സി.ബി.ഐ ഡയറക്ടര്‍ ആരാകും എന്ന ചോദ്യം രാജ്യത്തിനൊപ്പം കേരളവും ഉറ്റുനോക്കുകയാണ്. ഇന്നലെ സിബിഐ ഡയറക്ടറെ തീരുമാനിക്കാന്‍ പ്രധാനമന്ത്രിയുടെ വസതിയില്‍ ചേര്‍ന്ന യോഗത്തില്‍ മൂന്നംഗ ചുരുക്കപട്ടികയ്ക്ക് രൂപം നല്‍കി. 12 അംഗ പട്ടികയാണ് ചുരുങ്ങി മൂന്നിലേക്ക് എത്തിയത്. ഇതോടെ കേരളത്തിലെ പൊലീസ് മേധാവി ലോക്‌നാഥ് ബെഹ്‌റ സാധ്യത പട്ടികയില്‍ നിന്നും പുറത്തായി. പ്രധാനമന്ത്രിക്ക് പുറമെ ചീഫ് ജസ്റ്റിസ് എന്‍ വി രമണ, ലോക്‌സഭയിലെ കോണ്‍ഗ്രസ് കക്ഷി നേതാവ് അധിര്‍ രഞ്ചന്‍ ചൗധരി എന്നിവര്‍ ഉള്‍പ്പെട്ട സമിതിയാണ് തീരുമാനം എടുത്ത്.

ബെഹ്‌റ സി.ബി.ഐ മേധാവി ആകില്ലെന്ന് ഉറപ്പായതോടെ മുഖ്യമന്ത്രി പിണറായി വിജയന്റെ ലാവ്‌ലിന്‍ കേസിലെ ഭാവിയാണ് ഏറെ ചര്‍ച്ചചെയ്യപ്പെടുന്നത്. വിശ്വസ്തന്‍ സി.ബി.ഐ മേധാവിയാകുമെന്ന വിശ്വാസത്തിന്‍ പൊലീസ് ഉപദേശ സ്ഥാനമെല്ലാം ബെഹ്‌റക്കുവേണ്ടി ഇതിനോടകം തന്നെ പിണറായി വിജയന്‍ ഒരുക്കിയിരുന്നു. ഇനി അതുകൊണ്ട് വലിയ പ്രയോജനമുണ്ടെന്ന് തോന്നുന്നില്ല.

ലാവ്ലിന്‍ കേസ് സുപ്രീം കോടതിയുടെ പരിഗണനയിലാണെങ്കിലും സി ബി ഐയുടെ നിലപാട് കേസില്‍ നിര്‍ണായകമാണ്. നിലവില്‍ കേസില്‍ പിണറായക്ക് എതിരാണ് സി.ബി.ഐ നിലപാട് എങ്കിലും ബെഹ്‌റ ഡയറക്ടറായാന്‍ അതിന് മാറ്റമുണ്ടാകുമെന്നാണ് പ്രതീക്ഷിച്ചത്. ഇതാണ് ഇപ്പോള്‍ അപ്രസക്തമായിരിക്കുന്നത്. ലാവ്ലിന്‍ കേസില്‍ കേരള ഹൈക്കോടതിയുടെ ഉത്തരവ് റദ്ദാക്കണമെന്നാണ് സി ബി ഐ ആവശ്യപ്പെടുന്നത്. പുതിയ ഡയക്ടര്‍ ഇനി ആര് ആരായാലും ആ നിലപാട് അങ്ങനെ തന്നെ തുടരുമെന്നകാര്യത്തില്‍ സംശയമില്ല.

ഒന്നാം പിണറായി സര്‍ക്കാരിന്റെ തുടക്കത്തിലാണ് ബഹ്റ സംസ്ഥാന പോലീസ് മേധാവിയായത്. സെന്‍കുമാറിനെ മാറിയാണ് ബെഹ്‌റയെ സുപ്രധാന തസ്തികയില്‍ കൊണ്ടുവന്നത്. പെരുമ്പാവൂര്‍ സ്വദേശിനി ജിഷയുടെ കൊലപാതകത്തിന്റെ കുറ്റം സെന്‍കുമാറിന്റെ തലയില്‍ കെട്ടി വച്ചിട്ടാണ് അദ്ദേഹത്തെ മാറ്റിയത്.

എന്നാല്‍ ബെഹ്റയെ നിയമിച്ചത് നരേന്ദ്രമോദി പറഞ്ഞിട്ടാണെന്ന് മുല്ലപ്പള്ളി രാമചന്ദ്രന്‍ ആരോപണം ഉന്നയിച്ചിരുന്നു. താന്‍ കേന്ദ്ര ആഭ്യന്തര സഹമന്ത്രിയായിരിക്കെ ബെഹ്റയും മോദിയും തമ്മിലുള്ള ബന്ധം നന്നായി അറിയാമെന്നും മുല്ലപ്പള്ളി ആരോപിച്ചിരുന്നു. എന്നാല്‍ പിന്നീട് സെന്‍കുമാര്‍ ബി ജെ പിയിലെത്തിയ വിചിത്രമായ കാഴ്ചയും കേരളം കണ്ടു.

ലോകനാഥ് ബഹ്റയെ മുഖ്യവിവരാവകാശ കമ്മിഷണറാക്കാന്‍ ഒരു ഘട്ടത്തില്‍ ഒന്നാം പിണറായി സര്‍ക്കാര്‍ ആലോചിച്ചിരുന്നു. എന്നാല്‍ പിണറായി തന്നെ അത് നിരുത്സാഹപ്പെടുത്തി. തനിക്ക് തുടര്‍ ഭരണം കിട്ടുമെന്നും വിഷമിക്കേണ്ടതില്ലെന്നും മുഖ്യമന്ത്രി തന്നെ ബെഹ്റയെ അറിയിച്ചു. എന്നാല്‍ ബെഹ്റ ഇക്കാര്യം വിശ്വസിച്ചില്ല. പക്ഷേ അതാണ് സംഭവിച്ചത്. സി ബി ഐ ഡയറക്ടര്‍ എപ്പോഴും കേന്ദ്ര സര്‍ക്കാരിന്റെ കൈയിലെ ചട്ടുകമായിരിക്കും. സി ബി ഐയെ ഉപയോഗിച്ചാണ് കേന്ദ്ര സര്‍ക്കാര്‍ സംസ്ഥാന സര്‍ക്കാരുകളെ വിരട്ടുന്നത്. ബംഗാളിലും മറ്റും ഇത്തരം കാഴ്ചകള്‍ നാം നിരന്തരം കാണുന്നു.

അതേസമയം പുതിയ ഡയക്ടര്‍ പട്ടിക തയ്യാറാക്കിയ രീതിക്കെതിരെ കോണ്‍ഗ്രസ് പ്രതിഷേധം രേഖപ്പെടുത്തി. ലോക്‌സഭ കക്ഷി നേതാവ് അധിര്‍രഞ്ജന്‍ ചൗധരി വിയോജനക്കുറിപ്പ് നല്‍കിയാണ് പ്രതിഷേധം അറിയിച്ചത്. അധികം വൈകാതെ തന്നെ സിബിഐ ഡയറക്ടറെ പ്രഖ്യാപിക്കുമെന്നാണ് വ്യക്തമാകുന്നത്. ആറുമാസത്തിന് താഴെ സര്‍വീസ് ഉള്ളവരെ നിയമിക്കരുത് എന്ന റുള്‍ പ്രധാനമന്ത്രിയുമായി നടത്തിയ ചര്‍ച്ചയില്‍ ചീഫ് ജസ്റ്റിസ് എന്‍ വി രമണ ഓര്‍മ്മപ്പെടുത്തി.

മഹാരാഷ്ട്ര മുന്‍ ഡി.ജി.പി സുബോദ് കുമാര്‍ ജയ്‌സ്വാള്‍, എസ്.എസ.ജി ഡയറക്ടര്‍ ജനറല്‍ ആയ കെ ആര്‍ ചന്ദ്ര, ആഭ്യന്തര മന്ത്രിലായത്തിന്റെ സ്‌പെഷ്യല്‍ സെക്രട്ടറി വി.എസ്.കെ കൗമുദി എന്നിവരാണ് അന്തിമ പട്ടികയില്‍ സ്ഥാനം പിടിച്ചത്. ഇവരില്‍ ആരാകും പുതിയ ഡയറക്ടറെന്ന് പ്രധാനമന്ത്രി ഉടന്‍ പ്രഖ്യാപിക്കുമെന്നാണ് പ്രതീക്ഷിക്കുന്നത്. സിബിഐ ഡയറക്ടറായിരുന്ന ആര്‍ കെ ശുക്ല വിരമിച്ചതോടെയാണ് തലപ്പത്ത് പുതിയെ ആളെത്തുന്നത്. നിലവില്‍ അഡിഷണല്‍ ഡയറക്ടറായ പ്രവീണ്‍ സിന്‍ഹയാണ് ചുമതല വഹിക്കുന്നത്.