ബോളിവുഡ് നടി കങ്കണ റണൗത്ത് അഭിനയിച്ച ചിത്രമായിരുന്നു 2017 ല്‍ പുറത്തിറങ്ങിയ സിമ്രാന്‍. ചിത്രത്തിന്റെ റിലീസിനോടനുബന്ധിച്ച് നിരവധി വിവാദങ്ങളും ഉടലെടുത്തിരുന്നു. ചിത്രത്തിന്റെ തിരക്കഥാകൃത്തായ അപൂര്‍വ അസ്രാണിയും കങ്കണയും തമ്മിലുണ്ടായ പ്രശ്‌നങ്ങള്‍, സെറ്റില്‍ കങ്കണയുടെ പേരില്‍ വന്ന ആരോപണങ്ങള്‍ എന്നിവയായിരുന്നു ഇതിന് കാരണമായത്. ഇപ്പോഴിതാ കങ്കണയുമായി ഒരുമിച്ച് പ്രവര്‍ത്തിച്ചപ്പോഴുണ്ടായ അനുഭവങ്ങളെ പറ്റി തുറന്നു പറഞ്ഞിരിക്കുകയാണ് സിമ്രാന്റെ സംവിധായകന്‍ ഹന്‍സല്‍ മെഹ്ത.

കങ്കണ സൂപ്പര്‍ താരമാണെങ്കിലും അവരോടൊപ്പം ഒരുമിച്ച് പ്രവര്‍ത്തിച്ചത് ഏറ്റവും വലിയ തെറ്റായിരുന്നെന്നാണ് സംവിധായകന്‍ പറയുന്നത്. സിനിമയുടെ എഡിറ്റിംഗില്‍ കങ്കണ കൈ കടത്തിയെന്ന് നേരത്തെ ആരോപണമുയര്‍ന്നിരുന്നു. എന്നാല്‍ 'എഡിറ്റില്‍ കങ്കണ കൈ കടത്തിയിരുന്നില്ല. പക്ഷെ കൈ കടത്താന്‍ ഒന്നുമുണ്ടായിരുന്നില്ല. അവര്‍ (കങ്കണ) ഷൂട്ട് ചെയ്തത് മാത്രമേ ഞങ്ങളുടെ പക്കലുണ്ടായിരുന്നുള്ളൂ.'

കങ്കണ നല്ല നടിയാണ്. പക്ഷെ തന്നെ പറ്റി മാത്രം സിനിമ നിര്‍മ്മിച്ച് അവര്‍ തന്നിലേക്ക് മാത്രം ഒതുങ്ങുന്നത് പരിമിതിയാണ്. ഒരു സിനിമയില്‍ എല്ലാ കഥാപാത്രങ്ങള്‍ക്കും പ്രധാന്യമുണ്ടെന്നും ഹന്‍സല്‍ മെഹ്ത അഭിപ്രായപ്പെട്ടു. അടുത്തിടെ പുറത്തിറങ്ങിയ കങ്കണ ചിത്രം ധാക്കഡിലെ ഗാനത്തെയും ചിത്രത്തിന്റെ പേരെടുത്ത് പറയാതെ സംവിധായകന്‍ വിമര്‍ശിച്ചു.

'ഷി ഈസ് ഓണ്‍ ഫയര്‍' എന്ന് തുടങ്ങുന്ന ഗാനം കങ്കണയെ പറ്റി തന്നെയാണെന്നാണ് ഹന്‍സല്‍ അഭിപ്രായപ്പെട്ടത്. അതേസമയം കങ്കണ ഇപ്പോഴും വലിയ താരവും മികച്ച നടിയുമാണെന്നും എന്നാല്‍ നടിയോടൊപ്പം ഒരുമിച്ച് പ്രവര്‍ത്തിക്കാന്‍ തനിക്ക് പറ്റില്ലെന്നും ഹന്‍സല്‍ മെഹ്ത തുറന്നു പറഞ്ഞു. തുടരെ വിവാദങ്ങളിലായ സിമ്രാന്‍ എന്ന സിനിമ ബോക്‌സ് ഓഫീസില്‍ വിജയം കണ്ടില്ല.