ധനുഷിന്റെ നായികയായി മമിത എത്തിയതിനെ കുറിച്ച് വെളിപ്പെടുത്തലുമായി സംവിധായകന്
സൂപ്പര് ശരണ്യ, പ്രേമലു തുടങ്ങിയ മലയാള ചിത്രങ്ങളിലൂടെ പ്രേക്ഷകരുടെ മനം കവര്ന്ന നടിയാണ് മമിത ബൈജു. ഒന്പതാം ക്ലാസില് പഠിക്കുമ്പോള് 'സര്വോപരി പാലക്കാരന്' എന്ന ചിത്രത്തിലൂടെയാണ് മമിത വെള്ളിത്തിരയില് എത്തുന്നത്. ഓപ്പറേഷന് ജാവയിലെ അല്ഫോന്സ എന്ന കഥാപാത്രമാണ് മമിതയെ കൂടുതല് ശ്രദ്ധേയയാക്കിയത്. ഡാകിനി, വരത്തന്, ഹണി ബീ 2, വികൃതി, കിലോമീറ്റേഴ്സ് ആന്ഡ് കിലോമീറ്റേഴ്സ് തുടങ്ങിയവയാണ് മറ്റ് ശ്രദ്ധേയ ചിത്രങ്ങള്. ഇപ്പാേഴിതാ ധനുഷും മമിതയും ഒന്നിക്കുന്ന തമിഴ് ചിത്രം 'കര' ഏപ്രില് 30ന് തിയേറ്ററുകളിലെത്താന് ഒരുങ്ങുകയാണ്. സിനിമയിലെ കാസ്റ്റിംഗിനെക്കുറിച്ചും തമിഴ് സിനിമയിലെ മലയാളി നായികമാരുടെ കടന്നുകയറ്റത്തെക്കുറിച്ചും സംവിധായകന് വിഗ്നേഷ് രാജയും നടി മമിത ബൈജുവും പങ്കുവച്ച കാര്യങ്ങളാണ് സിനിമാലോകത്ത് ശ്രദ്ധേയമാകുന്നത്.
'കര'യില് നായികയായി ആദ്യം നിശ്ചയിച്ചിരുന്നത് മമിതയെ ആയിരുന്നില്ലെന്നാണ് കരയുടെ സംവിധായകന് വിഗ്നേഷിന്റെ വെളിപ്പെടുത്തല്. കന്നഡ താരം ചൈത്ര ജെ ആചാറിനെയാണ് ആദ്യം ഈ വേഷത്തിനായി പരിഗണിച്ചിരുന്നത്. എന്നാല് ചൈത്ര അഭിനയിച്ച ശശികുമാര് ചിത്രം 'മൈ ലോര്ഡ്' ഈ ചിത്രത്തിന് മുമ്പ് പുറത്തിറങ്ങിയിരുന്നു. ആ ചിത്രത്തിലെ നടിയുടെ ലുക്ക് 'കര'യിലേതുപോലെ സാദൃശ്യമുള്ളതിനാല് ചൈത്ര തന്നെ ഈ വേഷം ഒഴിവാക്കുകയായിരുന്നു. ഇതിനുശേഷമാണ് മമിത ബൈജുവിനെ വിളിക്കുന്നത്. മമിത ഈ വേഷം സ്വീകരിക്കുമെന്ന് കരുതിയിരുന്നില്ലെന്നും എന്നാല് താരം താല്പര്യം പ്രകടിപ്പിച്ചത് അപ്രതീക്ഷിതമായിരുന്നുവെന്നും വിഗ്നേഷ് രാജ പറഞ്ഞു.
അതേസമയം, തമിഴ് സിനിമകളില് തമിഴ് നടിമാരെ ഒഴിവാക്കി മലയാളി നടിമാരെ കൊണ്ടുവരുന്നതിനെതിരെ സോഷ്യല് മീഡിയയില് ഉയരുന്ന വിമര്ശനങ്ങള്ക്ക് മമിത നല്കിയ മറുപടിയും ശ്രദ്ധേയമായി. 'എനിക്ക് മുന്നില് ഒരു അവസരം വന്നപ്പോള് അത് ഉപയോഗപ്പെടുത്തി എന്നത് മാത്രമാണ് ഞാന് ചെയ്തത്. ഒരു അഭിനേതാവ് എന്ന നിലയില് വൈവിദ്ധ്യമുള്ള വേഷങ്ങള് ചെയ്യാനാണ് ആഗ്രഹിക്കുന്നത്. അതിരുകളും ഭാഷകളും കടന്ന് സിനിമകള് ചെയ്യുക എന്റെ ജോലിയുടെ ഭാഗമാണ്. അത് എന്റെ ഉത്തരവാദിത്തം കൂടിയാണ്. അത്തരം അവസരങ്ങള് ലഭിക്കുമ്പോള് വേണ്ടെന്ന് വയ്ക്കാന് കഴിയില്ല'. മമിത ബൈജു വ്യക്തമാക്കി. മമിതയെ കൂടാതെ മലയാളി താരങ്ങളായ ജയറാം, സുരാജ് വെഞ്ഞാറമ്മൂട് എന്നിവരും പ്രധാന വേഷങ്ങളില് ധനുഷിനൊപ്പം കരയില് അണിനിരക്കുന്നുണ്ട്.
https://www.facebook.com/Malayalivartha
