തമിഴ് നടന്‍ അരവിന്ദ് സ്വാമിയുടെ ആരധകർ ചെറുതൊന്നുമല്ല. നീണ്ട ഒരു ഇടവേളയ്ക്ക് ശേഷം തമിഴ് സിനിമാലോകത്തിലേക്ക് നടത്തിയ വമ്പൻ തിരിച്ചുവരവ് ഇരുകൈയും നീട്ടിയാണ് ആരാധകർ സ്വീകരിച്ചത്.

മണിരത്‌നത്തിന്റെ വളരെ മികച്ച കണ്ടെത്തലുകളില്‍ ഒരാളായ അരവിന്ദ് സ്വാമി ദളപതി, റോജ, ബോംബെ തുടങ്ങി നിരവധി സിനിമകളില്‍ ഭാഗമായെങ്കിലും ഇടക്കാലത്തു ഒരു താത്കാലിക ഇടവേളയെടുത്ത് സിനിമയില്‍ നിന്ന് വിട്ടുനിന്ന് ബിസിനസ്‌ മേഖലയിലേക്ക് ശ്രദ്ധതിരിച്ചു.

അരവിന്ദ് സ്വാമി കാര്യനിര്‍വ്വാഹകസംഘ കമ്പനിയായ ടാലെന്റ് മാക്സിമസ് എന്ന കമ്പനിയുടെ അദ്ധ്യക്ഷനാണ്.ചെന്നൈയിലാണ് താരം ജനിച്ചത്.

ചെന്നൈയിലെ ലോയോള കോളേജിലാണ് വിദ്യാഭാസം നടത്തിയത്.അതിന് ശേഷം എം.ബി.എ പഠിക്കുവാനായി അമേരിക്കയിലേക്ക് പോയി. 1994 ഗായത്രിയെ വിവാഹം ചെയ്തു 2010 ല്‍ ഇവർ വേര്‍പിരിഞ്ഞു. ഇരുവര്‍ക്കും രണ്ടു കുട്ടികളുണ്ട്.

ആ ബന്ധം അവസാനിപ്പിച്ചതിന് ശേഷം ഇദ്ദേഹം 2012 ല്‍ അപര്‍ണ്ണ എന്ന വ്യക്തിയെ കല്യാണം കഴിച്ചു. മണി രത്നം സംവിധാനം ചെയ്ത ദളപതി എന്ന ചിത്രത്തിലായിരുന്നു ആദ്യമായി അഭിനയിച്ചത്.

പിന്നീട് അദ്ദേഹം നായകനായി അഭിനയിച്ച ചിത്രം മണിരത്നം തന്നെ സംവിധാനം ചെയ്ത റോജയായിരുന്നു .ഈ ചിത്രം വലിയ വിജയമായിരുന്നു. ഈ ചിത്രത്തിലെ അഭിനയത്തോടെ ഒരു മികച്ച നടനെന്നുള്ള കഴിവ് അരവിന്ദ് സ്വാമി തെളിയിച്ചു.

എന്നാൽ അതിന് ശേഷം അദ്ദേഹം ചിത്രങ്ങൾ തിരഞ്ഞെടുത്തത് വളരെ ശ്രദ്ധയോടെയാണ്.അതിൽ വളരെ ശ്രദ്ധേയമാ‍യ ചിത്രങ്ങളായിരുന്നു റോജ , ബോംബെ , മിന്‍സാര കനവ്, ഇന്ദിര, ദേവരാഗം, അലൈപായുതെ എന്നിവ.

ഈ കൂട്ടത്തിൽ റോജ , ബോംബെ എന്നീ ചിത്രങ്ങള്‍ ധാരാളം പുരസ്കാരങ്ങള്‍ ലഭിച്ചവയാണ്. എന്നാൽ ഒരു ദുരന്തം എന്നോണം 2005ല്‍ വളരെ അപ്രതീക്ഷിതമായി ഉണ്ടായ ആക്‌സിഡന്റിനെ തുടര്‍ന്നു നട്ടെല്ലിന് ക്ഷതമേല്‍ക്കുകയും നാലഞ്ചു വര്‍ഷകാലം കിടപ്പിലാകേണ്ടിയും വന്നു…

പിന്നീട് മണിരത്‌നത്തിന്റെ പ്രോത്സാഹനവും പ്രചോദനവും മൂലം ഡയറ്റും വര്‍ക്ക്‌ഔട്ടും കൊണ്ട് സ്വാമി അടിമുടി മാറ്റത്തോടെ 2013ല്‍ കടല്‍ എന്ന സിനിമയിലൂടെ തിരിച്ചു വന്നു. തനിഒരുവന്‍, ബോഗന്‍, ചെക്കചിവന്തവാനം തുടങ്ങി റിലീസ് കാത്തിരിക്കുന്ന നരഗാസൂരനിലും,തലൈവിയിലും വരെ മികച്ചവേഷങ്ങള്‍ ചെയ്ത് എത്തിനില്‍ക്കുന്നു സ്വാമിയുടെ സിനിമജീവിതം.

തീവണ്ടിയുടെ സംവിധായകന്‍ പി. ഫെല്ലിനിയുടെ പുതിയ ചിത്രത്തില്‍ അരവിന്ദ് സ്വാമിയും കുഞ്ചാക്കോ ബോബനും പ്രധാനകഥാപാത്രങ്ങളെ അവതരിപ്പിക്കുന്നു.

ഒറ്റ് എന്ന് പേരിട്ടിരിക്കുന്ന ഈ ത്രില്ലര്‍ ചിത്രത്തിന്റെ തിരക്കഥ ഒരുക്കിയിരിക്കുന്നത് എസ്. സജീവാണ്. 25 വര്‍ഷങ്ങള്‍ നീണ്ട ഇടവേളയ്ക്ക് ശേഷമാണ് അരവിന്ദ് സ്വാമി മലയാളത്തിലെത്തുന്നത്. 1996 ല്‍ പുറത്തിറങ്ങിയ ദേവരാഗത്തിലായിരുന്നു ഏറ്റവും അവസാനമായി വേഷമിട്ടത്.