സായ് പല്ലവിക്കെതിരെ സൈബര് ആക്രമണം
ഒരൊറ്റ സിനിമയിലൂടെ മലയാളികളുടെ മനസില് ഇടംനേടിയ നടിയാണ് സായ് പല്ലവി. താരത്തിന്റെ വിശേഷങ്ങള് അറിയാന് ആരാധകര് ഏറെയാണ്. ആമീര്ഖാന്റെ മകന് ജുനൈദ് ഖാന് നായകനാകുന്ന ബോളിവുഡ് ചിത്രം 'ഏക് ദിന്' ആണ് സായി പല്ലവിയുടേതായി റിലീസിനൊരുങ്ങുന്നത്. മേയ് ഒന്നിനാണ് ചിത്രം തിയേറ്ററുകളില് എത്തുക. ഇപ്പോഴിതാ മുംബയ്യില് സംഘടിപ്പിച്ച ചിത്രത്തിന്റെ പ്രമോഷനിടെ ഹിന്ദി സംസാരിക്കാന് തനിക്ക് പ്രയാസമുണ്ടെന്ന് താരം പറഞ്ഞതാണ് സോഷ്യല് മീഡിയയില് ചര്ച്ചയാകുന്നത്.
ചടങ്ങില് അതിഥികളെയും മാദ്ധ്യമങ്ങളെയും ഹിന്ദിയില് അഭിസംബോധന ചെയ്യാന് ശ്രമിച്ച നടി, തനിക്ക് ഹിന്ദി അത്ര വശമില്ലെന്ന് തുറന്നു സമ്മതിച്ചിരുന്നു. ഇതിന്റെ വീഡിയോ പുറത്തുവന്നതോടെ താരത്തിനെതിരെ ട്രോളുകള് ആരംഭിക്കുകയായിരുന്നു. നടിയുടെ ഹിന്ദി പരിജ്ഞാനത്തെക്കുറിച്ച് പലരും വിമര്ശിച്ചു. വരാനിരിക്കുന്ന ബിഗ് ബജറ്റ് ചിത്രം 'രാമായണ'ത്തിലെ നടിയുടെ കാസ്റ്റിംഗിനെ ചോദ്യം ചെയ്തും ഒരു വിഭാഗം ആളുകള് രംഗത്തെത്തി.
നിതേഷ് തിവാരി സംവിധാനം ചെയ്യുന്ന 'രാമായണ'ത്തില് സായ് പല്ലവിയാണ് സീതാദേവിയുടെ വേഷം ചെയ്യുന്നത്. അടിസ്ഥാന ഹിന്ദി പോലും അറിയാത്ത ഒരാളെ എങ്ങനെയാണ് സീതയായി തിരഞ്ഞെടുത്തതെന്നാണ് വിമര്ശകരുടെ ചോദ്യം. എന്നാല് താരത്തെ പിന്തുണച്ചും നിരവധി പേര് രംഗത്തെത്തി. കത്രീന കൈഫ്, ജാക്വിലിന് ഫെര്ണാണ്ടസ് തുടങ്ങിയ നടിമാരും തുടക്കത്തില് ഹിന്ദി അറിയാത്തവരായിരുന്നുവെന്ന് ആരാധകര് ചൂണ്ടിക്കാട്ടി. ഒരു നടിയുടെ കഴിവിനെ ഭാഷയുമായി ബന്ധിപ്പിക്കേണ്ടതില്ലെന്നും, ഡയലോഗുകള് പഠിച്ചു പറയാന് അവര്ക്ക് സാധിക്കുമെന്നും ആരാധകര് പറഞ്ഞു.
ആമിര് ഖാന് പ്രൊഡക്ഷന്സിന്റെ ബാനറില് സുനില് പാണ്ഡെ സംവിധാനം ചെയ്യുന്ന പ്രണയചിത്രമാണ് 'ഏക് ദിന്'. 2016ല് പുറത്തിറങ്ങിയ 'വണ് ഡേ' എന്ന തായ് സിനിമയുടെ റീമേക്കാണിത്. ഒരു ദിവസത്തേക്ക് മാത്രം തന്റെ പ്രണയിനിക്കൊപ്പം കഴിയാന് ആഗ്രഹിക്കുന്ന യുവാവിന്റെയും ആ ആഗ്രഹം അപ്രതീക്ഷിതമായി സഫലമാകുന്നതിന്റെയും കഥയാണ് ചിത്രം പറയുന്നത്.
https://www.facebook.com/Malayalivartha
