പ്രമുഖ തമിഴ് സീരിയല്‍ താരം വി.ജെ.ചിത്ര ഹോട്ടല്‍ മുറിയില്‍ മരിച്ച നിലയില്‍. താരം താമസിച്ചിരുന്ന ഹോട്ടല്‍മുറിയില്‍ തൂങ്ങിമരിച്ച നിലയിലാണ് കണ്ടെത്തിയത്. തമിഴ് പ്രേക്ഷകര്‍ക്കിടയില്‍ ഏറെ ജനപ്രീതി നേടിയ സീരിയല്‍ നടിയാണ് വി.ജെ ചിത്ര. വിജയ് ടിവി സംപ്രേക്ഷണം ചെയ്യുന്ന പാണ്ഡ്യന്‍ സ്റ്റോര്‍സ് എന്ന സീരിയലിലെ മുല്ലൈ എന്ന കഥാപാത്രത്തിലൂടെയാണ് ഇരുപത്തെട്ടുകാരിയായ ചിത്ര പ്രേക്ഷകർക്കിടയിൽ പ്രശസ്തയാകുന്നത്. ഇവരുടെ അകാലവിയോഗ വാര്‍ത്തയറിഞ്ഞ ഞെട്ടലിലാണ് ആരാധകരും സഹപ്രവര്‍ത്തകരും.

സീരിയല്‍ ഷൂട്ടിംഗിനോടനുബന്ധിച്ചാണ് ഇവര്‍ നസ്രത്പേട്ടയിലെ ഒരു ഹോട്ടലില്‍ താമസിച്ചിരുന്നത്. പ്രതിശ്രുത വരനായ ഹേമന്തും ഒപ്പമുണ്ടായിരുന്നു. കുറച്ചു മാസങ്ങള്‍ക്ക് മുമ്പായിരുന്നു ഇവരുടെ വിവാഹനിശ്ചയം. ഇവിപി ഫിലിം സിറ്റിയിലെ സീരിയൽ ഷൂട്ടിംഗ് കഴിഞ്ഞ് പുലര്‍ച്ചെ രണ്ടരയോടെയാണ് ചിത്ര ഹോട്ടല്‍ മുറിയില്‍ തിരിച്ചെത്തിയത്.

ഹേമന്തിന്‍റെ വാക്കുകള്‍ അനുസരിച്ച്‌ ഷൂട്ടിംഗ് കഴിഞ്ഞെത്തിയ താരം കുളിച്ച്‌ വരാമെന്ന് പറഞ്ഞാണ് മുറിയിലേക്ക് പോയത്. എന്നാല്‍ സമയം ഒരുപാട് കഴിഞ്ഞിട്ടും പുറത്തേക്ക് കാണാത്തതിനെ വാതിലില്‍ തട്ടിനോക്കിയെങ്കിലും പ്രതികരണം ഒന്നുമുണ്ടായിരുന്നില്ല. ഇതേതുടര്‍ന്ന് ഇയാള്‍ ഹോട്ടല്‍ ജീവനക്കാരുടെ സഹായത്തോടെ ഡൂപ്ലിക്കേറ്റ് താക്കോല്‍ ഉപയോഗിച്ച്‌ വാതില്‍ തുറന്നപ്പോഴാണ് ചിത്രയെ ഫാനില്‍ തൂങ്ങിനില്‍ക്കുന്ന നിലയില്‍ കണ്ടെത്തിയത്.

വിഷാദരോഗമാണ് ആത്മഹത്യയിലേക്ക് നയിച്ചതെന്ന് റിപ്പോര്‍ട്ടുകളുണ്ടെങ്കിലും ഇത് സംബന്ധിച്ച്‌ ഇതുവരെ ഔദ്യോഗികമായി സ്ഥിരീകരണം പുറത്ത് വന്നിട്ടില്ല. സംഭവത്തില്‍ നസ്രത്ത്‌പേട്ടൈ പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്ത അന്വേഷണം ആരംഭിച്ചു. അവതാരക, നര്‍ത്തകി തുടങ്ങി വിവിധ മേഖലകളില്‍ തിളങ്ങുന്ന ചിത്ര സോഷ്യല്‍ മീഡിയയിലും വളരെ സജീവമാണ്.