കഴിഞ്ഞ ദിവസമാണ് പഞ്ചാബില്‍ ഇന്ത്യന്‍ വ്യോമസേനയുടെ മിഗ്-21 വിമാനം തകര്‍ന്ന് വീണ് പൈലറ്റ് കൊല്ലപ്പെട്ടത്. സ്‌ക്വാഡ്രണ്‍ ലീഡര്‍ അഭിനവ് ചൗധരിയാണ് മരിച്ചത്. മകനെ നഷ്ടപ്പെട്ട അഭിനവ് ചൗധരിയുടെ പിതാവ് സതേന്ദ്ര ചൗധരിക്ക് സര്‍ക്കാരിനോട് പറയാനുള്ളത് ഇനിയെങ്കിലും ഇത്തരം കാലാഹരണപ്പെട്ട വിമാനങ്ങള്‍ പിന്‍വലിക്കണമെന്നാണ്. പഞ്ചാബിലെ മൊഗാ മേഖലയില്‍ പതിവ് പരിശീലന പറക്കലിനിടെയാണ് അഭിനവ് ചൗധരി പറത്തിയ മിഗ് വിമാനം അപകടത്തില്‍പ്പെട്ടത്.

കര്‍ഷകനാണ് സതേന്ദ്ര ചൗധരി. 'എനിക്ക് എല്ലാം നഷ്ടപ്പെട്ടു, ഇനിയെങ്കിലും കാലഹരണപ്പെട്ട വിമാനങ്ങള്‍ സര്‍ക്കാര്‍ പിന്‍വലിക്കണം. മറ്റുള്ളവരുടെ ജീവന്‍കൂടി ഇനിയും നഷ്ടപ്പെടരുത്. അവ നിര്‍ത്താന്‍ ഞാന്‍ സര്‍ക്കാരിനോട് കൂപ്പുകൈകളോടെ അഭ്യര്‍ത്ഥിക്കുന്നു'അദ്ദേഹം പറഞ്ഞു. അഭിനവിന്റെ അമ്മയ്ക്കും സഹോദരിക്കും ഭാര്യ സോണിക ചൗധരിക്കുമൊപ്പമാണ് സതേന്ദ്ര ചൗധരി ഇങ്ങനെ പറഞ്ഞത്.

2019 ഡിസംബറിലാണ് അഭിനവ് വിവാഹിതനായത്. മെയില്‍ അവധിക്ക് വീട്ടിലെത്താനിരുന്നതായിരുന്നു. എന്നാല്‍ കൊവിഡ് കാരണം അതിന് സാധിച്ചില്ല. കഴിഞ്ഞ കുറച്ചുവര്‍ഷങ്ങള്‍ക്കിടെ 14 ഓളം മിഗ് വിമാനങ്ങളാണ് തകര്‍ന്നത്. ഈ വര്‍ഷം മാത്രം മുന്ന് അപകടങ്ങളാണ് മിഗ് വിമാനങ്ങള്‍ ഉണ്ടാക്കിയത്.

മാര്‍ച്ചില്‍ നടന്ന അപകടത്തില്‍ ഗ്രൂപ്പ്് ക്യാപ്റ്റനായിരുന്ന എ ഗുപ്ത കൊല്ലപ്പെട്ടിരുന്നു. ഈ സംഭവത്തിലും എയര്‍ഫോഴ്സ് അന്വേഷണത്തിന് ഉത്തരവിട്ടിരുന്നു. അതിന് മുന്‍പ് ജനുവരിയില്‍ രാജസ്ഥാനിലെ സുറത്ത്ഗഡില്‍ മിഗ് 21 വിമാനം തകര്‍ന്നുവീണിരുന്നെങ്കിലും പൈലറ്റ് രക്ഷപ്പെട്ടിരുന്നു. ഇത് സംബന്ധിച്ച് ഒരു അന്വേഷണവും നടത്താത്തതെന്നും മിഗ് വിമാനങ്ങള്‍ മാത്രം തകരുന്നത് എന്തുകൊണ്ടൈന്നും അഭിനവിന്റെ ബന്ധുവും കര്‍ണാലിലെ ഡോക്ടറുമായ അനുജ് ടോകാസ് ചോദിച്ചു.

58 വര്‍ഷമായി ഇന്ത്യന്‍ വ്യോമസേനയുടെ ഭാഗമാണ് മിഗ് 21 വിമാനങ്ങള്‍. ലോകത്ത് ഏറ്റവും കൂടുതല്‍ നിര്‍മിക്കപ്പെട്ടിട്ടുള്ള സൂപ്പര്‍ സോണിക് ജെറ്റ് വിമാനമാണിത് മിഗ് 21. ഹ്രസ്വദൂര പരിധിയിലേക്കാണ് ഈ വിമാനങ്ങള്‍ കൂടുതലായി ഉപയോഗിക്കുന്നത്. ഭാരം കുറഞ്ഞ ഈ പോര്‍വിമാനത്തിന് അതിവേഗം ഉയരത്തിലേക്ക് പറക്കാനാകും. മണിക്കൂറില്‍ 2,230 ആണ് വേഗത. നാല് ആര്‍-60 കോമ്പാറ്റ് മിസൈലുകളെ മിഗ്-21 ന് വഹിക്കാനാകും.

മിഗ് 21 വിമാനങ്ങള്‍ കൂടുതല്‍ ഉപയോഗിക്കുന്ന മൂന്നാമത്തെ രാജ്യമാണ് ഇന്ത്യ. റഷ്യയില്‍ നിന്നാണ് ഈ പോര്‍വിമാനങ്ങള്‍ ഇന്ത്യ വാങ്ങിയത്. 1964-ല്‍ ഇന്ത്യന്‍ ഇവ ഇന്ത്യന്‍ സൈന്യത്തിന്റെ ഭാഗമായി. 173 പൈലറ്റുമാരും 40 സാധാരണക്കാരും ഇതുവരെ മിഗ് 21 അപകടങ്ങളില്‍ കൊല്ലപ്പെട്ടിട്ടുണ്ട്. 2013 ല്‍ മിഗ് പോര്‍വിമാനങ്ങള്‍ വാങ്ങിയതിന്റെ 50-ാം വാര്‍ഷികം രാജ്യം ആഘോഷിച്ചിരുന്നു.

പുത്തന്‍ സാങ്കേതികവിദ്യയ്ക്കു മുന്നില്‍ വേഗം കാലഹരണപ്പെടുന്നു എന്ന ആരോപണം മിഗ് 21 വിമാനങ്ങള്‍ നേരിടുന്നുണ്ട്. എന്നാല്‍ മിഗ് 21 ഇതിനെ അതിജീവിച്ചു കഴിവ് തെളിയിച്ചിട്ടുണ്ട്. 2019 ല്‍ വ്യോമാതിര്‍ത്തി കടന്ന് ബോംബാക്രമണം നടത്തിയ പാക്കിസ്ഥാന്റെ ആധുനിക എഫ് 16 യുദ്ധവിമാനത്തെ മിഗ് 21 വിമാനങ്ങള്‍ തകര്‍ത്ത് അതിന്റെ കഴിവ് തെളിയിച്ചതാണ്.

അന്ന് വിങ് കമാന്‍ഡര്‍ അഭിനന്ദന്‍ വര്‍ധമാന്‍ മിഗ് 21 വിമനത്തില്‍ നടത്തിയ പോരാട്ടം ലോകശ്രദ്ധ നേടിയിരുന്നു. മിഗ് 21 ബൈസനില്‍നിന്നു തൊടുത്ത ഹ്രസ്വദൂര എയര്‍ ടു എയര്‍ മിസൈല്‍ ആര്‍ 73 ആണ് എഫ് 16 വീഴ്ത്തിയത്. 63 വര്‍ഷംകൊണ്ട് 60 രാജ്യങ്ങളുടെ ആകാശക്കരുത്തിന്റെ പരസ്യമായ രഹസ്യം. ഇരുപതിലേറെ രാജ്യങ്ങളില്‍ ഇപ്പോഴും പ്രതിരോധക്കോട്ടയിലെ വിശ്വസ്തനായ പോരാളി. പഴയ സോവിയറ്റ് യൂണിയന്റെ സൃഷ്ടിയാണു മിഖോയന്‍ ഗുരേവിച്ച് മിഗ്21.