പ്രധാനമന്ത്രി കഴിഞ്ഞ സ്വാതന്ത്ര്യ ദിനത്തില്‍ ജനങ്ങളെ അഭിസംബോധന ചെയ്തു പറഞ്ഞ ഒരു കാര്യമുണ്ട്. 'ഇന്ത്യയില്‍ നിര്‍മിക്കുന്നു' എന്നതില്‍ നിന്നും നമ്മള്‍ ഉയരുവാന്‍ പോവുകയാണ് ലോകത്തിനു വേണ്ടി നിര്‍മിക്കാന്‍ പോവുകയാണ് നമ്മള്‍. മെയ്ക് ഇന്‍ ഇന്ത്യയില്‍ നിന്നും മെയ്ക് ഫോര്‍ ദി വേള്‍ഡ്. വെറും വാക്ക് പറഞ്ഞതല്ല നമ്മുടെ പ്രധാനമന്ത്രി. ഇന്ത്യ,ജപ്പാന്‍,ഓസ്‌ട്രേലിയ ചേര്‍ന്നുള്ള സാമ്പത്തിക സഖ്യത്തിലൂടെ യഥാര്‍ത്ഥത്തില്‍ നമ്മള്‍ മാനുഫാക്ച്ചറിങ് ഹബ് ഇന്ത്യയിലേക്ക് മാറ്റി സ്ഥാപിക്കുകയാണ്. ഇതിന്റെ തെളിവുകളാണ് ഇപ്പോള്‍ വന്നു കൊണ്ടിരിക്കുന്നത്.

ആപ്പിള്‍ ഐ ഫോണിന്റെ ഏറ്റവും പുതിയ മോഡല്‍ ഐ ഫോണ്‍ 12 ഇന്ത്യയില്‍ നിര്‍മ്മിക്കും. കര്‍ണാടകയിലെ നരസപുരയിലാണ് ഉല്‍പാദന കേന്ദ്രം നിലവില്‍ വരുന്നത്. റിപ്പോര്‍ട്ടുകളുടെ അടിസ്ഥാനത്തില്‍ അടുത്ത വര്‍ഷം പകുതിയോടു കൂടെ ഉല്‍പാദനം തുടങ്ങും. ഈയിടെയാണ് ആപ്പിളിന്റെ ഏറ്റവും വലിയ കോണ്‍ട്രാക്ട് ഉല്‍പാദകരായ ഫോക്‌സ് കോണ്‍ അവരുടെ ചൈന വിടാനുള്ള തീരുമാനങ്ങള്‍ തുറന്നു പറഞ്ഞത്. ലോകത്തിന്റെ ഫാക്ടറി എന്ന നിലയില്‍ ചൈനയുടെ ദിനങ്ങള്‍ എണ്ണപ്പെട്ടിരിക്കുന്നു എന്നാണ് ഫോക്‌സ് കോണിന്റെ മേധാവി പറഞ്ഞിരിക്കുന്നത്. ആപ്പിളിന്റെ മറ്റൊരു കോണ്‍ട്രാക്ട് ഉല്‍പാദകരായ വിസ്‌ട്രോണ്‍ ഇന്ത്യയില്‍ തദ്ദേശീയമായി ഉത്പാദനം ആരംഭിക്കാന്‍ പോവുകയാണ്. 10000 ഓളം ഉദ്യോഗാര്‍ത്ഥികള്‍ക്കാണ് അവര്‍ ജോലി കൊടുക്കാന്‍ ഉദ്ദേശിക്കുന്നത്. ലഭ്യമായ റിപ്പോര്‍ട്ടുകളുടെ അടിസ്ഥാനത്തില്‍ വിസ്‌ട്രോണ്‍ നിലവില്‍ 2000 തൊഴിലാളികളെ നിലവില്‍ തിരഞ്ഞെടുത്തു കഴിഞ്ഞു. ആപ്പിളിന്റെ പുതിയ പതിപ്പിന്റെ നിര്‍മാണ പ്രവര്‍ത്തനങ്ങള്‍ ഈ വര്‍ഷം അവസാനത്തോട് കൂടിയാണ് തുടങ്ങാന്‍ ഉദ്ദേശിക്കുന്നത്. ആപ്പിളിന്റെ തായ്‌വാനീസ് നിര്‍മാതാക്കളായ വിസ്‌ട്രോണ്‍. തദ്ദേശീയമായി ഉല്‍പാദനം തുടങ്ങുവാന്‍ വേണ്ടി പ്രാഥമികമായി 2900 കോടി രൂപ നിക്ഷേപിക്കാനുള്ള ആലോചന നിലവില്‍ വിസ്‌ട്രോണ്‍ തുടങ്ങി വച്ച് കഴിഞ്ഞു.

ബാംഗ്ലൂരില്‍ നിന്നും 70 കിലോമീറ്റര്‍ അകലെയായി കോലാര്‍ ജില്ലയിലെ നരസപുര പ്ലാന്റിലാണ് ഐ ഫോണ്‍ 12 ന്റെ ഉല്‍പാദനത്തിന് വേണ്ടിയുള്ള സംവിധാനങ്ങള്‍ വിസ്‌ട്രോണ്‍ ഒരുക്കിയിരിക്കുന്നത്. 2017 ല്‍ ഇതിന്റെ രൂപ രേഖ പുറത്തു വിട്ടപ്പോള്‍ തന്നെ 43 ഏക്കറോളം ഭൂമി വിസ്‌ട്രോണിന് കര്‍ണാടക ഇന്‍ഡസ്ട്രിയല്‍ ഏരിയ ഡെവലപ്‌മെന്റ് ബോര്‍ഡ് (കെ.ഐ.എ.ബി) നല്‍കി കഴിഞ്ഞു. പാതയിരത്തോളം നേരിട്ടുള്ള തൊഴിലവസരങ്ങള്‍ ഈ ഉല്‍പാദന കേന്ദ്രത്തില്‍ നിന്നും ലഭിക്കും എന്നാണ് പ്രതീക്ഷിക്കുന്നത്. അതില്‍ രണ്ടായിരത്തോളം തൊഴില്‍ നിലവില്‍ നല്‍കി കഴിഞ്ഞു. ഘട്ടം ഘട്ടമായിട്ടാണ് തൊഴിലാളികളെ തിരഞ്ഞെടുക്കുന്നത് നിലവില്‍ ഡിപ്ലോമ ബിരുദധാരികളുടെ നേരിട്ടുള്ള അഭിമുഖമാണ് നടന്നു കൊണ്ടിരിക്കുന്നത്. പവൃത്തി പരിചയം ഉള്ളവരും പുതുമുഖങ്ങളുമായുള്ള അഭിമുഖങ്ങള്‍ വരും ദിവസങ്ങളില്‍ നടക്കും. നിലവില്‍ പരീക്ഷണ അടിസ്ഥാനത്തലുള്ള ഉല്‍പാദനം തുടങ്ങി വച്ച് കഴിഞ്ഞു. വ്യാപാര ആവശ്യത്തിന് വേണ്ടിയുള്ള ഉത്പാദനം സെപ്റ്റംബറോടു കൂടി തുടങ്ങും എന്നാണ് അറിയാന്‍ കഴിയുന്നത്.

തദ്ദേശീയമായ ഉല്‍പാദനം ഐ ഫോണിന്റെ നികുതിയില്‍ 22 ശതമാനം കുറവ് വരുത്തും. അതുകൂടാതെ തദ്ദേശീയമായി കൂടുതല്‍ പേര്‍ക്ക് തൊഴില്‍ ലഭ്യതയും ഉറപ്പു വരുത്തും .അതായതു ഐ ഫോണ്‍ 12 ഐ ഫോണ്‍ 11 ന്റെ അതെ വിലയില്‍ വിപണിയില്‍ ലഭ്യം ആകും എന്നാണ് പ്രതീക്ഷിക്കുന്നത്. ആപ്പിളിന്റെ തായ്‌വാനീസ് കോണ്‍ട്രാക്ട് ഉല്‍പാദകരായ ഫോക്‌സ് കോണ്‍, വിസ്‌ട്രോണ്‍ പിന്നെ പെഗാട്രോണ്‍ എന്നീ കമ്പനികള്‍ ഇന്ത്യയുടെ തദ്ദേശീയ വല്‍ക്കരണ പദ്ധതിയുടെ കീഴില്‍ ഇവിടെ ഉല്പാദന കേന്ദ്രങ്ങള്‍ തുടങ്ങുവാനുള്ള പദ്ധതിയില്‍ ചെറുവാനുള്ള പേക്ഷ അയച്ചിട്ടുണ്ട്. ഏതാണ്ട് 49,828 കോടി രൂപയാണ് പദ്ധതി തുകയായി കണക്കാക്കുന്നത്. അഞ്ചു വര്‍ഷം നീണ്ടു നില്‍ക്കുന്ന ഈ പദ്ധതിയിലൂടെ ചൈനക്ക് സമാനമായി ഇന്ത്യയും ഒരു ലോക സ്മാര്‍ട്ട് ഫോണ്‍ ഉല്‍പാദക കേന്ദ്രമായി മാറുവാനുള്ള ശ്രമം ആണ് നടന്നു കൊണ്ടിരിക്കുന്നത്.

സൗത്ത് കൊറിയയിലെ ഇലക്ട്രോണിക്‌സ് ഭീമന്മാരായ സാംസങും സമാന പദ്ധതിയിലേക്ക് അപേക്ഷ സമര്‍പ്പിച്ചിട്ടുണ്ട്. ഡല്‍ഹിയുടെ അതിരുകളില്‍ നിലവില്‍ അവര്‍ ലോകത്തെ തന്നെ ഏറ്റവും വലുത് എന്ന് വിശേഷിപ്പിക്കാവുന്ന ഉല്പാദന കേന്ദ്രം സ്ഥാപിച്ചിരിക്കുകയാണ്. ഇന്ത്യയുടെ സമ്പദ് വ്യവസ്ഥയെ സംബന്ധിച്ചിടത്തോളം സ്മാര്‍ട്ട് ഫോണ്‍ മേഖല തീര്‍ച്ചയായും ഒരു തിളക്കമാര്‍ന്ന ഭാഗം തന്നെയാണ്. പ്രധാനമന്ത്രി നരേന്ദ്ര മോഡി ഊന്നല്‍ കൊടുക്കുന്ന തദ്ദേശീയ ഉല്‍പാദന കേന്ദ്രങ്ങളുടെ നിര്‍മാണവും വികസനവും ലക്ഷകണക്കിന് തൊഴിലവസരങ്ങളാണ് രാജ്യത്തു നിര്‍മ്മിക്കാന്‍ പോകുന്നത്. ഒരു ബില്യണില്‍ കൂടുതല്‍ മൊബൈല്‍ വരിക്കാരുള്ള ഇന്ത്യയില്‍ 350 ദശലക്ഷത്തോളം പേര്‍ അടിസ്ഥാന സൗകര്യങ്ങള്‍ മാത്രമുള്ള ഫോണുകളാണ് ഉപയോഗിക്കുന്നത്. അതുകൊണ്ട് തന്നെ സ്മാര്‍ട്ട് ഫോണ്‍ വിപണി ഒരു വന്‍ സാധ്യതയാണ് ഇന്ത്യന്‍ സമ്പദ് വ്യവസ്ഥയ്ക്ക് മുന്നില്‍ തുറന്നിട്ടിരിക്കുന്നതു.

ഇന്ത്യയിലെ തൊഴിലാളി വേതനം ചൈനയെ അപേക്ഷിച്ചു കുറവായതു കൊണ്ട് കുറഞ്ഞ വിലയില്‍ ഇന്ത്യയില്‍ സ്മാര്‍ട്ട് ഫോണുകള്‍ നിര്‍മ്മിക്കാന്‍ കമ്പനികള്‍ക്ക് സാധിക്കും. നമുക്ക് തല്‍ഫലമായി ദശലക്ഷകണക്കിന് തൊഴിലവസരങ്ങളും ലഭിക്കും. എന്നാല്‍ കമ്പനികള്‍ക്ക് വേണ്ട സാഹചര്യങ്ങള്‍ ലഭ്യമാക്കി കൊടുക്കുക എന്നത് പരമ പ്രധാനമാണ്. ലോകത്തിലെ മാനുഫാക്ച്ചറിങ് ഹബാണ് ചൈന. അതു പെട്ടെന്ന് ഒരു ദിവസം കൊണ്ടായതല്ല. എണ്‍പതുകളില്‍ ഇന്ത്യയുടേയും ചൈനയുടെയും സമ്പദ് വ്യവസ്ഥ ഏതാണ്ട് ഒരു പോലെയായിരിന്നു. പിന്നീട് പടി പടിയായാണ് ചൈന ഈ നിലയിലെത്തിയത്. അത്തരത്തില്‍ ലോക സാമ്പത്തിക ശക്തി ആകാനുള്ള ഒരു മാറ്റത്തിലേക്കൂടെ കടന്നു പോകാന്‍ ശ്രമിക്കുകയാണ് ഇന്ത്യ. മെയ്ക് ഇന്‍ ഇന്ത്യ പദ്ധതിയിലൂടെയും ആത്മനിര്‍ഭര്‍ ഭാരത്തിലൂടെയും നമ്മള്‍ സ്വയം പര്യാപ്തതയിലേക്കു പോയ്‌കൊണ്ടിരിക്കുകയാണ്. ചില സ്വയം പ്രഖ്യാപിത ബുദ്ധി ജീവികള്‍ പറയുന്ന പോലെ സ്വിച്ചിട്ട പോലെ എല്ലാം നന്നാവുകയൊന്നും ഇല്ല . അതിനു സമയം എടുക്കും. നന്നാക്കാന്‍ ഒരുപാടുണ്ടെന്നു നമുക്ക് അറിയാവുന്നതാണല്ലോ.

എന്നാല്‍ അതിന്റെ ലക്ഷണങ്ങളൊക്കെ കാണിച്ചു തുടങ്ങിയിട്ടുണ്ട്. വിദേശ നിക്ഷേപത്തിന്റെ കാര്യത്തില്‍ റെക്കോര്‍ഡ് വര്‍ധനയാണ് നമ്മള്‍ 2019 ല്‍ രേഖപ്പെടുത്തിയത്. വിദേശ നിക്ഷേപത്തിന്റെ കാര്യത്തില്‍ 12-ാം സ്ഥാനത്തുണ്ടായിരുന്ന നാം ഒന്‍പതാം സ്ഥാനത്തു എത്തിയിരുന്നു 2019ല്‍. മുന്‍ വര്‍ഷത്തെ അപേക്ഷിച്ചു 20 ശതമാനം വര്‍ധിച്ചു 51 ബില്യണ്‍ ഡോളര്‍ ആയിരിന്നു നമ്മുടെ വിദേശ നിക്ഷേപം. എന്നാല്‍ 2020 ഇല്‍ കോവിഡ് മഹാമാരിയുടെ പശ്ചാത്തലത്തിലും നമുക്ക് ആഹ്ലാദിക്കാവുന്ന കാര്യങ്ങള്‍ ആണ് കൂടുതലും നമ്മുടെ ചുറ്റും നടന്നു കൊണ്ടിരിക്കുന്നത്. ഇന്ത്യ, ജപ്പാന്‍, ഓസ്‌ട്രേലിയ എന്നിവര്‍ ചേര്‍ന്നുണ്ടാകുന്ന സാമ്പത്തിക സഖ്യത്തിലൂടെ ഉല്‍പാദന ശൃംഖല ചൈനയില്‍ നിന്നും മാറ്റി ഈ മൂന്ന് രാജ്യങ്ങളിലാണ് കേന്ദ്രീകരിക്കാന്‍ പോകുന്നത്. ഇതു നടപ്പിലാകുന്നതിലൂടെ തൊഴില്‍ മേഖലയില്‍ ഒരു കുതിച്ചു ചാട്ടം പ്രതീക്ഷിക്കാവുന്നതാണ് . സ്വയം പര്യാപ്തവും ആത്മ നിര്‍ഭരവുമാകട്ടെ ഭാരതം.