വനാതിര്ത്തിയിലെ മനുഷ്യ-വന്യമൃഗ സംഘര്ഷത്തിന് അയവ് വരുത്താന് തൂക്കുവേലി
കര്ണാടകയിലെ കടുവ സങ്കേതങ്ങളിലും ജനവാസ കേന്ദ്രങ്ങളിലും വന്യമൃഗങ്ങളെ പ്രതിരോധിക്കാന് ഇപ്പോള് തൂക്കുവേലിയാണു നിര്മിക്കുന്നത്. റെയില് പാളവേലിക്കും ക്രാഷ്ഗാര്ഡ് വേലിക്കും വന്തുക ചെലവാകുമെന്നതിനാല് വളരെ കുറഞ്ഞ സ്ഥലത്തു മാത്രമാണ് ഇത്തരം വേലികള് ഒരുക്കാന് സാധിച്ചത്. തന്മൂലം വയനാട്ടില് രൂക്ഷമായ വന്യമൃഗ ശല്യമുള്ള പ്രദേശങ്ങളില് പ്രതിരോധത്തിനു തൂക്കുവേലി നിര്മിക്കുന്നതു ഗുണകരമാണെന്ന് കര്ഷകര്.
പതിനഞ്ചടി ഉയരത്തില് നിന്നു താഴേയ്ക്കു തൂക്കിയിടുന്ന വേലിയില് തൊടാതെ ആനയ്ക്കു കൃഷിയിടത്തിലിറങ്ങാനാവില്ല. കൃഷിയിടങ്ങളുടെ അതിര്ത്തിയിലൂടെ അടുത്തടുത്ത് തൂക്കിയിടുന്ന കമ്പിയിലൂടെ വൈദ്യുതി പ്രവാഹമുണ്ടാകുമ്പോള് ആനയ്ക്ക് മുന്നോട്ട് പോകാനാവില്ല. കമ്പി തൂക്കിയിടുന്നതിന് പകരം ഇവിടെ നേര്ത്ത കേബിളാണ് ഉപയോഗിച്ചത്. കാറ്റടിച്ചാലും കേബിള് അതേപടി തൂങ്ങിക്കിടക്കും. നിശ്ചിത അളവില് വൈദ്യുതി പ്രവാഹമുണ്ടെന്ന് ഉറപ്പ് വരുത്തിയാല് മതിയാകും.
കര്ണാടകയില് പലയിടത്തും സ്ഥാപിച്ച വേലി ഫലപ്രദമെന്നാണ് അനുഭവം. ബന്ദിപ്പൂര് കടുവ സങ്കേതത്തിന്റെയും ജനവാസ കേന്ദ്രങ്ങളുടെയും അതിര്ത്തിയില് ഇപ്പോള് ഇത്തരം സംവിധാനമാണ് ഒരുക്കുന്നത്. വയനാട്ടില് പലയിടത്തും സ്വകാര്യ വ്യക്തികള് കൃഷിയിടത്തിനു സംരക്ഷണമായി ഇത്തരം തൂക്കുവേലികള് സ്ഥാപിച്ചിട്ടുണ്ട്. നിലത്തുകൂടി സ്ഥാപിക്കുന്ന ലൈന് ആനകള് പലവിധത്തില് നശിപ്പിക്കുന്നു. കൊമ്പുടക്കി കമ്പിപൊട്ടിച്ചും മരംതള്ളിയിട്ടും ലൈന് തകര്ത്ത് പ്രതിരോധം മറികടക്കുന്നത് പതിവായി. ആന തുമ്പിക്കൈ ഉയര്ത്തിയാലും എത്താത്തവിധം ഉയരത്തില് വലിച്ചുകെട്ടുന്ന കമ്പിയിലൂടെയാണ് വൈദ്യുതി പ്രവാഹം. ലൈനിലേക്ക് വള്ളിപ്പടര്പ്പുകള് കയറാതെ ശ്രദ്ധിച്ചാല് വൈദ്യുതി പ്രവാഹനഷ്ടവും പരിഹരിക്കാനാവും.
കോടിയില്പരം രൂപ ചെലവാക്കിയാലും ഒരു കിലോമീറ്ററോളം റെയില്പാള വേലിയും മതില് നിര്മാണവുമേ നടത്താനാവുകയുള്ളൂ. അവയും ശാശ്വത പരിഹാരമല്ല. റെയില്പാള വേലിയും മതിലും ആന തകര്ത്ത അനുഭവം വയനാട്ടിലുണ്ട്. തൂക്കുവേലിക്ക് കിലോമീറ്ററിന് 5 ലക്ഷം രൂപയേ ചെലവുള്ളു. ഒരു കിലോമീറ്റര് റെയില്പാള വേലി നിര്മിക്കുന്ന തുകയ്ക്ക് 10 കിലോമീറ്റര് തൂക്കുവേലി സഥാപിക്കാനാവും. വന്യമൃഗ പ്രതിരോധത്തിന് കൂടുതല് തുക അനുവദിക്കുകയും കര്ണാടക മാതൃകയില് വേലി നിര്മിക്കുകയും ചെയ്താല് വനാതിര്ത്തിയിലെ മനുഷ്യ-വന്യമൃഗ സംഘര്ഷത്തിന് അയവ് വരുത്താനാവും.
ത്രിതല പഞ്ചായത്തുകളുടെയും എംഎല്എ, എംപി ഫണ്ടുകളും ഉപയോഗിച്ചാല് വേഗത്തില് ഈ പ്രശ്നത്തിന് പരിഹാരമുണ്ടാക്കാനാവും. ചെതലയം റേഞ്ചില് കര്ണാടകാതിര്ത്തിയില് ജനകീയ സഹായത്തോടെ തൂക്കുവേലി നിര്മാണം ആരംഭിച്ചു. കൊളവള്ളി മുതല് 3 കിലോമീറ്റര് നിര്മാണം പൂര്ത്തിയായി. വണ്ടിക്കടവ് വരെ നിര്മിക്കാനുള്ള ശ്രമത്തിലാണ് വനംവകുപ്പ്. കമ്പിയും മറ്റും കര്ഷകര് തന്നെ വാങ്ങി നല്കി ജോലിയില് വനപാലകരെ സഹായിക്കുന്നുണ്ട്.
https://www.facebook.com/Malayalivartha