ഓണ്ലൈന് പഠനം മുടങ്ങാതിരിക്കാന് രണ്ടു ദിവസം കൊണ്ട് കെഎസ്ഇബി വൈദ്യുതിയെത്തിച്ചു!
ബത്തേരി കോട്ടക്കുന്ന് കിടങ്ങില് കോളനിയില് 2015- 16-ല് ഐഎവൈ പദ്ധതി പ്രകാരം പണിത ഒരു വീട്ടില് വയറിങ് ജോലികള് പൂര്ത്തിയായിരുന്നെങ്കിലും ഇതുവരെ വൈദ്യുതി ലഭിച്ചിരുന്നില്ല.
വീട്ടില് വൈദ്യുതിയില്ലാത്തതിനാല് ഓണ്ലൈന് പഠനം മുടങ്ങുന്ന അവസ്ഥയുണ്ടായി. കുപ്പാടി ഗവ.ഹൈസ്കൂള് ആറാം ക്ലാസ് വിദ്യാര്ഥിനി നിരഞ്ജനയുടെയും മൂന്നാം ക്ലാസുകാരി അര്ച്ചനയുടെയും വീടാണ് ഇത്.
വൈദ്യുതി ഇല്ലാത്തതിനാല് ക്ളാസ്സ് മുടങ്ങുന്ന വിവരം കുപ്പാടി സ്കൂളിലെ അധ്യാപകര് കെഎസ്ഇബിയെ അറിയിച്ചു. ഉടന് കോളനിയിലെത്തിയ എക്സിക്യൂട്ടീവ് എന്ജിനീയര് അബ്ദുല് ഷുക്കൂര്, അസി.എന്ജിനീയര് രഞ്ജിത് ശങ്കര് എന്നിവര് വയറിങ് പരിശോധിക്കുകയും ആവശ്യമായ കാര്യങ്ങള് ഓഫിസിലെ ജീവനക്കാര് വഴി തന്നെ പൂര്ത്തിയാക്കുകയും ചെയ്തു.
കുപ്പാടി വില്ലേജ് ഓഫിസ് അധികൃതരും ആവശ്യമായ അനുമതി രേഖകള് പെട്ടെന്ന് നല്കുന്നതിന് ഉണര്ന്ന് പ്രവര്ത്തിച്ചു. പ്രമോട്ടര്മാരുടെ സഹകരണവുമുണ്ടായി. രണ്ടു ദിവസം കൊണ്ടു തന്നെ പ്രവൃത്തികളെല്ലാം പൂര്ത്തിയാക്കി ഇന്നലെ വൈദ്യുതി ലഭ്യമാക്കുകയും ചെയ്തു.
https://www.facebook.com/Malayalivartha