നിലമ്പൂര് വനത്തിനുള്ളിലെ ചോലനായ്ക്ക വിഭാഗത്തിലെ 3 വിദ്യാര്ഥികള് പത്താം ക്ലാസ് പാസായി!
കണിയാമ്പറ്റ മോഡല് റസിഡന്ഷ്യല് സ്കൂള്, നൂല്പുഴ രാജീവ് ഗാന്ധി സ്കൂള് എന്നിവിടങ്ങളില് പ്ലസ് വണ് പഠിക്കാന് നിലമ്പൂര് വനത്തിനുള്ളിലെ ചോലനായ്ക്ക വിഭാഗത്തിലെ ആദ്യ ബാച്ച് പത്താംക്ലാസ് വിജയികളായ 3 പേര് കൂടിയുണ്ടാവും. പുറത്തു നിന്നുള്ളവരെ കാണുമ്പോള് ഓടിയൊളിച്ച കാലത്തു നിന്ന് പുറംനാട്ടിലെത്തി പത്താംക്ലാസ് പാസായ ഇവര് ഇനി പ്ലസ് വണിലേക്ക്. സഹോദരങ്ങളായ എസ്. കാര്ത്തിക, എസ്. വിമിത, സിമിത എന്നിവരാണു പത്താംക്ലാസിലെ മികച്ച വിജയത്തിന് ശേഷം പ്ലസ് വണ് പഠനത്തിന് വനഗ്രാമത്തില് നിന്നെത്തുന്നത്.
പരപ്പന്പാറയിലെ ആദ്യ തലമുറയുടെ വിജയത്തില് 3 പേര്ക്ക് ലഭിച്ച ആദ്യ സമ്മാനം ഇവരെ സ്കൂളിലേക്ക് കൈപിടിച്ച് നടത്തിയ അതേ കൈകളില് നിന്നാണെന്നതും മറ്റൊരു സവിശേഷതയായി. റിസള്ട്ട് വന്നതിനു ശേഷം വനത്തിലൂടെ എത്തിയ ആദ്യ സമ്മാനം ഇവരെ കാടിന്റെ പുറത്തെത്തിച്ച് അക്ഷരങ്ങളുടെ ലോകത്തേക്കെത്തിച്ച ഐടിഡിപി ജില്ലാ ഓഫിസര് കെ.സി. ചെറിയാനാണ് ഇവര്ക്ക് ഉപഹാരവുമായി പരപ്പന്പാറയിലെത്തിയത്.
നൂല്പ്പുഴ രാജീവ് ഗാന്ധി സ്കൂളിലെ സീനിയര് സൂപ്രണ്ട് ആയിരിക്കുമ്പോഴാണ് ചെറിയാന്റെ നേതൃത്വത്തില് പരപ്പന്പാറയിലെ വിദ്യാര്ഥികളെ വനത്തിനുള്ളിലെ ജീവിതത്തില് നിന്ന് അക്ഷരങ്ങളുടെ വിദ്യാലയങ്ങളിലേക്കും പുറംലോകത്തിന്റെ വെളിച്ചത്തിലേക്കും എത്തിച്ചത്. രാജീവ് ഗാന്ധി സ്കൂളിലെ വാസു എന്ന അധ്യാപകന്റെ ഇടപെടലും ഇവരെ മറ്റുള്ള വിദ്യാര്ഥികളോട് ഒന്നിച്ച് പോകുന്നതിന് സഹായകമായിട്ടുണ്ട്.
നിലമ്പൂര് വനത്തിനുള്ളിലെ ഈ പ്രാക്തന വിഭാഗത്തിലുള്ള ഇവര്ക്കും കുടുംബങ്ങള്ക്കും പുറംലോകവുമായി ഒരു ബന്ധവുമുണ്ടായിരുന്നില്ല. പുറത്ത് നിന്നുള്ളവര് എത്തുമ്പോള് അവരെ അഭിമുഖീകരിക്കാനോ സംസാരിക്കാനോ ഇവര് തയാറായിരുന്നില്ല. അത്തരം ഒരു അവസ്ഥയില് നിന്നാണ് ഇവിടുത്തെ വിദ്യാര്ഥികളില് 6 പേര് പുറം ലോകത്തേക്ക് എത്തി നൂല്പുഴ രാജീവ് ഗാന്ധി സ്കൂളില് പഠനം നടത്തിയത്. ഇവരില് 3 പേരാണ് ഇത്തവണ എസ്എസ്എല്സി പരീക്ഷയില് മികച്ച വിജയം നേടിയത്.
വനത്തിനുള്ളിലെ താമസത്തിനിടെ പത്താംക്ലാസ് വിജയ വിവരം അറിഞ്ഞപ്പോഴേക്കും റിസള്ട്ട് വന്ന് 7 ദിവസം പിന്നിട്ടിരുന്നു. വടുവന്ചാല് സണ്റൈസ് വാലിക്ക് സമീപത്ത് നിന്നാരംഭിച്ച് നിലമ്പൂര് വനത്തിലൂടെ കാല്നടയായിട്ടാണ് ഈ കോളനിയിലെത്താന് സാധിക്കുക. രാജീവ് ഗാന്ധി സ്കൂളില് താമസിച്ചു പഠിച്ചിരുന്ന ഇവര് ആദ്യ സമയങ്ങളില് മറ്റു കുട്ടികളുമായി ഇടപഴകാന് വളരെയധികം ബുദ്ധിമുട്ടിയെങ്കിലും പിന്നീട് ഒത്തു ചേര്ന്നു പോകുകയായിരുന്നു. ആദ്യ പത്താംക്ലാസ് വിജയികളുടെ നിറ സന്തോഷത്തിലാണ് ഇപ്പോള് പരപ്പന്പാറ എന്ന വനഗ്രാമം.
https://www.facebook.com/Malayalivartha