മലയാള സീരിയല്‍ പ്രേക്ഷകര്‍ക്ക് നൊമ്ബരമാവുകയാണ് നടി ശരണ്യ ശശി. ശരണ്യയ്ക്ക് ആദരാഞ്ജലികള്‍ അര്‍പ്പിച്ച് സുഹൃത്തുക്കളും സഹപ്രവര്‍ത്തകരും ആരാധകരും രംഗത്ത് എത്തിയിട്ടുണ്ട്. ഇപ്പോഴിത ശരണ്യയെ കുറിച്ച് നടന്‍ സാജന്‍ സൂര്യ പറഞ്ഞ വാക്കുകള്‍ വൈറലാവുകയാണ്. ഒരു അഭിമുഖത്തിലാണ് പ്രിയപ്പെട്ട സുഹൃത്തിനെ അവസാനമായി കണ്ടതിനെ കുറിച്ചും ഏറ്റവും വലിയ ആഗ്രഹത്തെ കുറിച്ചും താരം പറഞ്ഞത്. ''ശരണ്യയുടെ പുതിയ വീടിന്റെ പാലുകാച്ചല്‍ ചടങ്ങിനാണ് ഞങ്ങള്‍ അവസാനം കണ്ടത്. അന്നും എന്നോട് പറഞ്ഞത് 'ചേട്ടാ, നമുക്കിനിയും ഒന്നിച്ചഭിനയിക്കണം' എന്നാണ്. അത്രത്തോളം ജീവിതത്തെ സ്‌നേഹിച്ചയാളാണ് ശരണ്യ. വര്‍ഷങ്ങള്‍ക്ക് മുമ്ബ് ഞങ്ങള്‍ നായികാനായകന്‍മാരായി ഒരു സീരിയലില്‍ അഭിനയിച്ചിരുന്നു. അക്കാലം മുതലേയുള്ള പരിചയവും സൗഹൃദവുമാണെന്ന് ഓര്‍മ പങ്കുവെച്ച കൊണ്ട് സാജന്‍ സൂര്യ പറയുന്നു.

''ഒരുപാട് പ്രയാസപ്പെട്ട കുട്ടിയാണ് അവള്‍. രോഗം അവളെ ഒത്തിരി വേദനിപ്പിച്ചു. അപ്പോഴൊക്കെയും ജീവിതത്തിലേക്കു തിരിച്ചു വരണമെന്ന് അവള്‍ അതിഭയങ്കരമായി ആഗ്രഹിച്ചു. ഞങ്ങളെല്ലാവരും അതാണ് പ്രാര്‍ഥിച്ചത്. സീമച്ചേച്ചിയും ശരണ്യയുടെ അമ്മയുമൊക്കെ ഈ വേദന എങ്ങനെ താങ്ങുമെന്ന് എനിക്കറിയില്ല. സീമ.ജി.നായരുടെ പിന്തുണ ശരണ്യയ്ക്ക് നല്‍കിയ ആശ്വാസം ചെറുതല്ല''.