നടൻ വിജയ് ബാബുവിനെതിരെ നടപടി സ്വീകരിക്കാനൊരുങ്ങി അഭിനേതാക്കളുടെ സംഘടനയായ 'അമ്മ'. വിഷയത്തിൽ വിശദീകരണത്തിനായി വിജയ് ബാബു ഒരു ദിവസം ആവശ്യപ്പെട്ടിരുന്നു. ഈ സമയപരിധി തീരുന്ന സാഹചര്യത്തിലാണ് സംഘടന നടപടിയ്ക്ക് ഒരുങ്ങുന്നത്. വിജയ് ബാബുവിനെ അടുത്ത ദിവസം അമ്മ ഭാരവാഹിത്വത്തില്‍ നിന്നും നീക്കിയേക്കും എന്നാണ് ഇപ്പോൾ പുറത്തുവരുന്ന റിപ്പോർട്ടുകൾ. നടനെതിരെയുള്ള നടപടിയ്ക്ക് സംഘടനാ പ്രസിഡന്റ് മോഹന്‍ലാല്‍ വാക്കാല്‍ സമ്മതം നല്‍കിയിട്ടുണ്ട്.വിജയ് ബാബുവിനെതിരെയുള്ള നടപടിയ്ക്കായി അമ്മ എക്‌സിക്യൂട്ടീവ് കമ്മിറ്റിയിലെ വനിതകള്‍ ഒറ്റക്കെട്ടായി ആവശ്യം ഉന്നയിച്ചിട്ടുണ്ട്. അതേസമയം വിജയ് ബാബു ഹൈക്കോടതിയിൽ മുൻകൂർ ജാമ്യാപേക്ഷ നൽകി. ബ്ലാക്ക് മെയിലിംഗ് നടത്താനാണ് പരാതിക്കാരിയുടെ ശ്രമമെന്നാണ് ഹർജിയിൽ പറയുന്നത്. സമൂഹത്തിൽ ഉന്നത സ്ഥാനത്തിരിക്കുന്ന ആളുകളെ മീ ടൂ ആരോപണങ്ങൾ ഉന്നയിച്ച് അപമാനിക്കുവാൻ ശ്രമിക്കുകയെന്നത് ഒരു ഫാഷൻ ആയി മാറിയിരിക്കുകയാണ്. അത്തരത്തിലൊരു ശ്രമമാണ് പരാതിക്കാരിയുടെ നീക്കത്തിന് പിന്നിലുള്ളത്. താൻ ബലാത്സംഗം ചെയ്തിട്ടില്ലെന്നും അപകീർത്തി പെടുത്തുക എന്നതാണ് പരാതിക്കാരുടെ ഉദ്ദേശമെന്നും ഹർജിയിൽ പറയുന്നു. കോടതി ഇന്ന് തന്നെ ഹർജി പരിഗണിച്ചേക്കാനാണ് സാധ്യത.