സ്വകാര്യ ആശുപത്രികള്ക്ക് കടിഞ്ഞാണ് കൂടിയേ കഴിയൂ; സ്റ്റെന്റ് പൂഴ്ത്തിവയ്ക്കുന്നതിനെതിരെ ജാഗ്രതാ നിര്ദ്ദേശം
നെഞ്ചു വേദനയുമായി സ്വകാര്യ ആശുപത്രിയില് പോയാല് പെട്ടത് തന്നെ പ്രഥമ പരിശോധനയ്ക്ക് ശേഷം അവര് രോഗികളുടെ ബന്ധുക്കളെ പേടിപ്പെടുത്തും. ഉടന് ആന്ജിയോഗ്രാം ചെയ്തില്ലെങ്കില് പിന്നെ ഒന്നും ചെയ്യാന് പറ്റില്ല. അതിനോടൊപ്പം തന്നെ ആന്ജിയോ പ്ലാസ്റ്റിയും ചെയ്യണം. ഏതാണ്ട് ഒരു ലക്ഷം രൂപയാകും. പാവപ്പെട്ടവര് പലിശയ്ക്കെടുത്തും പണയം വച്ചും കാശ് ഒപ്പിക്കും. അവസാനം എല്ലാ ചെലവും കൂടി ഒന്ന് ഒന്നൊന്നര ലക്ഷം രൂപയാകും. ഇങ്ങനെ വേണ്ടതിനും വേണ്ടാത്തതിനും ആവശ്യമില്ലാത്ത ടെസ്റ്റുകളും ആന്ജിയോ ഗ്രാമും നടത്തുകയാണ് പല സ്വകാര്യ ആശുപത്രികളും.
ഈ കൊള്ളയ്ക്കെതിരെ നടപടി വരുമെന്ന് മുഖ്യമന്ത്രി ആര്ദ്രം പദ്ധതിയുടെ ഉദ്ഘാടനത്തോടനുബന്ധിച്ച് പറഞ്ഞിരുന്നു. മുഖ്യമന്ത്രിയുടേയും ആരോഗ്യ വകുപ്പിന്റേയും കേന്ദ്രത്തിന്റേയും ഇടപെടലിനെ തുടര്ന്ന് തോന്നിയ പോലെ ഈടാക്കുന്ന ആന്ജിയോ പ്ലാസ്റ്റിക്ക് പിടിപ്പിക്കുന്ന സ്റ്റെന്റിന്റെ വില കുറച്ചിരുന്നു.
എന്നാല് വില കുത്തനെ ഇടിഞ്ഞതോടെ സ്റ്റെന്റ് പൂഴ്ത്തിവച്ച് ക്ഷാമം സൃഷ്ടിക്കാനാണ് സ്വകാര്യ ആശുപത്രികളും നിര്മ്മാതാക്കളും ശ്രമിച്ചത്. ഇതിനെതിരെ സംസ്ഥാന ഡ്രഗ് കണ്ട്രോളര് ജാഗ്രതാ നിര്ദ്ദേശം നല്കി. ജില്ലകളിലെ പല കേന്ദ്രങ്ങളിലും സ്റ്റെന്റ് വിതരണക്കാരുടേയും നിര്മ്മാതാക്കളുടേയും ബോര്ഡുകള് അപ്രത്യക്ഷമായത് കണക്കിലെടുത്താണിത്.
സ്റ്റെന്റുകള് പൂഴ്ത്തിവെച്ച് കൃത്രിമ ക്ഷാമമുണ്ടാക്കി അത്യാവശ്യക്കാര്ക്ക് കൂടിയ വിലയ്ക്ക് വില്പന നടത്താനുള്ള നീക്കത്തിനെതിരെ രോഗികളും അവരുടെ ബന്ധുക്കളും ജാഗ്രത പാലിക്കണമെന്നും പരാതികള് കൈമാറാന് മടിക്കരുതെന്നും ഡ്രഗ് കണ്ട്രോളര് അറിയിച്ചു.
കേന്ദ്രസര്ക്കാര് ഉത്തരവ് വന്നതോടെ നേരത്തെ മുക്കാല് ലക്ഷം രൂപ മുതല് ഒന്നര ലക്ഷം രൂപാവരെ വിലയുണ്ടായിരുന്ന വിവിധ തരം സ്റ്റെന്റുകള്ക്ക് 7500 മുതല് 32000 രൂപ വരെ വിലകുറഞ്ഞു. ലാഭവും കമ്മിഷനും കുറഞ്ഞതോടെയാണ് കച്ചവടക്കാര്ക്ക് സ്റ്റെന്റ് വില്പനയില് താത്പര്യമില്ലാതായത്.
ജീവന്രക്ഷാ വൈദ്യോപകരണങ്ങളുടെ പട്ടികയിലുള്ള സ്റ്റെന്റിന്റെ ലഭ്യത ഉറപ്പുവരുത്താന് എല്ലാ മുന്കരുതലുകളുമെടുക്കുന്നുണ്ട്.സംസ്ഥാനത്ത് സ്റ്റെന്റ് വിതരണം ചെയ്യുന്ന ഏതാനും ഏജന്സികള് മാത്രമാണുള്ളത്. കൂടിയ വിലയ്ക്ക് വില്പന നടത്തുന്നില്ലെന്ന് ഉറപ്പാക്കാന് അവിടങ്ങളിലെ ബില്ലുകള് രണ്ടുദിവസത്തിലൊരിക്കല് പരിശോധിക്കും.
സ്റ്റെന്റുകളുടെ പൂഴ്ത്തിവയ്പ് തടയാന് ചില മാര്ഗങ്ങളും സ്വീകരിച്ചു. ആന്ജിയോപ്ളാസ്റ്റി സര്ജറി സൗകര്യമുള്ള ആശുപത്രികളില് രോഗികളുടെ ലിസ്റ്റ് പതിവായി പരിശോധിക്കും. സ്റ്റെന്റിന്റെ ദൗര്ലഭ്യം മൂലം ശസ്ത്രക്രിയ മാറ്റിവച്ചിട്ടുണ്ടോ എന്ന് പരിശോധിക്കും. ആശുപത്രികളില് ചികിത്സക്കെത്തുന്ന രോഗികളില് ബോധവത്കരണം നടത്തും. സ്റ്റെന്റുമായി ബന്ധപ്പെട്ട് പരാതി നല്കേണ്ട വിലാസമറിയില്ലെങ്കില് ഡ്രഗ് കണ്ട്രോള് വകുപ്പ് എന്നെഴുതി ജില്ലയുടെ പേരും മാത്രം എഴുതി തപാലില് അയച്ചാലും കിട്ടുന്നതിന് സംവിധാനമേര്പ്പെടുത്തിയിട്ടുണ്ട്. വെബ് സൈറ്റിലും മെയിലിലും പരാതി അയക്കാം. സ്വകാര്യ ആശുപത്രികളില് അടുത്ത ഒരു മാസം പതിവായി പരിശോധന നടത്തും.
https://www.facebook.com/Malayalivartha