ഓസിന് കിട്ടുമെന്ന് കരുതി ചുമ്മാ വൈഫൈ ഓണാക്കല്ലേ; പൊതുഇടങ്ങളിലെ വൈഫൈ സുരക്ഷിതമല്ലെന്ന് കേന്ദ്ര സൈബര് സംഘം ; പാസ്വേഡും ചാറ്റും തുടങ്ങി എല്ലാ രഹസ്യവും ചോരും
പൊതുസ്ഥലങ്ങളിലെ വൈഫൈ ഉപയോഗം സൈബര് ആക്രമണ സാധ്യത വര്ദ്ധിപ്പിക്കുന്നുണ്ടെന്ന് കേന്ദ്ര സൈബര് സുരക്ഷാ സംഘം മുന്നറിയിപ്പ് നല്കി. അതിനാല് ഉപയോക്താക്കള് ശ്രദ്ധിക്കണമെന്ന് സര്ക്കാര് ഏജന്സിയായ ഇന്ത്യന് കമ്പ്യൂട്ടര് എമര്ജന്സി റെസ്പോണ്സ് ടീം (സിഇആര്ടിഇന്) പുറത്തിറക്കിയ അറിയിപ്പില് വ്യക്തമാക്കുന്നു. അടുത്തിടെ ഏജന്സി നടത്തിയ അന്വേഷണത്തിലാണ് ഇക്കാര്യം കണ്ടെത്തിയത്. പൊതുയിടങ്ങളിലെ വൈഫൈ സംവിധാനം സുരക്ഷിതമല്ലെങ്കില് ഉപയോഗിക്കുന്നവരുടെ സ്വകാര്യവിവരങ്ങള് ചോരാം. അതിനാല് വൈഫൈ ഉപയോഗിക്കുമ്പോള് ക്രഡിറ്റ് കാര്ഡ്, ഇന്റര്നെറ്റ് ബാങ്കിംഗ്, ചാറ്റ്, പാസ്വേഡ്, ഇമെയില് എന്നിവ വഴി യാതൊരു ഇടപാടുകളും നടത്തരുത്.
വൈഫൈ ഉപയോഗിക്കുന്നതിലൂടെ അന്താരാഷ്ട്ര തലത്തില് വ്യാപകമായ സുരക്ഷാവീഴ്ച അടുത്തിടെ കണ്ടെത്തിയിരുന്നു. അതിന്റെ പശ്ചാത്തലത്തില് കൂടിയാണ് സിഇആര്ടി ഉപഭോക്താക്കള്ക്ക് മുന്നറിയിപ്പ് നല്കിയത്. വിപിഎന്നും, വയറെഡ് നെറ്റ്വര്ക്കും ഉപയോഗിച്ച് നെറ്റ് എടുക്കുന്നതാണ് സുരക്ഷിതമെന്നും മുന്നറിയിപ്പില് പറയുന്നു. ഇപ്പോള് ലോകമെമ്പാടും ഉപയോഗിക്കുന്ന വൈഫൈ സംവിധാനങ്ങള് അത്ര സുരക്ഷിതമല്ല. അമേരിക്കന് ഡിപ്പാര്ട്ട്മെന്റ് ഓഫ് ഹോംലാന്റ് സെക്യൂരിറ്റിയാണ് ഇതേക്കുറിച്ച് ആദ്യം മുന്നറിയിപ്പ് നല്കിയത്. അതിനും മുമ്പ് ബെല്ജിയന് ഗവേഷകര് വൈഫൈ സംവിധാനത്തില് സുരക്ഷ ഉറപ്പിക്കാന് ഉപയോഗിക്കുന്ന സംവിധാനത്തില് ഗുരുതരമായ വീഴ്ച കണ്ടെത്തിയിരുന്നു. ബെല്ജിയം ആസ്ഥാനമാക്കി പ്രവര്ത്തിക്കുന്ന ഗവേഷകരായ മാത്തി വാന്ഹോഫ്, ഫ്രാങ്ക് പീസന്സ് എന്നിവരാണ് ഇപ്പോഴുള്ള സുരക്ഷ വീഴ്ച കണ്ടെത്തിയത്.
വൈഫൈ സുരക്ഷിതമാക്കാന് WPA2 പ്രോട്ടോകോളാണ് ലോകമെമ്പാടും ഉപയോഗിക്കുന്നത്. പക്ഷെ, ഹാക്കര്മാര് ഇവ ചോര്ത്തി സ്വകാര്യവിവരങ്ങള് കൈമാറുകയും നെറ്റ്വര്ക്കിന്റെ നിയന്ത്രണം ഏറ്റെടുക്കുകയും ചെയ്യുമെന്നാണ് പുതിയ കണ്ടെത്തല്. വൈഫൈ പ്രോട്ടക്ടഡ് ആസസ്സ് 2 എന്നാണ് WPA2 ന്റെ പൂര്ണ്ണരൂപം. മുന്പ് ഉണ്ടായിരുന്ന വയേര്ഡ് എക്യൂപ്മെന്റ് പ്രൈവസിയില് വന് സുരക്ഷ വീഴ്ചകള് കണ്ടെത്തിയപ്പോഴാണ് WPA2 നടപ്പിലാക്കിയത്.
https://www.facebook.com/Malayalivartha