ബി.ജെ.പിയെ സംബന്ധിച്ച് ഏറ്റവും അധികം പ്രതീക്ഷവയ്ക്കുന്ന ജില്ലയാണ് തിരുവനന്തപുരം. ഇനി പ്രധാനമന്ത്രി നരേന്ദ്രമോദി തിരുവനന്തപുരം സന്ദര്‍ശിക്കുമ്പോള്‍ സ്വീകരിക്കാന്‍ മുന്നില്‍ ഒരു ബി.ജെ.പി മേയര്‍ ഉണ്ടാകണമെന്ന ലക്ഷ്യത്തോടെയാണ് തിരുവനന്തപുരം കോര്‍പ്പറേഷനിലേക്ക് ബി.ജെ.പി മുന്നൊരുക്കങ്ങള്‍ നടത്തിയത്. വോട്ടെടുപ്പിന് ഒരാഴ്ച മാത്രം അവശേഷിക്കേ അവസാനവട്ട തന്ത്രങ്ങളൊരുക്കി പ്രചാരണത്തില്‍ മുന്നിലെത്താന്‍ ബി.ജെ.പിക്ക് സാധിക്കുന്നതും അതുകൊണ്ടു തന്നെയാണ്. മുന്‍ കാലങ്ങളില്‍ നിന്നു വ്യത്യസ്തമായി ഇത്തവണ ബി.ജെ.പിയുടെ മുന്‍നിര നേതാക്കള്‍ തദ്ദേശ തെരഞ്ഞെടുപ്പില്‍ മത്സരിച്ചുവെന്ന പ്രത്യേകതയും ഈ തെരഞ്ഞെടുപ്പിനുണ്ട്. ഇത് തിരുവനന്തപുരം കോര്‍പ്പറേഷനിലുള്‍പ്പെടെ ജില്ലയില്‍ ഭൂരിഭാഗം സ്ഥലത്തും ശക്തമായ ത്രികോണ മത്സരത്തിലേക്ക് കാര്യങ്ങള്‍ എത്തിച്ചു.

വിജയിക്കുന്നതിനുള്ള രാഷ്ട്രീയ, സാമൂഹിക, സാമുദായിക അടിയൊഴുക്കുകള്‍ തങ്ങള്‍ക്കനുകൂലമാക്കാനുള്ള ശ്രമത്തിലാണ് മുന്നണി നേതൃത്വങ്ങള്‍. അണിയറയില്‍ അതിലേക്കുള്ള തന്ത്രങ്ങളൊരുക്കി പോരാട്ടം വിജയത്തിലെത്തിക്കാനുള്ള നീക്കമാണ് ഇനിയുള്ള ദിവസങ്ങളില്‍. തിരുവനന്തപുരം കോര്‍പ്പറേഷനില്‍ പ്രത്യേകം പ്രകടനപത്രികയുമായാണ് മുന്നണികള്‍ മത്സരത്തിനെത്തുന്നത്. കോര്‍പ്പറേഷനിലെ സ്ഥാനാര്‍ഥി സംഗമത്തിലൂടെ കൊറോണക്കാലത്ത് ശക്തിപ്രകടനത്തിനും മുന്നണികള്‍ തയ്യാറാകുന്നുണ്ട്. കോവിഡ് മാനദണ്ഡങ്ങള്‍ ലംഘിച്ചാണ് ഈ ദിവസങ്ങളില്‍ പ്രചാരണം. ആള്‍ക്കൂട്ടങ്ങളുടെ അകമ്പടിയോടെയാണ് സ്ഥാനാര്‍ഥികളുടെ ഗൃഹസന്ദര്‍ശനം. പ്രചാരണത്തില്‍ തങ്ങളാണ് മുന്നിലെന്നുള്ള പ്രതീതി സൃഷ്ടിക്കലാണ് പ്രധാനം. സൗഹൃദങ്ങളും പരിചയങ്ങളും വോട്ടാക്കി മാറ്റാനുള്ള തിരക്കാണ് ഇനിയുള്ള ദിവസങ്ങളില്‍. പ്രചാരണം അന്തിമഘട്ടത്തിലെത്തിയതോടെ പ്രമുഖ നേതാക്കളും രംഗത്തിറങ്ങുകയാണ്. സ്ഥാനാര്‍ഥികളെല്ലാം രണ്ടും മൂന്നും തവണ ഭവനസന്ദര്‍ശനം പൂര്‍ത്തിയാക്കിക്കഴിഞ്ഞു.

ദേശീയ, സംസ്ഥാന രാഷ്ട്രീയ സംഭവവികാസങ്ങളാണ് തിരഞ്ഞെടുപ്പിന്റെ പ്രധാന പ്രചാരണവിഷയങ്ങളായി ഇപ്പോള്‍ നിറഞ്ഞുനില്‍ക്കുന്നത്. എന്നാല്‍, അടിത്തട്ടില്‍ പ്രദേശിക വികസനവിഷയങ്ങളും വ്യക്തിഗത നേട്ടങ്ങളും സാമൂഹിക, സാമുദായിക പരിഗണനകളും പ്രധാനമാണ്. എല്ലായ്പ്പോഴും മാറിക്കൊണ്ടിരിക്കുന്ന ഈ സമവാക്യങ്ങള്‍ തങ്ങള്‍ക്കനുകൂലമാക്കാനുള്ള പ്രചാരണത്തിന്റെ ദിനങ്ങളാണ് ഇനി വരാനിരിക്കുന്നത്. സൈബര്‍ രംഗത്തും പ്രചാരണം കൂടുതല്‍ വാശിയിലാണ്. സ്ഥാനാര്‍ഥികളുടെ ഫോട്ടോഷൂട്ടുള്‍പ്പെടെ നടത്തി ചെറുവീഡിയോകള്‍ തയ്യാറാക്കി വാട്സ് ആപ്പ് ഗ്രൂപ്പുകളിലൂടെ പ്രചാരണം ശക്തമാണ്. എതിരാളികളുടെ വീഴ്ചകളും സൈബറിടത്തില്‍ പ്രചാരണവിഷയമാണ്.

മുഖ്യമന്ത്രിയുള്‍പ്പെടെയുള്ളവര്‍ അടുത്ത ദിവസങ്ങളില്‍ എല്‍.ഡി.എഫിനായി പ്രചാരണത്തിനെത്തും. തിരുവനന്തപുരം കോര്‍പ്പറേഷനില്‍ മന്ത്രി കടകംപള്ളി സുരേന്ദ്രന്റെ നേതൃത്വത്തിലാണ് എല്‍.ഡി.എഫ്. പ്രചാരണം. സി.പി.എം. സംസ്ഥാന സെക്രട്ടറി എ.വിജയരാഘവനും പ്രചാരണരംഗത്തുണ്ട്. മുന്‍ മുഖ്യമന്ത്രി ഉമ്മന്‍ചാണ്ടി, പ്രതിപക്ഷനേതാവ് രമേശ് ചെന്നിത്തല, കെ.പി.സി.സി.പ്രസിഡന്റ് മുല്ലപ്പള്ളി രാമചന്ദ്രന്‍ തുടങ്ങിയവരൊക്കെ ജില്ലയിലെല്ലായിടത്തും യു.ഡി.എഫ്. പ്രചാരണത്തിന്റെ മുന്‍നിരയിലുണ്ട്. ഗ്രാമങ്ങളിലെ പ്രചാരണരംഗത്ത് കൂടുതല്‍ സജീവമാവുകയാണ് യു.ഡി.എഫ്. നേതാക്കള്‍. അടുത്തദിവസങ്ങളില്‍ കൂടുതല്‍ സമ്മേളനങ്ങള്‍ നടത്താനാണ് യു.ഡി.എഫ്. തീരുമാനം. കേന്ദ്രമന്ത്രി വി.മുരളീധരന്‍, ബി.ജെ.പി. സംസ്ഥാന പ്രസിഡന്റ് കെ.സുരേന്ദ്രന്‍ എന്നിവരുടെ നേതൃത്വത്തിലാണ് എന്‍.ഡി.എ.യുടെ പ്രചാരണം. സുരേഷ് ഗോപിയെപ്പോലുള്ള താരപ്രചാരകരെയും രംഗത്തിറക്കിയുള്ള കുടുംബയോഗങ്ങളിലാണ് ബി.ജെ.പി. ശ്രദ്ധ കേന്ദ്രീകരിക്കുന്നത്.