തൃശൂര്‍ മാള കൊമ്പിടിഞ്ഞാലില്‍ വാടകവീട്ടില്‍ താമസിക്കുന്ന അട്ടപ്പാടി അഗളി കോളിക്കടവ് സ്വദേശി സോജനും കുടുംബവും ഒരുതെറ്റും ചെയ്യാതെ നരകയാതനയിലൂടെ കടന്നുപോകയാണ്. കോവിഡ് പോസിറ്റീവാണെന്ന തെറ്റായ റിപ്പോര്‍ട്ട് അധികൃതര്‍ നല്‍കിയതാണ് സോജന്റെ കുടുംബത്തിന് വിനയായത്. കൂലിപ്പണിപോലും നിഷേധിക്കപ്പെട്ടതോടെ പട്ടിണിയിലാണ്. കൈത്താങ്ങാകാന്‍ അധികൃതരുടെ ഇടപെടലുമില്ല.

ജന്മനാ മുറിച്ചുണ്ടുള്ളവരാണ്, സോജന്റെ അഞ്ചര വയസുകാരന്‍ മകനും അഞ്ചുമാസം പ്രായമുള്ള പെണ്‍കുഞ്ഞും. കുഞ്ഞുനാളില്‍ മുറിച്ചുണ്ട് ശസ്ത്രക്രിയയ്ക്ക് വിധേയനായ മകന് രണ്ടാംതവണത്തെ ശസ്ത്രക്രിയ നടത്തേണ്ടിയിരുന്നത് അഞ്ചാംവയസില്‍. ഇതിനിടെ പിറന്ന കുഞ്ഞിനും മുറിച്ചുണ്ട് വന്നതോടെ ഒരുമിച്ചാകാം ശസ്ത്രക്രിയയെന്നായി തീരുമാനം.

പത്തനംതിട്ടയില്‍ സൗജന്യമായി മുറിച്ചുണ്ട് ശസ്ത്രക്രിയ നടത്തുമെന്നറിഞ്ഞതോടെ ഇതിനായി ശ്രമം. കുട്ടികളുടെ കോവിഡ് ടെസ്റ്റ് നടത്തി ആശുപത്രിയിലെത്താനായി നിര്‍ദേശം. ഇതേതുടര്‍ന്നാണ് സോജന്‍ കഴിഞ്ഞ 16-ന് രണ്ട് കുട്ടികളുമായി ഇരിങ്ങാലക്കുട താലൂക്ക് ആശുപത്രിയിലെത്തിയത്. കുട്ടികളുടെ സ്രവ പരിശോധന നടത്തി 21-ന് ഫലംവന്നു.- രണ്ട് പേരും പോസിറ്റീവ്..!

രാത്രി പത്തോടെ ആംബുലന്‍സ് വാടകവീടിന് മുറ്റത്തെത്തി. ഭാര്യ ഡോണിയയും രണ്ട് കുട്ടികളും ചാവക്കാട്ടെ കോവിഡ് സെന്ററിലേക്ക്. ഇതിനിടെ പ്രാദേശിക മാധ്യമങ്ങളില്‍ വാര്‍ത്തയും വന്നു. വീട്ടില്‍നിന്ന് കൂലിപ്പണിക്കായി പുറത്ത് പോകാറുള്ളത് സോജന്‍ മാത്രമായതിനാല്‍ കൈക്കുഞ്ഞിനും രോഗം വരുത്തിയെന്ന കുറ്റം മുഴുവന്‍ സോജനായി.

കോവിഡാണെന്നു നാട്ടിലെങ്ങും പാട്ടായി. കോവിഡ് കേന്ദ്രത്തില്‍ വീണ്ടും നടത്തിയ പരിശോധനയില്‍ നെഗറ്റീവാണെന്നറിഞ്ഞതോടെ ഡോണിയയും രണ്ട് കൈക്കുഞ്ഞുങ്ങളേയും മറ്റ് അഞ്ചു പേര്‍ക്കൊപ്പം തിങ്ങിനിറഞ്ഞ ആംബുലന്‍സില്‍ തൃശൂര്‍ കിലയിലേക്ക് മാറ്റിയത് പിറ്റേന്ന് രാവിലെ. അവിടെനിന്നു വീട്ടിലേക്ക് തിരിച്ചയച്ചെങ്കിലും കുടുംബത്തിന് നാട്ടുകാര്‍ കല്‍പ്പിച്ചത് ഊരുവിലക്ക്. പള്ളി വക വാഴത്തോട്ടത്തിലെ കൂലിപ്പണിയും ഇതോടെ നഷ്ടമായി.

ഇതിന് ശേഷം ഒരാഴ്ച പിന്നിട്ടെങ്കിലും ഇപ്പോഴും 'ഊരുവിലക്ക്' പിന്‍വലിക്കാന്‍ നാട്ടുകാര്‍ തയാറായിട്ടില്ലെന്നു സോജന്‍ പറയുന്നു. വീട്ടില്‍നിന്ന് പുറത്തിറങ്ങാന്‍ കഴിയുന്നില്ല. ഇതോടെ കുട്ടികളുടെ മുറിച്ചുണ്ട് ശസ്ത്രക്രിയയും മുടങ്ങി. ഇക്കാര്യത്തില്‍ അധികൃതരുടെ ഇടപെടലുണ്ടാകണമെന്നാണ് സോജന്റെ ആവശ്യം.