ട്രോളർമാരുടെ ഇരയായിരുന്ന കൃഷ്ണനും രാധയും എന്ന ചിത്രത്തിലൂടെ വന്ന് ആരാധകരെ ഞെട്ടിച്ച താരമാണ് സന്തോഷ് പണ്ഡിറ്റ്. നിരവധി സാമൂഹിക സേവന കാര്യങ്ങളിൽ കൂടി ഇദ്ദേഹം സജീവ സാന്നിധ്യമാണ്. ഇപ്പോഴിതാ കെഎസ്ആർടിസിയിൽ യാത്ര ചെയ്യുന്ന സന്തോഷ് പണ്ഡിറ്റിന്റെ ചിത്രമാണ് വൈറലാകുന്നത്. കേരളം കത്തുന്നതിനിടെ തന്റെ ബസ്സിൽ ആരും തിരിച്ചറിയാതെ, സന്നദ്ധ സേവനത്തിനായി യാത്രചെയ്യുന്ന സന്തോഷ് പണ്ഡിറ്റിന്റെ ചിത്രം ആ ബസ്സിലെ കണ്ടക്ടർ തന്നെയാണ് പകർത്തിയത്.

നിമിഷങ്ങൾക്കകം തന്നെ ഈ ചിത്രം വൈറലായി. ആലപ്പുഴ സ്വദേശിയായ ഷെഫീഖ് ആയിരുന്നു ഈ ബസ്സിലെ കണ്ടക്ടർ. ആലപ്പുഴയിൽ വർഷങ്ങൾക്ക് മുമ്പ് സന്തോഷ് പണ്ഡിറ്റ് ഒരു പരിപാടിക്ക് വന്നപ്പോൾ ഷഫീഖ് പരിചയപ്പെട്ടിരുന്നു. ടിക്കറ്റ് എടുക്കാൻ പണം നീട്ടിയപ്പോൾ ഷെഫീഖ് സന്തോഷിനെ തിരിച്ചറിഞ്ഞു. ആലപ്പുഴയിൽ എത്തുമ്പോൾ ചായ കുടിക്കാൻ സമയം കിട്ടുമോ എന്ന് സന്തോഷ്‌ ചോദിച്ചതോടെ ഷെഫിഖ് കൂടുതൽ അദ്ദേഹവുമായി സംസാരിച്ചു.

തുടർന്നാണ് ‘ചില വ്യക്തിത്വങ്ങള്‍ ഇപ്രകാരം ആണ്..ആരവങ്ങള്‍ ഇല്ലാതെ...നമ്മളുടെ സ്വന്തം ആനവണ്ടിയില്‍..ആരാണെന്ന് പറയാമോ...' എന്ന കുറിപ്പോടെ സന്തോഷ് പണ്ഡിറ്റിന്റെ ചിത്രം ഷഫീഖ് കെഎസ്ആർടിസി ആരാധകരുടെ വാട്സാപ്പ് ഗ്രൂപ്പിലും ഫെയ്സ്ബുക്കിലും എല്ലാം പങ്കുവെച്ചത്. ചിത്രം നിമിഷങ്ങൾക്കുള്ളിൽ തന്നെ വലിയ രീതിയിൽ വൈറലായി. സാമൂഹ്യസേവനവും, ലാളിത്യവും ഒക്കെ പരാമർശിച്ചാണ് ഈ ചിത്രം കൂടുതൽ ഷെയർ ചെയ്തത്.. ചില കമന്റുകൾ ഇങ്ങനെയായിരുന്നു...

'സൂപ്പർ സ്റ്റാർ സന്തോഷ്‌ പണ്ഡിറ്റ്... നല്ലൊരു മനുഷ്യ സ്നേഹി.. പച്ചയായ മനുഷ്യൻ... കിട്ടുന്നതിൽ നിന്നും പകുതിയിൽ കൂടുതൽ ഇല്ലാത്തവന് പങ്കു വെക്കാൻ ഒരു മടിയും ഇല്ലാത്തവൻ.....സ്വന്തം ബുദ്ധി കൊണ്ടും കഴിവ് കൊണ്ടും നല്ല മനസ്സുകൊണ്ടും കേരളത്തിലെ പൊതു ജനത്തിന്റെ സ്നേഹം പിടിച്ചു പറ്റിയവൻ.... സൂപ്പർ സ്റ്റാർ എന്ന വിളിക്ക് അർഹൻ' എന്നായിരുന്നു ഒരാളുടെ പ്രതികരണം.

ഒന്നും പറയാനില്ല..... കേരള ഒറ്റകെട്ടായി നിന്ന് തന്തക്കും... തള്ളക്കും... പ്രാന്തൻ എന്ന് വിളിച്ചിട്ടും..... താൻ വെട്ടിയ വഴി തെളിച്ചുകൊണ്ട്.... പിന്നീട് കുറ്റംപറഞ്ഞവരെക്കൊണ്ട് തന്നെ.... സന്തോഷ്‌ ജി എന്ന് വിളിപ്പിച്ച.... ഞാൻ കണ്ടതിൽ വെച്ച് ഏറ്റവും കൂടുതൽ തൊലിക്കട്ടിയുള്ള മനുഷ്യൻ....', എന്നായിരുന്നു മറ്റൊരാൾ കുറിച്ചത്.

അതേസമയം വിമർശിക്കുന്നവരും കുറവല്ല. ചാണക സംഘിയാണെന്നും പച്ചയ്ക്ക് വർഗീയത പറയുന്ന ആളാണെന്നും ചിലർ വിമർശിക്കുന്നുണ്ട്. അതിനിടെ മുൻപൊരിക്കൽ സന്തോഷിന്റെ ചിത്രം പങ്കുവെച്ച സുബിയ്ക്കെതിരേയും ചിലർ രംഗത്തെത്തിയിട്ടുണ്ട്. വർഷങ്ങൾക്ക് മുൻപ് സന്തോഷിനെ പരിഹസിച്ച സുബിയ്ക്ക് ഇപ്പോൾ എങ്ങനെയാണ് സന്തോഷ് നല്ലവനായതെന്നായിരന്നു ഒരാൾ ചോദിച്ചത്.