തേന്‍മാവിന്‍ കൊമ്പത്തില്‍ മോഹന്‍ലാലിനും നെടുമുടി വേണുവിനുമൊപ്പം സ്‌ക്രീന്‍ പങ്കിട്ട നടി സി.പി.ഖദീജ വിടവാങ്ങി. 77 വയസ്സായിരുന്നു. ശ്വാസകോശ അര്‍ബുദത്തെ തുടര്‍ന്ന് ഏറെ നാളായി ചികിത്സയിലായിരിക്കവെയായിരുന്നു അന്ത്യം. ബുധനാഴ്ച്ച രാത്രി 9.15ന് എറണാകുളം വടുതല സ്വാഗതം റോഡിലെ വീട്ടിലായിരുന്നു അന്ത്യം. മൃതദേഹം എറണാകുളം ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.
1960-70 കാലമായിരുന്നു ഖദീജയുടെ സുവര്‍ണ കാലം. 68ല്‍ പി.വേണുവിന്റെ ഹാസ്യ ചിത്രമായ വിരുതന്‍ ശങ്കു ആയിരുന്നു ആദ്യാവസാനം വരെ ചിത്രത്തിലുടനീളം തങ്ങിനിന്ന ഖദീജ വേഷമിട്ട ചിത്രം. വിരുതന്‍ ശങ്കുവില്‍ അടൂര്‍ഭാസിക്കും തിക്കുറിശ്ശിക്കുമൊപ്പം ഇച്ചിക്കാവ് എന്ന വേഷമായിരുന്നു ഖദീജയുടേത്. തുലാഭാരം, അസുരവിത്ത്, വെളുത്ത കത്രീന, കണ്ണൂര്‍ ഡീലക്‌സ്, വിലക്കപ്പെട്ട ബന്ധങ്ങള്‍ തുടങ്ങീ ചിത്രങ്ങളില്‍ പ്രധാനം വേഷമിട്ട ഖദീജ നൂറോളം ചിത്രങ്ങളില്‍ അഭിനയിച്ചു.
1994ല്‍ പ്രിയദര്‍ശന്‍ സംവിധാനം ചെയ്ത മോഹന്‍ലാല്‍ ചിത്രമായ തേന്‍മാവിന്‍ കൊമ്പത്തിലൂടെയാണ് ഖദീജ പ്രേക്ഷക ശ്രദ്ധ നേടുന്നത്. ഖദീജയുടെ അവസാന ചിത്രവും തേന്‍മാവിന്‍ കൊമ്പത്ത് ആയിരുന്നു. ചിത്രത്തില്‍ മോഹന്‍ലാല്‍ കാട്ടിലകപ്പെടുമ്പോള്‍ മോഹന്‍ലാലിന് വഴികാണിച്ചു കൊടുക്കുന്ന അമ്മച്ചിയുടെ വേഷമായിരുന്നു.
പരേതനായ കെ.വി.മാത്യുവാണ് ഭര്‍ത്താവ്. പരേതനായ വിന്നി, പരേതനായ സോഫി, ലീന, സോണി, ടെഡി, സ്‌റ്റെന്‍സി എന്നിവരാണ് മക്കള്‍.