നടനും തിരക്കഥാകൃത്തുമായ മുരളി ഗോപിയുടെ ഫേസ്ബുക്ക് അക്കൗണ്ട് ഹാക്ക് ചെയ്തു. തന്റെ അക്കൗണ്ട് ഹാക്ക് ചെയ്ത വിവരം അദ്ദേഹം ഇന്‍സ്റ്റഗ്രാം പേജിലൂടെയാണ് അറിയിച്ചത്. പേജില്‍ മുരളിയുടെ പിതാവ് കൊടിയേറ്റം ഗോപിയുടെ ചിത്രം പ്രൊഫൈല്‍ ഫോട്ടോ ആക്കി മാറ്റുകയും, വിചിത്രമായ ഏതാനും പോസ്റ്റുകള്‍ ഇടുകയും ചെയ്തിട്ടുണ്ട്. സന്ദേശം വായിച്ചവര്‍ ഹാക്കറുടെ പോസ്റ്റുകള്‍ക്ക് താഴെ കമന്റുകളുമായി എത്തിയിട്ടുണ്ട്. അടുത്തിടെ പുറത്തിറങ്ങിയ രണ്ടു സിനിമകളായ മോഹന്‍ലാലിന്റെ ദൃശ്യം 2, മമ്മൂട്ടി നായകനായ 'വണ്‍' എന്നിവ മുരളി ഗോപിയുടെ അഭിനയം ശ്രദ്ധേയമായിരുന്നു. നടന്‍ ദിലീപിന്റെ രണ്ടാം വരവില്‍ നിര്‍ണ്ണായക പങ്കുവഹിച്ച 'കമ്മാര സംഭവം', മലയാള സിനിമയിലെ ആദ്യ 200 കോടി ക്ലബ് ചിത്രമായ 'ലൂസിഫര്‍' എന്നിവ പിറന്നത് മുരളി ഗോപിയുടെ തിരക്കഥയിലാണ്. ഈ ചിത്രത്തിന്റെ രണ്ടാം ഭാഗമായ ഘ2 എമ്ബുരാന്റെ തിരക്കഥയും മുരളി ഗോപിയുടേതാണ്.

ലാല്‍ ജോസ് സംവിധാനം ചെയ്ത്, ദിലീപ് നായകനായ, 2004 ലെ ചിത്രം 'രസികനില്‍' തിരക്കഥാകൃത്തായാണ് മുരളി ഗോപി എന്ന മാധ്യമപ്രവര്‍ത്തകന്റെ സിനിമാപ്രവേശം. അച്ഛന്റെ പാത പിന്തുടര്‍ന്ന് സിനിമയിലെത്തുന്ന മക്കളുടെ നിരയിലേക്ക് മുരളി ഗോപിയും ചേര്‍ന്നു. ആദ്യ സിനിമയില്‍ ഒരു വേഷവും ചെയ്തു.മുരളി ഗോപിയെ പിന്നീട് കാണുന്നത് 'ഭ്രമരം' സിനിമയിലെ ഡോ: അലക്‌സ് വര്‍ഗീസ് എന്ന കഥാപാത്രമായാണ്. പിന്നാലെ തന്നെ മികച്ച സപ്പോര്‍ട്ടിങ് നടനുള്ള സത്യന്‍ സ്മാരക പുരസ്‌കാരം മുരളി ഗോപിയെ തേടിയെത്തി.