ഒരു പൗരബോധവുമില്ലാത്ത ഈ കാര് യാത്രക്കാരെ കുറിച്ച് എന്തുപറയാന്...!
അങ്കമാലിക്ക് സമീപം ചെറിയ വാപ്പാലശേരിയില് മഴക്കാലത്ത് നിരന്തരമായി വെള്ളക്കെട്ട് ഉണ്ടാകാറുണ്ട്. ഇത് അറിയാതെ അതിവേഗത്തില് എത്തുന്ന വാഹനങ്ങള് ഈ വെള്ളത്തിലിറങ്ങുന്നതോടെ ഡ്രൈവറുടെ കാഴ്ച മറയുകയും അപകടത്തില് പെടുകയുമാണ് ചെയ്യുന്നത്.
ഇവിടുത്തെ വെള്ളക്കെട്ടിനെക്കുറിച്ച് പലപ്പോഴായി ദേശീയപാത അധികൃതര്ക്കും പിഡബ്ല്യുഡിക്കും മുന്നറിയിപ്പ് നല്കിയിട്ടുള്ളതാണെന്ന് പറയപ്പെടുന്നു. മഴവെള്ളം ഒഴുകിപോകാന് ഇതിനടുത്തായി ഒരു കലുങ്കുണ്ട്. ഇതില് കയറാത്ത വെള്ളമാണ് വഴിയില് കെട്ടിക്കിടക്കുന്നത്.
തന്മൂലം ഇവിടെ വെള്ളക്കെട്ടുണ്ടാകുമ്പോള്, നാട്ടുകാര് ഫയര് സ്റ്റേഷനില് വിവരമറിയിക്കുകയും അവിടെ നിന്നും കമ്പിയും മറ്റ് ഉപകരണങ്ങളുമായി ഓഫിസര്മാര് എത്തി വെള്ളം കുത്തിവിടുകയും ചെയ്യുകയാണ് പതിവെന്ന് ഉദ്യോഗസ്ഥര് പറയുന്നു. മഴക്കാലത്ത് ഇത് നിരന്തരമായി ചെയ്യേണ്ടിയും വരുന്നുണ്ട്.
അങ്ങനെ കഴിഞ്ഞ ദിവസം ജനജീവിതം സുരക്ഷിതമാക്കാന് പണിപ്പെട്ടുകൊണ്ടിരുന്ന അഗ്നിരക്ഷാ ഉദ്യോഗസ്ഥരെ കുറിച്ച് യാതൊരു ചിന്തയുമില്ലാതെ പാഞ്ഞുപോയ ഒരു കാറിന്റെ ഈ ചിത്രങ്ങള് കണ്ടില്ലേ? ദേശീയപാതയോരത്ത് വാഹനങ്ങള് അപകടത്തില് പെടുന്നത് ഒഴിവാക്കാന് വെള്ളം തിരിച്ചു വിടാനെത്തിയ അഗ്നിരക്ഷാ ഉദ്യോഗസ്ഥരുടെ ശരീരത്തിലേക്ക് ചെളിവെള്ളം തെറുപ്പിച്ച ശേഷം നിര്ത്താതെ പാഞ്ഞുപോയി ആ കാര്!
https://www.facebook.com/Malayalivartha