പുനലൂര്‍ കാര്യറ ഈസ്റ്റ് പുതിയതോപ്പില്‍ ജാസ്മിന്‍ മന്‍സിലില്‍ പാത്തുമുത്ത് കേരളത്തിലെ ഏറ്റവും പ്രായംകൂടിയ വോട്ടര്‍; ഒരു പക്ഷെ ഇന്ത്യയിലെയും. ഇതുവരെ ഒരു തിരഞ്ഞെടുപ്പിലും പാത്തുമുത്ത് വോട്ടുകുത്താതിരുന്നിട്ടില്ല. ഇത്തവണയും മുടക്കിയില്ല.കേഴ്വിക്കും ഓര്‍മ്മയ്ക്കും ഇത്തിരി കുറവുണ്ടെങ്കിലും വ്യാഴാഴ്ച രാവിലെതന്നെ പോളിങ് ബൂത്തിലേക്ക് പോകാന്‍ ഒരുക്കം തുടങ്ങിയിരുന്നു. മൂന്നാമത്തെ മകന്‍ പരേതനായ മൈതീന്‍ കണ്ണിന്റെ മകള്‍ ആമിനെയ്ക്കാപ്പം വ്യാഴാഴ്ച രണ്ടുതവണ പാത്തുമുത്തുവിന് കാര്യറ അമ്പലംകുന്ന് 168-ാം നമ്പര്‍ അങ്കണവാടിയിലെ പോളിങ് ബൂത്തില്‍ വരേണ്ടിവന്നു. ഒരുതവണ മാധ്യമപ്രവര്‍ത്തകര്‍ക്ക് ക്യാമറയില്‍ പകര്‍ത്താന്‍. പിന്നീട് വന്നത് ശരിക്കും വോട്ടുചെയ്യാനും ബാക്കി പത്രക്കാര്‍ക്ക് കാണാനും.

പ്രായത്തിന്റെ അവശതകള്‍ എത്രയുണ്ടായാലും ജനാധിപത്യത്തിന്റെ കാതലായ വോട്ടവകാശം വിനിയോഗിക്കാന്‍ പാത്തുമുത്ത് സമയം കണ്ടെത്തും. വോട്ടുചെയ്യാന്‍ പണ്ടേ വല്യമ്മച്ചിയുടെ മനസ്സില്‍ പതിഞ്ഞ ചിഹ്നമുണ്ടെന്ന് ആമിന പറയുന്നു. ഇത്തവണയും അതിന്മേല്‍ തന്നെ വിരല്‍കുത്തി. മധുരമുള്ളതെന്തും വാരിത്തിന്നുന്ന ഇവര്‍ക്ക് പ്രമേഹമോ രക്തസമ്മര്‍ദ്ദമോ മറ്റെന്തെങ്കിലും അസുഖമോ ഇല്ല. 
മക്കളും ചെറുമക്കളും അവരുടെ മക്കളും കുടുംബക്കാരും ചേര്‍ന്ന് മുന്നൂറിനടുത്ത് അംഗബലമുള്ള കുടുംബനാഥയാണ് ഈ വോട്ടര്‍. കുടുംബക്കാര്‍ പലവഴിക്ക് താമസം മാറിയില്ലായിരുന്നെങ്കില്‍ 'സ്വന്ത'മായൊരു പോളിങ് ബൂത്തുതന്നെ കാര്യറയില്‍ സ്ഥാപിക്കേണ്ടിവന്നേനെ. ആറുമക്കളില്‍ മൂന്നാണും ഒരുപെണ്ണും മരിച്ചു. സുലൈഖാബീവിയും ഇബ്രാഹിംകുട്ടിയുമാണ് ജീവിച്ചിരിക്കുന്ന മക്കള്‍.