അച്ഛന് നാലു വയസ്സുകാരന്റെ അവസാന സല്യൂട്ട്!
ഗല്‍വന്‍ താഴ്വരയില്‍ മാതൃരാജ്യത്തിനായി വീരമൃത്യു വരിച്ച തെലങ്കാന സ്വദേശി കേണല്‍ ബികുമല്ല സന്തോഷ് ബാബുവിന്റെ അന്ത്യകര്‍മങ്ങള്‍ക്കെത്തിയ ഭാര്യയും മകനും കണ്ടുനിന്നവരുടെ ഹൃദയത്തില്‍ നൊമ്പരമായി. എട്ടുംപൊട്ടും തിരിയാത്ത പ്രായത്തില്‍ അച്ഛന് അന്ത്യകര്‍മം ചെയ്യാന്‍ അമ്മയുടെ തോളിലേറി എത്തിയ നാലു വയസ്സുകാരന്‍ എല്ലാവരുടെയും ഹൃദയമുലയ്ക്കുന്ന കാഴ്ചയായി.
ധീര യോദ്ധാവിന്റെ ചേതനയറ്റ ശരീരം ഒരു നോക്കു കാണാന്‍ കോവിഡ് ഭീതിയ്ക്കിടയിലും ആയിരങ്ങളാണ് ഓടിയെത്തിയത്. 'സന്തോഷ് ബാബു നീണാള്‍ വാഴട്ടെ', 'വന്ദേമാതരം' തുടങ്ങിയ മുദ്രാവാക്യങ്ങളും അന്തരീക്ഷത്തില്‍ മുഴങ്ങി. ത്രിവര്‍ണ്ണ പതാക പുതച്ച സന്തോഷ് ബാബുവിന്റെ ശരീരവും വഹിച്ചു കൊണ്ടുവന്ന സേനാവാഹനത്തില്‍ പുഷ്പവൃഷ്ടി നടത്താന്‍ നിരവധി പേരാണ് റോഡരികിലെ വീടുകളുടെ ബാല്‍ക്കണിയില്‍ അണിനിരന്നത്. സന്തോഷ് ബാബുവിന്റെ ജന്മസ്ഥലമായ സൂര്യപേട്ടില്‍ ധീരയോദ്ധാവിനുള്ള ആദരസൂചകമായി കടകളും മറ്റും അടച്ചിട്ടു. തെലങ്കാന ഗവര്‍ണര്‍ തമിഴിസൈ സൗന്ദരരാജനും വ്യവസായമന്ത്രി കെ.ടി.രാമറാവുവും പുഷ്പചക്രം അര്‍പ്പിച്ചു.
തെലങ്കാനയിലെ സൂര്യപ്പെട്ട് സ്വദേശികളാണ് സന്തോഷ് ബാബുവിന്റെ കുടുംബം. പിതാവ് ഉപേന്ദറിനു സൈനികന്‍ ആകാനായിരുന്നു ആഗ്രഹം. എന്നാല്‍ പിതാവിനു സഫലമാകാതെ പോയ ആഗ്രഹം യാഥാര്‍ഥ്യമാക്കാന്‍ സന്തോഷ് ബാബു സൈനിക സ്‌കൂളില്‍ ചേര്‍ന്നു. പിന്നീട് നാഷനല്‍ ഡിഫന്‍സ് അക്കാദമിയില്‍ (എന്‍ഡിഎ) പഠനം. പരീക്ഷകളിലെല്ലാം നല്ല മാര്‍ക്കു വാങ്ങിയ മിടുക്കന്‍ വിദ്യാര്‍ഥിയായിട്ടാണു ബന്ധുക്കള്‍ സന്തോഷിനെ ഓര്‍മിക്കുന്നത്. സൈന്യത്തിലെ സഹപ്രവര്‍ത്തകര്‍ക്ക് അദ്ദേഹം വീരയോദ്ധാവും. സെക്കന്തരാബാദിലേക്ക് സ്ഥലമാറ്റം ലഭിച്ചിരിക്കെയാണ് ആകസ്മിക വിയോഗം.
കുടുംബത്തിലും ജന്മനാട്ടിലും പ്രചോദനമായിരുന്നു 16 ബിഹാര്‍ റെജിമെന്റിലെ കമാന്‍ഡിങ് ഓഫിസറായ സന്തോഷ്. കിഴക്കന്‍ ലഡാക്കിലെ ഗല്‍വാനില്‍ നടന്ന സംഘര്‍ഷത്തില്‍ 20 ഇന്ത്യ സൈനികരാണ് വീരമൃത്യു വരിച്ചത്.
പൂര്‍ണ സൈനിക ബഹുമതികളോടെ ജന്മനാടിന്റെ മണ്ണിനോട് ചേരുന്ന തന്റെ ധീരപിതാവിന്, സന്തോഷിന്റെ പിതാവ് അന്ത്യകര്‍മങ്ങള്‍ അര്‍പ്പിക്കുമ്പോള്‍ നിശ്ശബ്ദ കാഴ്ചക്കാരനായി നില്‍ക്കുകയായിരുന്നു നാലു വയസ്സുകാരന്‍ മകന്‍.
https://www.facebook.com/Malayalivartha
