സ്വര്‍ണ്ണക്കച്ചവടത്തില്‍ വ്യാപാരം ചെയ്ത് ഉന്നതങ്ങള്‍ കൈയ്യടക്കിയ ജോയ് ആലുക്കാസ് ഇപ്പോള്‍ പെട്ടിരിക്കുകയാണ്,കൂട്ടിന് പ്രമുഖ ദിനപ്പത്രം മലയാള മനോരമയും. ഞായറാഴ്ച്ചയിലെ മനോരമ,ടൈംസ് ഓഫ് ഇന്ത്യ പത്രങ്ങളുടെ ആദ്യ പേജില്‍ തന്നെ മുഴുനീളത്തില്‍ ജോയ് ആലുക്കാസിന്റെ പരസ്യമായിരുന്നു. 

14 രാജ്യങ്ങളുടെ ദേശീയ പതാക ഉപയോഗിച്ചുള്ള പരസ്യത്തില്‍ ഇന്ത്യന്‍ പതാകയില്‍ നിന്നും അശോകചക്രം കാണാനില്ല. ഇതോടെ നൈജര്‍ എന്ന രാജ്യത്തിന്റെ പതാകയെപ്പോലെയായി ഇന്ത്യയുടെ പതാക.

'ലോകം തിളങ്ങുന്നു ഞങ്ങളിലൂടെ' എന്ന തലക്കെട്ടിലായിരുന്നു ജുവല്ലറിയെ വിശേഷിപ്പിച്ചിരുന്നത്. 30 വര്‍ഷങ്ങള്‍, 14 രാജ്യങ്ങള്‍, 130 ഷോറൂമുകള്‍ എന്നാണ് പരസ്യവാചകത്തില്‍. യു.എസ്.എ., യു.കെ., യു.എ.ഇ, ഒമാന്‍, ഖത്തര്‍, ബഹ്‌റൈന്‍, കുവൈത്ത്, സൗദി അറേബ്യ, സിംഗപ്പോര്‍, മലേഷ്യ, കാനഡ, ഓസ്‌ട്രേലിയ, ശ്രീലങ്ക എന്നീ രാജ്യങ്ങളുടെ പതാകകളുണ്ട്. എന്നാല്‍, മറ്റെല്ലാ രാജ്യങ്ങളുടെയും പതാക കൃത്യമായി ഉപയോഗിച്ചിട്ടും മനോരമയുടെ കോഴിക്കോട് എഡിഷനില്‍ ത്രിവര്‍ണം നല്‍കി അശോകചത്രം ഒഴിവാക്കി. മറ്റ് എഡിഷനുകളില്‍ ത്രിവര്‍ണത്തില്‍ ഇന്ത്യ എന്നെഴുതുകയാണ് ചെയ്തത്.മലയാള മനോരമയുടെ കോഴിക്കോട്, വയനാട് എഡിഷനുകളില്‍ ഈ പരസ്യം വന്നിരുന്നു. കൂടാതെ ടൈംസ് ഓഫ് ഇന്ത്യയുടെ ചില എഡിഷനുകളിലും ഇങ്ങനെ ത്രിവര്‍ണം വികലമായി ചിത്രീകരിച്ചു. രണ്ട് പത്രങ്ങളിലും വന്നതു കൊണ്ട് പരസ്യ ഏജന്‍സി തയ്യാറാക്കിയ പരസ്യമാണെന്നത് വ്യക്തമാണ്. എന്നാല്‍, ഏത് ഏജന്‍സിയാണ് പരസ്യം തയ്യാറാക്കിയതെന്ന കാര്യത്തില്‍ വ്യക്തതിയില്ല. ദേശീയ പതാകയെ തെറ്റായി ചിത്രീകരിക്കുന്നത് കുറ്റകരമായ കാര്യമാണ്. ലക്ഷക്കണക്കിന് കോപ്പി പ്രിന്റ് ചെയ്യുന്ന മലയാള മനോരമ പോലൊരു പത്രവും ഇക്കാര്യത്തില്‍ വേണ്ടത്ര ശ്രദ്ധ പുലര്‍ത്തിയില്ലേ എന്ന ചോദ്യം സോഷ്യല്‍ മീഡിയയില്‍ പലരും രൂക്ഷ വിമര്‍ശനത്തിന്റെ ഭാഷയില്‍ ചോദിക്കുന്നു.

സ്വര്‍ണത്തിന്റെ കാര്യത്തില്‍ വിശ്വാസ്യതയുടെ കാര്യം പറയുന്ന ജോയ് ആലുക്കാസ് എന്തുകൊണ്ടാണ് പരസ്യത്തിന്റെ കാര്യത്തില്‍ ജനങ്ങളുടെ വിശ്വാസ്യത നേടാന്‍ സാധിക്കാതെ പോയതെന്നും ചിലര്‍ കളിയാക്കി. അതേസമയം ഇത്തരമൊരു പരസ്യം വന്നതോട മനോരമ വായനക്കാര്‍ പ്രതിഷേധവുമായി രംഗത്തെത്തി. മനോരമ ഓഫീസില്‍ വിളിച്ച് പലരും പ്രതിഷേധം രേഖപ്പെടുത്തി. പരസ്യ കമ്പനിയാണ് പരസ്യം തന്നതെന്ന് പറഞ്ഞ് ഒഴിയാന്‍ പറ്റില്ലെന്നാണ് വായനക്കാര്‍ പറയുന്നത്. പത്രം പൂട്ടിക്കുമെന്ന് പോലും ചിലര്‍ ഭീഷണി മുഴക്കി.