂറ്റാണ്ടു പിന്നിടുന്നു. വര്‍ഷങ്ങള്‍ക്കു മുന്‍പുള്ള ഒരു നിര്‍ഭാഗ്യദിനത്തിന്റെ ഓര്‍മയിലാണ് കൈലാസ സ്വാമി ലോട്ടറി വില്‍പ്പന നടത്തുന്നത്. 15-ാം വയസ്സില്‍ വീടുവിട്ടുപോയെ മകനെ എവിടെയെങ്കിലും കണ്ടെത്താമെന്നുള്ള പ്രതീക്ഷയിലാണ് ദിവസേന കിലോമീറ്ററുകളോളം നടക്കുന്നത്.

ഒരു കൊച്ചു പിണക്കം പോലും ഇല്ലാതിരുന്നിട്ടും മകന്‍ സബ്രഹ്മണ്യം തങ്ങളെ ഉപേക്ഷിച്ചു പോയതെന്തിനെന്ന് ഇപ്പോഴും അറിയില്ല. പാലക്കാട്ട് ഉണ്ടാകുമെന്ന് കരുതി ആദ്യം അവിടെ കുറെ തിരഞ്ഞു. തിരച്ചിലിനു പറ്റിയ തൊഴിലായി ലോട്ടറി വില്‍പനയും തുടങ്ങി.

സംസ്ഥാനത്തിന്റെ പല ഭാഗങ്ങളിലും അലഞ്ഞ ശേഷമാണ് തിരൂരില്‍ എത്തിയത്. ഇപ്പോള്‍ തൃപ്രങ്ങോട് ക്ഷേത്രത്തിന് സമീപം വാടകമുറിയില്‍ താമസിക്കുന്ന സ്വാമി അതിരാവിലെ 5- ന് എഴുന്നേറ്റ് നടപ്പുതുടങ്ങും. അടുത്തെവിടെനിന്നെങ്കിലും ലോട്ടറി വാങ്ങി തിരൂര്‍, തിരുനാവായ, കൊടക്കല്‍, എടക്കുളം. പയ്യനങ്ങാടി എന്നിവിടങ്ങള്‍ പിന്നിട്ട് രാത്രി തിരിച്ചെത്തുമ്പോഴേക്കും കിലോമീറ്ററുകള്‍ നടന്നുകഴിഞ്ഞിരിക്കും.

ഓരോ ദിവസവും പല വഴിക്കാണ് സഞ്ചാരം. എവിടെയെങ്കിലും മകനെക്കണ്ടാലോ. 2003-ല്‍ സ്വാമി പാലക്കാട്ടു വിറ്റ ടിക്കറ്റിന് 20 ലക്ഷത്തിന്റെ സമ്മാനം ലഭിച്ചിരുന്നു.പക്ഷേ, ഈ അച്ഛന്‍ തിരയുന്നത് അത്തരം ബംപറുകളൊന്നുമല്ല. മകനെക്കാണാതായി അഞ്ചു വര്‍ഷം കഴിഞ്ഞപ്പോള്‍ ഭാര്യയും സ്വാമിയെ വിട്ടുപോയി.

ഒരു മകളുളളത് ഭര്‍ത്താവിനൊപ്പം തിരുനെല്‍വേലിയില്‍ താമസിക്കുന്നു. വല്ലപ്പോഴും അങ്ങോട്ടു പോകുന്നതൊഴിച്ചാല്‍ ബാക്കി ദിവസങ്ങള്‍ മുഴുവന്‍ മകനെ അന്വേഷിച്ചുള്ള നടത്തം തന്നെ. ഭാഗ്യത്തിന്റെ നറുക്കെടുപ്പില്‍ തനിക്കു നഷ്ടമായ ആ ഭാഗ്യം വീണ്ടും തേടി വരുമെന്ന് ഇപ്പോഴും സ്വാമി ഉറച്ചുവിശ്വസിക്കുന്നുണ്ട്. 'നാളെയാണ്, നാളെയാണ്' എന്നുറക്കെ വിളിച്ചുപറയുന്ന ആ ശബ്ദത്തില്‍ ആ പ്രത്യാശ തെളിഞ്ഞു നില്‍ക്കുന്നു.