ഇന്നു നടന്ന ചരിത്രത്തിലെ ആദ്യത്തെ ഓണ്‍ലൈന്‍ മന്ത്രിസഭാ യോഗത്തില്‍ മന്ത്രിപോലുമല്ലാത്ത ഒരു വ്യക്തി പങ്കെടുത്തു. വ്യവസായ മന്ത്രി ഇ.പി ജയരാജന്റെ ചെറുമകനാണ് ചിലപ്പോള്‍ ചരിത്രം അടയാളപ്പെടുത്തിയേക്കാവുന്ന മന്ത്രിസഭാ യോഗത്തില്‍ പങ്കെടുത്ത ഏറ്റവും പ്രായം കുറഞ്ഞ വ്യക്തി. കേരളത്തിന്റെ ചരിത്രത്തില്‍ ആദ്യമായിയാണ് ഓണ്‍ലൈന്‍ മന്ത്രിസഭാ യോഗം നടക്കുന്നത്. കോവിഡ് വ്യാപനത്തെ തുടര്‍ന്ന് ഇന്നു ചേര്‍ന്ന പ്രത്യേക മന്ത്രിസഭാ യോഗം ഓണ്‍ലൈനിലാക്കിയത്. ക്ലിഫ് ഹൗസിലിരുന്ന് മുഖ്യമന്ത്രി പിണറായി വിജയന്‍ യോഗം നിയന്ത്രിച്ചു. മന്ത്രിമാര്‍ ഔദ്യോഗിക വസതികളിലിരുന്നാണ് യോഗത്തില്‍ പങ്കെടുത്തത്. കോവിഡ് വ്യാപനത്തിന്റെ പശ്ചാത്തലത്തില്‍ വീണ്ടും സംസ്ഥാനത്ത് സമ്പൂര്‍ണ ലോക് ഡൗണ്‍ ആവശ്യമുണ്ടോ? കോവിഡ് പശ്ചാത്തലത്തില്‍ നിയമസഭാ സമ്മേളനം മാറ്റിയ സ്ഥിതിക്ക് ഇനി ധനബില്ലുകള്‍ പാസാക്കാന്‍ എന്തു നടപടി സ്വീകരിക്കും എന്ന പ്രധാന്യമേറിയ വിഷയങ്ങളാണ് ഇന്നത്തെ പ്രത്യേക മന്ത്രിസഭാ യോഗം ചര്‍ച്ച ചെയ്ത്.

മന്ത്രിയായിരുന്നാലും സാധാരണക്കായിരുന്നാലും വര്‍ക്ക് ഫ്രം ഹോമെന്നത് ചില വെല്ലുവിളികള്‍ നിറഞ്ഞതാണ്. എന്തു പുലിയും വീട്ടില്‍ പൂച്ചയാണ്. ആള്‍ക്കാരെ എടുത്ത് ഉടുക്കുന്ന ചൂടന്‍ സ്വഭാവമൊന്നും പിള്ളരോട് നടക്കില്ല. അപ്പുപ്പന്‍ അവര്‍ക്ക് കളിക്കൂട്ടുക്കാരനാണ്. ഇതു തന്നെയാണ് മന്ത്രിസഭാ യോഗത്തില്‍ പങ്കെടുത്ത ഇ.പി ജയരാജനെയും ചെറുമകനെയും കണ്ടപ്പോള്‍ എല്ലാവര്‍ക്കും മനസിലായത്. മന്ത്രിസഭാ യോഗത്തില്‍ ചൂടന്‍ ചര്‍ച്ചകള്‍ നടക്കുമ്പോള്‍ തന്റെ ചൂടന്‍ സ്വഭാവമൊന്നും കൊച്ചു മകനൊപ്പം നിന്നപ്പോള്‍ ഇ.പിയുടെ മുഖത്തുണ്ടായിരുന്നില്ല. ആദ്യത്തെ കൗതുകം മാറിയപ്പോള്‍ കുട്ടി മുത്തച്ഛന്‍മാരുടെ ഇടയില്‍ നിന്നും ഓടി രക്ഷപ്പെടുകയും ചെയ്തു.

സമ്പൂര്‍ണ ലോക്ഡൗണ്‍ അപ്രായോഗികമാണെന്നു മന്ത്രിസഭായോഗം വിലയിരുത്തി. പൂര്‍ണമായി ലോക്ഡൗണിലേക്കു പോകുന്നതിനു പകരം രോഗവ്യാപനം കൂടുതലായ പ്രദേശങ്ങളില്‍ ശക്തമായ നിയന്ത്രണങ്ങള്‍ ഏര്‍പ്പെടുത്താന്‍ മന്ത്രിസഭായോഗം തീരുമാനിച്ചു. സമ്പൂര്‍ണ ലോക്ഡൗണ്‍ ഗുണം ചെയ്യില്ലെന്ന സര്‍വകക്ഷി യോഗത്തിന്റെ അഭിപ്രായത്തോട് മന്ത്രിസഭായോഗവും യോജിച്ചു. ജനജീവിതം സ്തംഭിപ്പിച്ചു കൊണ്ടുള്ള സമ്പൂര്‍ണ ലോക്ഡൗണ്‍ ജനവികാരം എതിരാക്കുമെന്ന് യോഗത്തില്‍ അഭിപ്രായമുയര്‍ന്നു. ക്ലസ്റ്ററുകള്‍ കേന്ദ്രീകരിച്ച് കൂടുതല്‍ നിയന്ത്രണങ്ങള്‍ കൊണ്ടു വരും. രോഗവ്യാപനം രൂക്ഷമായ പ്രദേശങ്ങളില്‍ ട്രിപ്പിള്‍ ലോക്ഡൗണ്‍ ഏര്‍പ്പെടുത്തും. വാണിജ്യകേന്ദ്രങ്ങളില്‍ കൂടുതല്‍ പരിശോധനകളും നിയന്ത്രണങ്ങളും ഏര്‍പ്പെടുത്താനും തീരുമാനിച്ചു. ധനബില്‍ പാസാക്കുന്നത് രണ്ടുമാസത്തേക്കു വൈകിപ്പിക്കാനുള്ള ഓര്‍ഡിനന്‍സിനും മന്ത്രിസഭായോഗം അംഗീകാരം നല്‍കി. ധനബില്‍ പാസാക്കാനുള്ള സമയപരിധി 29ന് അവസാനിക്കും. ഓര്‍ഡിനന്‍സ് ഗവര്‍ണറുടെ അനുമതിക്കായി അയക്കാനും മന്ത്രിസഭ തീരുമാനിച്ചു.