കേസിനെക്കുറിച്ച് പോലീസ് ഒന്നും മിണ്ടുന്നില്ലെങ്കിലും അടുത്ത സ്രാവിനെ കുടുക്കാനുളള രഹസ്യ ഒരുക്കങ്ങള്‍ തകൃതിയെന്ന് സൂചന. പോലീസിന്റെ എല്ലാ നീക്കവും തടയാന്‍ രഹസ്യക്കളികളുമായി പ്രതിഭാഗവും പഴുതടച്ച് വലവിരിക്കാന്‍ പോലീസും എല്ലാ അടവും പയറ്റുന്നു. നടിയെ ആക്രമിച്ച കേസിലെ ആന്റി ഹീറോയിന്‍ മൂന്നു പേരില്‍ ഒരാള്‍, അറസ്റ്റിനു മുന്‍പ് കാവ്യയെയും അമ്മയെയും റിമി ടോമിക്കൊപ്പമിരുത്തി ചോദ്യം ചെയ്യും
യുവ നടിയെ സഞ്ചരിച്ചിരുന്ന കാറില്‍ തട്ടിക്കൊണ്ടു പോയി ലൈംഗിക പീഡനത്തിനിരയാക്കിയ സംഭവത്തില്‍ പൊലീസിന്റെ അടുത്ത നീക്കം കാത്ത് ദീലീപും പ്രതിഭാഗം അഭിഭാഷകരും. കേസിലെ മുഖ്യ കണ്ണികളായ ദിലീപിന്റെ ഭാര്യ കാവ്യ മാധവന്‍, കാവ്യയുടെ അമ്മ ശ്യാമള, ദിലീപിന്റെ സുഹൃത്തും ബിസിനസ് പങ്കാളിയുമായ റിമി ടോമി എന്നിവരില്‍ നിന്നും കഴിഞ്ഞ രണ്ട് ദിവസങ്ങളിലായി അന്വേഷണ സംഘം മൊഴിയെടുത്തു. മൂവരെയും മൂന്ന് സമയത്ത് വ്യത്യസ്തമായിട്ടായിരുന്നു മൊഴിയെടുക്കല്‍. കാവ്യയുടെ മൊഴിയെടുക്കല്‍ ആറ് മണിക്കൂര്‍വരെ നീണ്ടു. ശ്യമളയുടെയും റിമിയുടെയും വേഗത്തില്‍ കഴിഞ്ഞുവെങ്കിലും ചോദ്യങ്ങള്‍ ആഴമുള്ളതായിരുന്നു.
അതേസമയം മൂവരെയും ചോദ്യം ചെയ്തതില്‍ നിന്നും അന്വേണഷ സംഘം എന്ത് നിഗമനത്തിലേക്കാണ് എത്തിയിരിക്കുന്നതെന്നും അടുത്ത നീക്കം എന്താണെന്നുമുള്ള അങ്കലാപ്പിലാണ് പ്രതിഭാഗം. കേസില്‍ ദിലീപിനു അനുകൂലമായ നീക്കമാണ് നടത്തുന്നതെന്നു വിശ്വസിപ്പിച്ച ശേഷമാണ് അന്വേഷണ സംഘം തന്ത്രപരമായി ദിലീപിനെയും കൂട്ടാളികളെയും അകത്താക്കിയത്. കേസില്‍ ഒത്തു തീര്‍പ്പ് ചര്‍ച്ചക്കായി വിളിച്ചു വരുത്തിയ ശേഷമായിരുന്നു ദിലീപിന്റെ അറസ്റ്റും. സമാന രീതിയില്‍ തന്നെയാണ് അന്വേഷണ സംഘത്തിന്റെ മുന്നോട്ടുള്ള നീക്കങ്ങളുമെന്നാണ് സൂചന.
കാവ്യയെയും ശ്യാമളയെയും റിമിയെയും അന്വേഷണ സംഘം വീണ്ടും വിളിപ്പിക്കും. മൂവരുടെയും മൊഴികളിലെ വൈരുദ്ധ്യങ്ങള്‍ സംബന്ധിച്ച് വിശദമായ പഠനം നടത്തിയ ശേഷമായിരിക്കും അടുത്ത നീക്കമെന്നും വിവരമുണ്ട്. അടുത്ത ചോദ്യം ചെയ്യല്‍ അവസാനിക്കുന്നത് ഇവരില്‍ ഒരാളുടെ അറസ്റ്റിലേക്കായിരിക്കുമെന്നും അന്വേഷണ സംഘത്തില്‍ നിന്നും വിവരം കിട്ടുന്നുണ്ട്. എന്നാല്‍ അത് ആരാണെന്ന കാര്യത്തില്‍ വ്യക്തത വന്നിട്ടില്ല. മൂവരില്‍ ഒരാള്‍ക്ക് കേസുമായി നല്ല ബന്ധമുണ്ടെന്ന് അന്വേഷണ സംഘത്തിനു തെളിവ് ലഭിച്ചിട്ടുണ്ട്. ഇത് സാധൂകരിക്കുന്നതിനുള്ള നീക്കങ്ങളാണ് ഇപ്പോള്‍ നടന്നു കൊണ്ടിരിക്കുന്നത്. മൂവരെയും ഒരുമിച്ചിരുത്തി ചോദ്യം ചെയ്യുന്നതിലൂടെ കഥയിലെ ആന്റി ഹീറോയിന്‍ ആരാണെന്നു വ്യക്തമാകുമെന്ന നിലപാടിലാണ് പൊലീസ്. ഒപ്പം കേരളവും കാത്തിരിക്കുന്നു ഇന്ത്യയിലെ ആദ്യത്തെ റേപ്പ് ക്വട്ടേഷന്റെ ക്ലൈമാക്‌സിനായി.