തന്നെ പ്രിയപ്പെട്ടവള്‍ എന്ന വിളിച്ച സംസ്ഥാന വിദ്യാഭ്യാസ മന്ത്രിക്കെതിരെ കേന്ദ്ര മാനവവിഭവശേഷി വകുപ്പ് മന്ത്രി സ്മൃതി ഇറാനി. ബിഹാര്‍ വിദ്യാഭ്യാസ മന്ത്രി ഡോ. അശോക് ചൗധരിയ്‌ക്കെതിരാണ് ട്വിറ്ററിലൂടെ പരസ്യമായി പ്രതികരിച്ചത്. പ്രിയപ്പെട്ട എന്ന് അഭിസംബോധന ചെയ്തതാണ് സ്മൃതി ഇറാനിയെ ചൊടിപ്പിച്ചത്. പുതിയ വിദ്യാഭ്യാസ നയവുമായി ബന്ധപ്പെട്ട് ബിഹാര്‍ വിദ്യാഭ്യാസ മന്ത്രിയുടെ ട്വീറ്റാണ് സംഭവങ്ങള്‍ക്ക് വഴിമരുന്നിട്ടത്.
പ്രിയപ്പെട്ട സ്മൃതി ഇറാനിജി, എപ്പോഴാണ് ഞങ്ങള്‍ക്ക് പുതിയ വിദ്യാഭ്യാസ നയം ലഭിക്കുക? നിങ്ങളുടെ കലണ്ടറില്‍ എന്നാണ് 2015 അവസാനിക്കുക? ഇതായിരുന്നു ബിഹാര്‍ വിദ്യാഭ്യാസ മന്ത്രിയുടെ ട്വീറ്റ്. പുതിയ വിദ്യാഭ്യാസ നയം 2015ല്‍ പ്രാവര്‍ത്തികമാക്കും എന്നാണ് സ്മൃതി ഇറാനി ഉറപ്പു നല്‍കിയത്. ട്വീറ്റില്‍ പ്രിയപ്പെട്ട എന്ന് അഭിസംബോധന ചെയ്തതിനെയാണ് സ്മൃതി ഇറാനി ചോദ്യം ചെയ്തത്. വനിതകളെ എന്നു മുതലാണ് പ്രിയപ്പെട്ട എന്നു അഭിസംബോധന ചെയ്യാന്‍ തുടങ്ങിയത്. ഉടന്‍തന്നെ കേന്ദ്രമന്ത്രിയുടെ മറുപടിയും വന്നു.
പിന്നീട് ട്വിറ്ററിലൂടെ ഇരു നേതാക്കളും ഏറ്റുമുട്ടി. ആരെയും വന്ദിക്കാന്‍ വേണ്ടിയല്ല. എല്ലാ ഔദ്യോഗിക ഇമെയിലുകളും പ്രിയപ്പെട്ട എന്നു അഭിസംബോധന ചെയ്താണ് ആരംഭിക്കാറുള്ളത്. എന്തെങ്കിലും മറുപടി പറയാനുണ്ടെങ്കില്‍ വളച്ചു കെട്ടാതെ നേരെ പറയണമെന്നും ബിഹാര്‍ വിദ്യാഭ്യാസ മന്ത്രി തിരിച്ചടിച്ചു.
വിശദമായാണ് സ്മൃതി ഇറാനി ഇതിനുള്ള മറുപടി നല്‍കിയത്. താങ്കള്‍ ഉള്‍പ്പെടെ എല്ലാവര്‍ക്കും അയക്കാറുള്ള ഇമെയിലുകളില്‍ ഞാന്‍ ബഹുമാനപ്പെട്ട എന്നു അഭിസംബോധന ചെയ്താണ് ആരംഭിക്കാറുള്ളത്. വിദ്യാഭ്യാസ നയവുമായി ബന്ധപ്പെട്ട് സംസ്ഥാനത്തിന്റെ യാതൊരു കാഴ്ചപ്പാടും ഇതുവരെ ലഭിച്ചിട്ടില്ല. നേരിട്ടു കണ്ടപ്പോഴും ഇക്കാര്യവുമായി ബന്ധപ്പെട്ട് താങ്കള്‍ യാതൊന്നും പറഞ്ഞിട്ടില്ല. സ്മൃതി ട്വിറ്ററില്‍ മറുപടി നല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha