നിപയുടെ പേരില്‍ യാത്ര നിഷേധിച്ചാല്‍ നടപടിയെടുക്കുമെന്ന് സര്‍ക്കാര്‍
നിപയുടെ പേരില്‍ ആശുപത്രി ജീവനക്കാര്‍, രോഗികളുടെ ബന്ധുക്കള്‍ എന്നിവര്‍ക്ക് യാത്ര നിഷേധിച്ചാല്‍ ബസ് ജീവനക്കാര്‍ക്കും, ഉടമള്‍ക്കുമെതിരെ നടപടിയെടുക്കുമെന്ന് സര്‍ക്കാര്‍ അറിയിച്ചു.ഇക്കാര്യത്തില്‍ പെര്‍മിറ്റ് സസ്‌പെന്‍ഡ് ചെയ്യുന്നതുള്‍പ്പെടെ നടപടി സ്വീകരിക്കാനാണ് ആര്‍ടിഓമാര്‍ക്ക് നിര്‍ദ്ദേശം നല്‍കിയിരിക്കുന്നത്. കോഴിക്കോട് വിവിധ ആശുപത്രികളിലുള്ള ജീവനക്കാര്‍, രോഗികളെ പരിചരിക്കുന്നവര്‍, ആശുപത്രികളിലേക്ക് പോകുന്നവര്‍ തുടങ്ങിയവര്‍ക്ക് യാത്രാ സൗകര്യം നിഷേധിക്കുന്നതായി പരാതി ഉയര്‍ന്ന സാഹചര്യത്തിലാണ് നടപടി.
ഇതിനിടെ നിപ വൈറസ് പ്രതിരോധത്തെ കുറിച്ച് ചര്‍ച്ച ചെയ്യാനായി ശനിയാഴ്ചയും ആരോഗ്യമന്ത്രി കെ.കെ ശൈലജയുടെ അധ്യക്ഷതയില്‍ കോഴിക്കോട് മെഡിക്കല്‍ കോളജില്‍ യോഗം ചേര്‍ന്നു. അവശ്യഘട്ടങ്ങളില്‍ മാത്രം രോഗികളെ അഡ്മിറ്റ് ചെയ്താല്‍ മതിയെന്നും അല്ലാത്തവരെ വാര്‍ഡുകളില്‍ നിന്ന് ഡിസ്ചാര്‍ജ് ചെയ്ത് തിരക്ക് ഒഴിവാക്കാനും ആരോഗ്യമന്ത്രി നിര്‍ദേശം നല്‍കി.നിപ രോഗികള്‍ ചികിത്സയിലുള്ളതിനാല്‍ കോഴിക്കോട് മെഡിക്കല്‍ കോളജില്‍ രോഗികള്‍ക്ക് നിയന്ത്രണമേര്‍പ്പെടുത്തി.
അത്യാഹിത വിഭാഗം ഒഴികെയുള്ളവരെ ഡിസ്ചാര്‍ജ് ചെയ്യും. മെഡിക്കല്‍ കോളേജ് പ്രിന്‍സിപ്പള്‍ പുറത്തിറക്കിയ സര്‍ക്കുലറിലാണ് ഇക്കാര്യം വ്യക്തമാക്കിയിരിക്കുന്നത്. സാധാരണ പ്രസവ കേസുകളും അഡ്മിറ്റ് ചെയ്യേണ്ടെന്നും സര്‍ക്കുലറില്‍ പറയുന്നു. മെഡിക്കല്‍ കോളേജില്‍ പ്രോട്ടോകോള്‍ അനുസരിച്ചുള്ള വസ്ത്രങ്ങള്‍ നിര്‍ബന്ധമാക്കുകയും ജീവനക്കാര്‍ക്ക് അവധി നല്‍കില്ലെന്നും സര്‍ക്കുലറിലുണ്ട്‌
https://www.facebook.com/Malayalivartha
