ബ്രിട്ടിഷ് സാമ്രാജ്യത്തിന്റെ ഭാഗമായ റോയല്‍ ഇന്ത്യന്‍ എയര്‍ഫോഴ്‌സില്‍ യുദ്ധവിമാന പൈലറ്റ് ആയിരുന്ന ദലിപ് സിങ് മജീതിയയ്ക്ക് ഇന്ന് 100 വയസ്സ്.

1940 ഓഗസ്റ്റില്‍ ഫൈറ്റര്‍ പൈലറ്റായി ചേര്‍ന്ന ദലിപ്, ഇന്ന് ജീവിച്ചിരിക്കുന്നവരില്‍ ഏറ്റവും പ്രായമേറിയ യുദ്ധപൈലറ്റാണ്.

രണ്ടാം ലോക യുദ്ധത്തില്‍ ബംഗാള്‍ ഉള്‍ക്കടലിനു മുകളിലുള്ള നിരീക്ഷണപ്പറക്കലായിരുന്നു (കോസ്റ്റ് ഡിഫന്‍സ്) സേനയില്‍ ദലിപിന്റെ ആദ്യ ദൗത്യം. യുദ്ധവിമാനം പറപ്പിക്കുന്നതിലുള്ള വൈദഗ്ധ്യം കണക്കിലെടുത്ത്, അക്കാലത്തെ ഏറ്റവും കരുത്തുറ്റ വിമാനങ്ങളിലൊന്നായ ഹോക്കര്‍ ഹറികേനില്‍ ആറാം നമ്പര്‍ സ്‌ക്വാഡ്രണിലെ പൈലറ്റായി നിയോഗിക്കപ്പെട്ടു.

ലോകയുദ്ധത്തില്‍ ജപ്പാന്‍ സേനയ്‌ക്കെതിരായി മ്യാന്‍മറിനു സമീപം നടത്തിയ വ്യോമാക്രമണങ്ങളില്‍ സ്‌ക്വാഡ്രന്‍ ലീഡര്‍ ദലിപും സംഘവും നാശം വിതച്ചു. ഒരേസമയം 2 വിമാനങ്ങള്‍ ഒന്നിച്ചു പറന്നാണ് എതിര്‍സേനയെ നേരിട്ടത്.

ലോകയുദ്ധത്തിനു ശേഷം ബ്രിട്ടിഷ് കോമണ്‍വെല്‍ത്ത് സേനാ സംഘത്തിന്റെ ഭാഗമായി ഓസ്‌ട്രേലിയയിലെ മെല്‍ബണില്‍ സേവനമനുഷ്ഠിച്ച അദ്ദേഹം, അവിടെ വച്ചു കണ്ടുമുട്ടിയ ജൊവാനെ ജീവിതസഖിയാക്കി.

ദലിപ് ഇന്ത്യ സ്വാതന്ത്ര്യം നേടിയ 1947-ല്‍ സേനയില്‍ നിന്നു വിരമിച്ചു. പക്ഷേ, പറക്കലിനോടു വിട പറഞ്ഞില്ല. 1949 ഏപ്രില്‍ 23-നു നേപ്പാള്‍ തലസ്ഥാനമായ കഠ്മണ്ഡുവില്‍ കൃത്യമായ റണ്‍വേ പോലുമില്ലാതിരുന്ന സ്ഥലത്ത് സാഹസികമായി സ്വകാര്യ വിമാനമിറക്കി ചരിത്രം കുറിച്ചു.

നേപ്പാളിന്റെ ചരിത്രത്തിലെ ആദ്യത്തെ വിമാന ലാന്‍ഡിങ് ആയിരുന്നു അത്. അവിടെയാണ് നിലവില്‍ കഠ്മണ്ഡുവിലെ രാജ്യാന്തര വിമാനത്താവളം.