ചുരുങ്ങിയ കാലയളവിൽ വളരെ കുറച്ച് സിനിമകളിലൂടെ പ്രേക്ഷകരുടെ മനസ്സിൽ ഇടം നേടിയ താരമാണ് നടി റെബ മോണിക്ക ജോൺ. ജേക്കബിന്റെ സ്വർഗരാജ്യം എന്ന സിനിമയിലൂടെ മലയാള സിനിമയി അരങ്ങേറ്റം കുറിച്ച താരം വിജയ് ചിത്രമായ ബിഗിലിലൂടെ തമിഴ് പ്രേക്ഷകരുടെ മനസും കീഴടക്കുകയായിരുന്നു. ഇപ്പോഴിതാ റെബ വിവാഹിതയാകുന്നു എന്ന വാർത്തയാണ് പുറത്ത് വരുന്നത്. ദുബായ് സ്വദേശിയായ ജോയ്മോൻ ജോസഫ് ആണ് വരൻ.

താരത്തെ പ്രപ്പോസ് ചെയ്ത വിവരം ജോയ്മോനാണ് സമൂഹമാധ്യമത്തിലൂടെ വെളിപ്പെടുത്തിയത്. വിവാഹത്തിന് റെബ സമ്മതം മൂളിയെന്നും ജോയ്മോൻ അറിയിക്കുകയുണ്ടായി. റെബയുടെ ജന്മദിനാഘോഷങ്ങളുടെ ഇടയിലായിരുന്നു ഇരുവരും വിവാഹക്കാര്യം പങ്കുവച്ചത്. ജന്മദിനാഘോഷങ്ങളുടെ ചിത്രങ്ങളും ജോയ്മോൻ ആരാധകർക്കായി പങ്കുവച്ചു.

ജോയ്മോന്റെ വാക്കുകൾ ഇങ്ങനെയാണ്: അങ്ങനെ ഞങ്ങൾ യെസ് പറഞ്ഞു. സംഭവിച്ചത് ഓർക്കുമ്പോള്‍ വിചിത്രമായി തോന്നുന്നു. കോവിഡും ലോക്ഡൗണും മൂലമുണ്ടായ പ്രത്യേക സാഹചര്യത്തിൽ നീണ്ട ആറുമാസത്തിനു ശേഷമാണ് ദുബായിയിൽ വച്ച് ഞങ്ങൾ വീണ്ടും കാണുന്നത്. ഒരു രാത്രിയിൽ രണ്ടുപേരും ഒരുപോലെ പ്രപ്പോസ് ചെയ്യാനുള്ള സാധ്യത എത്രത്തോളമായിരിക്കും?

എന്റെ ജീവിതത്തിൽ സംഭവിച്ച വിചിത്രമായ യാദൃശ്ചികത, അതൊരിക്കലും മറക്കുകയുമില്ല. ഞങ്ങളുടെ ജീവിതത്തിലെ ഏറ്റവും മനോഹരമായ രാത്രി... ഈ ഓർമകൾ എന്നെന്നും എന്നിലുണ്ടാകും. ഇനി എന്തൊക്കെയാണ് ജീവിതം ഞങ്ങൾക്കായി ഒരുക്കിവച്ചിരിക്കുന്നത്?! ഒരുപാട് ഇഷ്ടം റെബാ.... ജന്മദിനാശംസകൾ!"