ശബരിമലയിലേക്കുള്ള കാനനപാത കൈയേറി ഹാരിസണ്‍ മലയാളം പ്ലാന്റേഷന്‍. കേരളത്തില്‍ നിയമവിരുദ്ധമായി ഏക്കറുക്കണക്കിന് ഭൂമിയാണ് ഹരിസണ്‍ മലയാളം പ്ലാന്റേഷന്‍ എന്ന ഈ ബ്രട്ടീഷ് കമ്പനി കൈയേറിക്കുന്നത്. ഇതിന് പുറമേയാണ് ഇപ്പോള്‍ മകരവിളക്കിന് അയ്യപ്പന് ചാര്‍ത്താനുള്ള തിരുവാഭരണങ്ങളുമായി പന്തളം കൊട്ടാരത്തില്‍ നിന്ന് ശബരിമല സന്നിധാനത്തേക്ക് പുറപ്പെടുന്ന ഘോഷയാത്രയ്ക്കുള്ള പാത ഇവര്‍ കൈയേറിരിക്കുന്നത്. കൈയേറിയ പാത ഹാരിസണ്‍ ഗ്രൂപ്പ് ഇരുമ്പുഗേറ്റിട്ടു പൂട്ടി. റാന്നി പെരുനാട് വില്ലേജിലെ പുതുക്കട മുതല്‍ ളാഹ വരയുള്ള തിരുവാഭരണ പാതയാണ് പൂട്ടിയത്. ഇതുമൂലം പുതുക്കട മുതല്‍ ളാഹ വരയുള്ള തിരുവാഭരണ പാതയിലൂടെയുള്ള യാത്ര പൂര്‍ണ്ണമായും തടസ്സപ്പെട്ടു. ഈ പ്രദേശത്ത് ഹാരിസണ്‍ കൈവശം വച്ചിരിക്കുന്ന എസ്‌റ്റേറ്റിന്റെ ഉള്ളിലൂടെയാണ് പാത കടന്നു പോകുന്നത്. ഇവിടെ മൂന്നു സ്ഥലങ്ങളിലാണ് പാത ഇത്തരത്തില്‍ ഇരുമ്പു ഗേറ്റിട്ടു മറച്ചിരിക്കുന്നത്. സ്ഥിരം സംവിധാനം എന്ന നിലയിലാണ് ഗേറ്റുകളുടെ നിര്‍മാണം.

പന്തളം കൊട്ടാരം മുതല്‍ ശബരിമല സന്നിധാനം വരെ തിരുവാഭരണ പാതക്കായി പ്രത്യേകം സ്ഥലം അളന്നു തിട്ടപ്പെടുത്തിട്ടുള്ളതാണ്. പുതുക്കട, വയറന്‍ മരുതി, തേവര്‍വേലില്‍ സ്‌കൂളിന് സമീപത്തു നിന്ന് എസ്‌റേറ്റിലേക്കു കയറുകയും, ഇരുമ്പുട്ടാന്‍തോട്ടില്‍ എത്തി ശബരിമല പാത കടന്ന് വീണ്ടും എസ്‌റ്റേറ്റിലൂടെ കയറി ളാഹ ആശുപത്രിക്കു സമീപം ളാഹ മുത്താരമ്മന്‍ കോവില്‍ എത്തുന്ന രീതിയിലാണ് തിരുവാഭരണപാതയിലുള്ളത്. 8 മീറ്റര്‍ വീതിയും, 3005 മീറ്റര്‍ നീളവുമാണ് ഈ പ്രദേശത്തെ പാതക്ക്. ഇങ്ങനെ തിട്ടപ്പെടുത്തി വച്ചിരിക്കുന്ന പരമ്പരാഗത പാതയില്‍ യാതൊരു വിധത്തിലുള്ള കയ്യേറ്റമോ തടസ്സങ്ങളോ പാടില്ലാത്താണ്. ഈ വ്യവസ്ഥയാണ് ഇപ്പോള്‍ തെറ്റിച്ചിരിക്കുന്നത്.

ആകെ 495 കയ്യേറ്റങ്ങളാണ് തിരുവാഭരണ പാതയില്‍ സ്ഥിരീകരിച്ചിട്ടുള്ളത്. ഇതിനു പുറമെ പുതുതായി 127 കയ്യേറ്റങ്ങളും റിപ്പോര്‍ട്ട് ചെയ്യപ്പെട്ടിട്ടുണ്ട്. ഈ കയ്യേറ്റങ്ങള്‍ ഒഴിപ്പിച്ച് അതാത് പഞ്ചായത്തുകള്‍ക്ക് സ്ഥലം കൈമാറണമെന്നാണ് ഉന്നതതല തീരുമാനം. എന്നാല്‍ കയ്യേറ്റങ്ങള്‍ ഒഴിപ്പിക്കാന്‍ ഇതുവരെ റവന്യു വകുപ്പ് തയ്യാറായിട്ടില്ല. ഇതിനെതിരെ തിരുവാഭരണ പാത സംരക്ഷണ സമിതി ഹൈക്കോടതിയില്‍ റിട്ട് ഹര്‍ജി ഫയല്‍ ചെയ്തിരുന്നു. കേസ് പരിഗണിച്ച കോടതി ജില്ലാ ഭരണകൂടം കൊടുത്ത കയ്യേറ്റങ്ങളുടെ പട്ടികയിലെ അപാകത കണ്ടെത്തിയിരുന്നു. കയ്യേറ്റങ്ങളെല്ലാം ഒഴിപ്പിച്ചെന്ന് ജില്ലാ ഭരണകൂടം കോടതിയെ അറിയിച്ചെങ്കിലും അഞ്ച് ശതമാനം കയ്യേറ്റം മാത്രമാണ് ഇതുവരെ ഒഴിപ്പിച്ചതെന്ന് തിരുവാഭരണ പാത സംരക്ഷണ സമിതി പറയുന്നത്. ഇത് സ്ഥിരീകരിക്കുന്നതിനായി കോടതി ചീഫ് സെക്രട്ടറിയില്‍ നിന്നും വിവരങ്ങള്‍ ആരാഞ്ഞിരിക്കുകയാണ്.

ഹാരിസണ്‍ മലയാളം െ്രെപവറ്റ് ലിമിറ്റഡ് നേരത്തെയും തിരുവാഭരണ പാത ഇരുമ്പു ഗേറ്റിട്ടു തടസ്സപ്പെടുത്തിയിരുന്നു. അന്ന് ഭക്തര്‍ സമരം നടത്തിയതിനെ തുടര്‍ന്നാണ് തടസ്സം നീക്കിയത്.സര്‍ക്കാരിന്റെ പതിനായിരകണക്കിന് ഏക്കര്‍ ഭൂമി അനധികൃതമായി കൈവശപ്പെടുത്തിയിരിക്കുന്ന ഹാരിസണ്‍ കമ്പനിക്കെതിരെ തണുപ്പന്‍ സമീപനമാണ് റവന്യു വകുപ്പും സ്വീകരിക്കുന്നത്.തിരുവാഭരണ പാതയില്‍ കമ്പനി നടത്തുന്ന ഇടപെടലുകള്‍ക്കെതിരെ കണ്ണടയ്ക്കുന്ന സമീപനമാണ് ഉദ്യോഗസ്ഥര്‍ സ്വീകരിക്കുന്നത്.

ശബരിമല വിമാനത്താവളത്തിന്റെ മറവില്‍ ചെറുവള്ളി എസ്റ്റേറ്റ് കൈയേറി വച്ചിരുന്ന ഭൂമി വിലകൊടുത്തുവാങ്ങാന്‍ സര്‍ക്കാര്‍ തീരുമാനിച്ചിരുന്നു. ഇത് ഹാരിസണ്‍ മലയാളം, കണ്ണന്‍ദേവന്‍ തുടങ്ങി കമ്പനികള്‍ നിയമവിരുദ്ധമായി കൈവശം വച്ചിരിക്കുന്ന ലക്ഷക്കണക്കിന് ഏക്കര്‍ ഭൂമി അവര്‍ക്ക് സ്വന്തമാക്കാന്‍ സഹായിക്കുന്നതിന് വേണ്ടിയാണെന്ന ആരോപണം നേരത്തെ ഉയര്‍ന്നിരുന്നു. ഹാരിസണിന്റെ നീക്കവും ഇതിനെ മറയാക്കിയുള്ളതാണ്. ഭക്തരുടെ ആവശ്യം മനസിലാക്കി സര്‍ക്കാര്‍ അവരില്‍ നിന്നും പരമ്പാരഗത കാനന പാത വിലകൊടുത്ത് വാങ്ങാന്‍ തയ്യാറായാല്‍ പാത ഒഴികെയുള്ള സ്ഥലം അവര്‍ക്ക് തങ്ങളുടെതാണെന്ന് സ്ഥാപിക്കാനും സ്ഥാപിക്കും. ഇതാണ് ഈ ഗുഢനിക്കത്തിന് പിന്നിലെന്നാണ് വിലയിരുത്തപ്പെടുന്നത്.