ദിയയുടെ ദുരിതജീവിതത്തിന് അറുതി... ദിയ പറയുന്നു, മാതാ... പിതാ... ടീച്ചറമ്മ...ദൈവം!
മലപ്പുറം ചാത്തങ്ങോട്ടുപുറം മാടോളിക്കുന്നില് കല്യാണിയുടെ മകള് ദിയ കഴിഞ്ഞ വര്ഷമാണ് ചെറുകോട് കെഎംഎം എയുപി സ്കൂളില് അഞ്ചാം ക്ലാസില് എത്തിയത്.
വിദ്യാര്ഥികളുടെ വിവരങ്ങള് അറിയാന് കഴിഞ്ഞ പ്രളയകാലത്ത് വീടുകളിലേക്ക് വിളിച്ചപ്പോഴാണ് പണി പൂര്ത്തിയാവാത്ത, പൊടിനിറഞ്ഞ വീട്ടിലെ ദിയയുടെ ദുരിതജീവിതം ചെറുകോട് കെഎംഎംഎയുപി സ്കൂളിലെ അധ്യാപിക കെ.വി.സിന്ധു അറിഞ്ഞത്.
ദിയ ജനിച്ച് അധികം കഴിയുന്നതിനു മുന്പ് അച്ഛന് ഉപേക്ഷിച്ചു. അമ്മ കല്യാണി കൂലിവേലയ്ക്കു പോയാണ് മകളെ വളര്ത്തിയത്. അഞ്ചു വര്ഷം മുന്പു ബസ് അപകടത്തില് കല്യാണിയുടെ വലതു കൈയ്ക്കു പരുക്കേറ്റതിനാല് കമ്പി ഇട്ടു. സാമ്പത്തിക ബുദ്ധിമുട്ടുമൂലം തുടര് ചികിത്സ മുടങ്ങി. കമ്പിയിട്ട ഭാഗം ഇടയ്ക്കിടെ പഴുത്ത് കൈയുടെ ചലനശേഷി ഭാഗികമായി നഷ്ടപ്പെട്ടു. ഇതോടെ പണിക്കു പോകാനും കഴിയാതായി.
ദിയയുടെ കുടുംബത്തിന്റെ പ്രധാന പ്രശ്നം ശുദ്ധജലദൗര്ലഭ്യമായിരുന്നു. സിന്ധുടീച്ചര് തന്നെ 42,000 രൂപ മുടക്കി കുഴല് കിണര് കുഴിച്ചു മോട്ടര് സ്ഥാപിച്ചു നല്കി. സിന്ധുവിന്റെ സഹോദരി അഞ്ജലിയും ഭര്ത്താവ് അനീഷും ചേര്ന്ന് വീടുപണിക്കുള്ള സഹായം നല്കി. ദിയയ്ക്ക് ഓണ്ലൈന് പഠനത്തിനു ടിവിയും നല്കി.
കഴിഞ്ഞില്ല, സിന്ധു തന്നെ മുന്കൈയെടുത്ത് ചികിത്സിച്ച് കല്യാണിയുടെ കൈയിലെ കമ്പി എടുത്തു മാറ്റി. ജാതി തെളിയിക്കുന്ന രേഖ ഇല്ലാത്തതിനാല് ദിയയ്ക്കു സംവരണ ആനുകൂല്യം കിട്ടിയിരുന്നില്ല. ഒടുവില് അതും ശരിയാക്കി. ഇത്രയൊക്കെ ചെയ്ത ടീച്ചറിനെ ദിയ ടീച്ചറേ എന്ന്വിളിക്കുകയേ ഇല്ല... ടീച്ചറമ്മ എന്നാണ് വിളിക്കുന്നത്!
https://www.facebook.com/Malayalivartha