ഈ ജനപ്രതിനിധിയുടെ പ്രതിഫലത്തിന്റെ നല്ലൊരു പങ്ക് ചെലവാകുന്നത് ശരീരം തളര്ന്ന ഒരമ്മയ്ക്കും മകനും താങ്ങും തണലുമാകാന്...
മനിശ്ശേരി ആറംകുളം പൂവത്തിങ്കല് പുത്തന്പുരയില് പരേതനായ ജോര്ജ് ജോസഫിന്റെ ഭാര്യ പത്തനംതിട്ട തുമ്പമണ് സ്വദേശി ജോയ്സ് ജോര്ജിനും (83) മകന് ലാല് ജോര്ജിനും (42) ബിജെപി നേതാവ് ആറംകുളം ചക്കമലയത്തു സുബ്രഹ്മണ്യന് ജനപ്രതിനിധി മാത്രമല്ല, ദൈവിക സുരക്ഷയുടെ ആള്രൂപമാണ്.
2 വര്ഷം മുന്പാണ് ജോയ്സിന് പക്ഷാഘാതം ബാധിച്ച് വലതുവശം തളര്ന്നത്. ഇതിനു പിന്നാലെ, ഒറ്റപ്പാലത്ത് തയ്യല്ക്കട നടത്തിയിരുന്ന മകനും തളര്ന്നുവീണു. അമ്മയ്ക്ക് എഴുന്നേല്ക്കാനും നടക്കാനുമെല്ലാം പരസഹായം വേണം. അമ്മയുടെ മൂത്തമകന് ക്രിസ്റ്റി ജോര്ജും കുടുംബവും മണിപ്പൂരിലാണ്. വീട്ടില് പരിചരണത്തിനു വന്നിരുന്ന സഹായി കോവിഡ്കാലം തുടങ്ങിയതോടെ വരവു നിര്ത്തിയപ്പോഴാണു സുബ്രഹ്മണ്യന് കാവലും കരുതലുമായി ഇവര്ക്കു കൂട്ടായത്. സുബ്രഹ്മണ്യന് മൂന്നു മാസമായി രാത്രി സ്വന്തം വീട്ടിലല്ല ഉറക്കം, ഈ അമ്മയ്ക്കും മകനും ഒപ്പമാണ്.
മരപ്പണിക്കാരനായിരുന്നു സുബ്രഹ്മണ്യന് (54). ശസ്ത്രക്രിയയ്ക്കു ശേഷം ഭാരിച്ച ജോലികള് പറ്റാതായ കാലത്താണു തിരഞ്ഞെടുപ്പില് മത്സരിച്ചു ജയിച്ചത്. ഈ വാണിയംകുളം പഞ്ചായത്ത് അംഗത്തിന്റെ പ്രതിഫലത്തിന്റെ നല്ലൊരു പങ്ക് അദ്ദേഹം ഈ അമ്മയ്ക്കും മകനുമായി ചെലവഴിക്കുന്നു. സ്വന്തം വീട്ടിലെ ചെലവു നീങ്ങുന്നതു സ്വകാര്യ ആശുപത്രിയില് തൂപ്പുകാരിയായ ഭാര്യയുടെ വരുമാനം കൊണ്ടാണ്.
ദിവസവും രാവിലെ ഭക്ഷണം പാകം ചെയ്തു കൊടുക്കുന്നതും മരുന്നുകള് കഴിപ്പിക്കുന്നതും വീടു വൃത്തിയാക്കുന്നതും വസ്ത്രങ്ങള് അലക്കിക്കൊടുക്കുന്നതുമെല്ലാം സുബ്രഹ്മണ്യന് തന്നെ. ഭാര്യയോടും മക്കളോടും കട്ടന്ചായ കുടിച്ചാല് മതിയെന്നു പറഞ്ഞ്, വീട്ടിലേക്കു വാങ്ങുന്ന പാല് ജോയ്സിനും ലാലിനുമുള്ള മരുന്നിനെടുക്കും. സേവാഭാരതിയുടെ സഹായങ്ങള് ഇവര്ക്കു വാങ്ങിക്കൊടുക്കുന്നു.
ജോയ്സിന്റെ മകന് ലാല് ചികിത്സയിലൂടെ സ്വയം എഴുന്നേല്ക്കാനും വീടിനുള്ളില് നടക്കാനും പ്രാപ്തനായി. നഷ്ടപ്പെട്ടിരുന്ന സംസാരശേഷി വീണ്ടെടുത്തു തുടങ്ങിയിട്ടുണ്ട്.
https://www.facebook.com/Malayalivartha