18 മാസമുള്ളപ്പോള്‍ പിതാവ് അമ്മയില്‍ നിന്ന് മകനെ തട്ടിയെടുത്തുകൊണ്ടുപോയി. 22 വയസ്സായപ്പോള്‍ നിയമം അവനെ അമ്മയുടെ മുന്നിലെത്തിച്ചു. വര്‍ഷങ്ങള്‍ നീണ്ട അമ്മയുടെ പരാതിയും പ്രാര്‍ഥനയും അന്വേഷണവും കണ്ണുനീരും ചെന്നെത്തിയത് മറ്റൊരു രാജ്യത്തും. അമ്മയുടെ മുഖം ഓര്‍മയില്‍ പോലുമില്ലാതിരുന്ന മകനും ഒരു ചിത്രം പോലും കൈയിലില്ലാതിരുന്ന അമ്മയും ആദ്യ കൂട്ടിക്കാഴ്ചയില്‍ വികാരഭരിതരായി. വ്യാഴാഴ്ചയാണ് മകന്‍ കലിഫോര്‍ണിയയിലെത്തി സ്വന്തം അമ്മയെ കാണുന്നത്.

മരിയ മാന്‍സിയയും ഭര്‍ത്താവ് വാലെന്റൈന്‍ ഹെര്‍നാന്‍ഡെസും കലിഫോര്‍ണിയയിലായിരുന്നു കുഞ്ഞുമകനൊപ്പം താമസം. ദമ്ബതികള്‍ തമ്മില്‍ പ്രശ്‌നങ്ങളുണ്ടായിരുന്നു. 1995ല്‍ ഒരു ദിവസം ജോലി കഴിഞ്ഞ് വീട്ടിലെത്തിയ മരിയയ്ക്ക് ഭര്‍ത്താവിനെയും മകനെയും കണ്ടെത്താനായില്ല.കുഞ്ഞിന്റെ ഒരു ഫോട്ടോ പോലും മരിയ കാണരുതെന്ന ഉദ്ദേശത്തില്‍ എല്ലാം എടുത്തുകൊണ്ടാണ് പോയതെന്ന സത്യം അവരെ തളര്‍ത്തി.

ഉടന്‍ തന്നെ പൊലീസിനെ വിവരം അറിയിച്ചു. അന്നുമുതല്‍ തുടങ്ങിയ അന്വേഷണം ഫലം കണ്ടത് 21 വര്‍ഷങ്ങള്‍ക്കുശേഷം മെക്‌സിക്കോയില്‍ നിന്ന് മകന്‍ സ്റ്റീവ് ഹെര്‍നാന്‍ഡെസിനെ കണ്ടെത്തിയപ്പോഴാണ്. അപ്പോഴേക്കും പിതാവിനെ കാണാതായിരുന്നു. അയാള്‍ ജീവിച്ചിരിപ്പുണ്ടോ മരിച്ചോ എന്നുപോലും വ്യക്തമായിരുന്നില്ല. മകനെ കാണാതായി നാളുകള്‍ക്കുശേഷം കുടുംബ സുഹൃത്തിന്റെ കൈവശം ഉണ്ടായിരുന്ന മകന്റെ കുഞ്ഞുനാളിലെ ഫോട്ടോ മരിയ കണ്ടെത്തിയിരുന്നു.

മകനെ കണ്ടെത്തിയ അന്വേഷണ സംഘം ഇരുവരെയും വിവരം അറിയിക്കുന്നതിനു മുന്‍പ് ഡിഎന്‍എ പരിശോധന നടത്തി ഉറപ്പുവരുത്തിയിരുന്നു. മകന്‍ ജീവിച്ചിരിക്കുന്നെന്ന വാര്‍ത്ത തന്നെ മരിയയ്ക്കു വിശ്വസിക്കാനായില്ല. ഒടുവില്‍ മകനെ നേരില്‍ കണ്ടപ്പോള്‍ സകലനിയന്ത്രണവും വിട്ട് അവര്‍ പൊട്ടിക്കരഞ്ഞു. അമ്മ തങ്ങളെ ഉപേക്ഷിച്ചുപോയെന്നാണ് പിതാവ് പറഞ്ഞതെന്ന് സ്റ്റീവ് അറിയിച്ചു. സ്റ്റീവിന്റെ ജനന സര്‍ട്ടിഫിക്കറ്റ് ഉള്‍പ്പെടെയുള്ളവ മരിയയുടെ കൈവശമുണ്ട്. മെക്‌സിക്കോയില്‍ പാതിവഴിയിലാക്കിയ നിയമപഠനം യുഎസില്‍ തുടരാനിരിക്കുകയാണ് സ്റ്റീവ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha