പുല്വാമ ഭീകരാക്രമണത്തില് കുറ്റപത്രം സമര്പ്പിച്ചു; കുറ്റപത്രം സമര്പ്പിക്കുന്നത് ഒന്നര വര്ഷങ്ങള്ക്ക് ശേഷം; മുഖ്യ സൂത്രധാരന് ജെയ്ഷേ മുഹമ്മദ് തലവന് മസൂദ് അസ്ഹറിന്റെ പേര് കുറ്റപത്രത്തിലുണ്ട്; പാകിസ്ഥാന്റെ പങ്കും വ്യക്തം
രാജ്യത്തെ നടുക്കിയ പുല്വാമ ഭീകരാക്രമണത്തില് എന്ഐഎ കുറ്റപത്രം സമര്പ്പിച്ചു. ജമ്മുവിലെ എന്ഐഎ കോടതിയിലാണ് 13500 പേജുകളുള്ള കുറ്റപത്രം സമര്പ്പിച്ചത്. കുറ്റപ്പത്രത്തില് ചാവേറായ പുല്വാമ സ്വദേശി ആദില് അഹ്മദ്ര് അടക്കം 19 പേരെയാണ് പ്രതി ചേര്ത്തിയിട്ടുള്ളത്. ജെയ്ഷേ മുഹമ്മദ് തലവന് മസൂദ് അസ്ഹര്, സഹോദരന് റഫു അസ്ഹര് എന്നിവരുടെ പേരുകളും കുറ്റപ്പത്രത്തില് ഉള്പ്പെടുത്തിയിട്ടുണ്ട്. പാകിസ്ഥാന്റെ പങ്കിനെക്കുറിച്ചും വ്യക്തമാക്കിയിട്ടുള്ളതായിട്ടാണ് റിപ്പോര്ട്ടുകള്.
ജയ്ഷെ മുഹമ്മദ് തലവന് മസൂദ് അസ്ഹറും സഹോദരന് റൗഫ് അസ്ഹറുമാണ് പുല്വാമ ഭീകരാക്രമണത്തിന്റെ മുഖ്യ സൂത്രധാരന്മാരെന്ന് എന്ഐഎ കണ്ടെത്തിയിരിക്കുന്നത്.ഭീകരാക്രമണത്തിന്റെ ആസൂത്രണവും നിര്വഹണവും എങ്ങനെയായിരുന്നെന്നു കുറ്റപത്രത്തില് വിശദീകരിച്ചിട്ടുണ്ടെന്നും സൂചനയുണ്ട്. 2019 ഫെബ്രുവരി നാലിനാണ് കശ്മീരിലെ പുല്വാമയില് സിആര്പിഎഫ് വാഹനവ്യൂഹത്തിനു നേരേ പാക്ക് ഭീകരസംഘടന ജയ്ഷെ മുഹമ്മദ് ചാവേറാക്രമണം നടത്തിയത്. 40 ജവാന്മാരാണ് അന്നു വീരമൃത്യു വരിച്ചത്. ഗൂഢാലോചന നടത്തിയവര്, ഭീകരവാദ പ്രവര്ത്തനങ്ങളുമായി ബന്ധപ്പെട്ട് വിവിധ ഇടങ്ങളിലായി കൊല്ലപ്പെട്ടവര് എന്നിവരുള്പ്പെടെ 20 പേര്ക്കെതിരെ കുറ്റം ചുമത്തിയിട്ടുണ്ടെന്നാണ് റിപ്പോര്ട്ട്.
പുല്വാമ ആക്രമണത്തിനു ശേഷം സുരക്ഷാ ഉദ്യോഗസ്ഥരുമായുള്ള ഏറ്റുമുട്ടലില് കൊല്ലപ്പെട്ട ജയ്ഷെ കമാന്ഡര് ഉമര് ഫറൂക്കിന്റെ വാട്സാപ് സന്ദേശങ്ങള്, കോള് റെക്കോര്ഡിങ്ങുകള് എന്നിവയുടെ അടിസ്ഥാനത്തിലാണ് കുറ്റപത്രം തയാറാക്കിയിരിക്കുന്നത്. ആര്ഡിഎക്സ് ഉള്പ്പെടെയുള്ള സ്ഫോടകവസ്തുക്കള് കയറ്റിയയച്ചതുമായി ബന്ധപ്പെട്ട നിര്ണായക വിവരങ്ങള് ഇവയില് നിന്നു ലഭിച്ചതായാണ് വിവരം. പുല്വാമ ഭീകരാക്രമണത്തെ പ്രകീര്ത്തിക്കുന്ന മസൂദ് അസ്ഹറിന്റെ ശബ്ദ സന്ദേശങ്ങളും വിഡിയോകളും കുറ്റപത്രത്തിലുണ്ട്. 'നൂറ് ഇന്ത്യന് ഹിന്ദു സൈനികരെ ഇല്ലാതാക്കി' എന്ന് ആക്രമണത്തിനു പിന്നാലെ ജയ്ഷെ മുഹമ്മദിന്റെ ടെലഗ്രാം ഗ്രൂപ്പില് വന്ന സന്ദേശവും ഇതില് ഉള്പ്പെടുന്നതായാണ് വിവരം.
26/11 മുംബൈ ഭീകരാക്രമണം ഉള്പ്പെടെ നിരവധി കേസുകളില് ഇന്ത്യ തേടുന്ന ഭീകരനാണ് മസൂദ് അസ്ഹര്. പുല്വാമയില് ആക്രമണം നടത്തിയ ചാവേര് ആദില് അഹമ്മദ് ദാര് ആണ് പ്രതിപട്ടികയിലുള്ള മറ്റൊരാള്. ഭീകരാക്രമണത്തിനുള്ള ബോംബുകള് എത്തിച്ച ഉമര് ഫറൂഖ്, ആക്രമണത്തിന് ഉപയോഗിച്ച കാര് ഓടിച്ച ഷാക്കിര് ബഷീര് മാഗ്രേ (കാര് ആക്രമണ സ്ഥലത്തു നിന്ന് 500 മീറ്റര് അകലയാണ് നിര്ത്തിയിട്ടത്), പാക്ക് ഭീകരരെ കശ്മീരില് എത്തിച്ചെന്ന് കരുതുന്ന മുഹമ്മദ് ഇക്ബാല് റാത്തര് (ഇയാളെ ജൂലൈയില് എന്ഐഎ അറസ്റ്റു ചെയ്തു), ജയ്ഷെ ഭീകരര്ക്ക് ഫോണുകള് എത്തിച്ചു നല്കിയെന്ന് കരുതുന്ന ബിലാല് അഹമ്മദ് കുചെ, മുഹമ്മദ് അബ്ബാസ് റാത്തെര്, വൈസ് ഉല് ഇസ്ലാം, താരിഖ് അഹമ്മദ് ഷാ, ഇന്ഷ ജാന് എന്നിവരാണ് പ്രതിപ്പട്ടികയിലെ മറ്റുള്ളവര്.
ഇതില് ഉമര് ഫറൂഖ് ഈ വര്ഷം മാര്ച്ചില് നടന്ന ഒരു ഏറ്റുമുട്ടലില് കൊല്ലപ്പെട്ടിരുന്നു. സ്ഫോടക വസ്തുക്കള് നിര്മിക്കുന്നതിനായി ഗ്ലൗസ്, ബാറ്ററി, അമോണിയം പൗഡര് എന്നിവ ഒരു ഓണ്ലൈന് പോര്ട്ടല് വഴി സംഘടിപ്പിച്ചതും കാര് ഓടിച്ച ഷാക്കിര് ബഷീര് ആണെന്നാണ് നിഗമനം. ആക്രമണം കഴിഞ്ഞ് ആറു ദിവസത്തിനു ശേഷമാണ് കശ്മീര് പൊലീസില്നിന്ന് അന്വേഷണം എന്ഐഎ ഏറ്റെടുക്കുന്നത്. കേന്ദ്ര ആഭ്യന്തര മന്ത്രാലയത്തിന്റെ നിര്ദേശപ്രകാരമാണു കേസ് എന്ഐഎയ്ക്കു കൈമാറിയത്. 14ന് ആക്രമണമുണ്ടായതിനു പിന്നാലെ സ്ഥലത്തെത്തിയ പത്തംഗ എന്ഐഎ സംഘം തെളിവുകള് ശേഖരിച്ചിരുന്നു. പിന്നാലെ, പുല്വാമയ്ക്കു സമീപം ലെത്പൊരയില് സൈന്യവും ഭീകരരും തമ്മില് ഏറ്റുമുട്ടലുണ്ടായ പ്രദേശത്തും തെളിവെടുപ്പു നടത്തിയശേഷമാണ് കേസ് ഏറ്റെടുക്കാന് എന്ഐഎ തീരുമാനിച്ചത്.
ഭീകരാക്രമണത്തിന് ഉപയോഗിച്ച സ്ഫോടകവസ്തു, ആക്രമണത്തിനു മുന്പ് ജയ്ഷെ മുഹമ്മദ് ഭീകരര് നടത്തിയ തയാറെടുപ്പുകള്, പാക്കിസ്ഥാന്റെ പങ്ക്, ഭീകരര്ക്കു പ്രദേശവാസികളില്നിന്നു ലഭിച്ച പിന്തുണ, ഇന്റലിജന്സ് വീഴ്ച എന്നിവയാണു മുഖ്യമായും എന്ഐഎ അന്വേഷിച്ചത്. പുല്വാമ ഭീകരാക്രമണത്തിന്റെ ഏകോപനം നിര്വഹിച്ചത് ഇരുപത്തിമൂന്നുകാരനും ഇലക്ട്രീഷ്യനുമായ ജയ്ഷെ മുഹമ്മദ് ഭീകരന് മുദസിര് അഹമ്മദ് ഖാന് ആണെന്ന് വ്യക്തമായിരുന്നു. ഇയാളെ പിന്നീട് ഏറ്റുമുട്ടലില് വധിച്ചു. സംഭവത്തില് അന്വേഷണമാരംഭിച്ച് ഒന്നര വര്ഷത്തിന് ശേഷമാണ് ദേശീയ അന്വേഷണ ഏജന്സി കേസില് കുറ്റപ്പത്രം സമര്പ്പിക്കുന്നത്.
https://www.facebook.com/Malayalivartha