ഓണത്തിന് സംസ്ഥാനത്ത് 2000 പച്ചക്കറിക്കടകള്‍ തുറക്കുമെന്ന് കൃഷി മന്ത്രി വിഎസ് സുനില്‍കുമാര്‍ അറിയിച്ചു. ഇതിനായി ഇടുക്കിയിലെ മൂന്നാര്‍ വട്ടവട മേഖലയില്‍ നിന്ന് കൂടുതല്‍ പച്ചക്കറികള്‍ സംഭരിക്കുമെന്ന് അദ്ദേഹം വ്യക്തമാക്കി.

കഴിഞ്ഞ ഓണത്തിന് 1500 പച്ചക്കറി ചന്തകളാണ് കൃഷിവകുപ്പും ഹോര്‍ട്ടി കോര്‍പ്പും വി.എഫ്.പിസി.കെയും ചേര്‍ന്ന് തുറന്നത്. ഇത്തവണ എന്നാല്‍ 2000 പച്ചക്കറി ചന്തകള്‍ തുടങ്ങാനാണ് പദ്ധതി. മൂന്നാറില്‍ നിന്ന് 5000 മെട്രിക് ടണ്‍ പച്ചക്കറി ഉല്‍പാദനമാണ് ഇത്തവണ പ്രതീക്ഷിക്കുന്നത്. ഇവിടെ നിന്ന് ലഭിക്കുന്ന പച്ചക്കറികളുടെ അളവ് കണക്കാക്കിയതിന് ശേഷമാകും മറ്റ് സംസ്ഥാനങ്ങളില്‍നിന്ന് പച്ചക്കറി വാങ്ങുന്നത്. ഓണത്തിന് സര്‍ക്കാര്‍ ചന്തകള്‍ക്ക് പുറമെ, കുടുംബശ്രീ, സഹകരണവകുപ്പ്, സിവില്‍ സപ്ലൈസ് എന്നിവരുടെയും പച്ചക്കറി വില്‍പനകേന്ദ്രങ്ങള്‍ ഉണ്ടാകുമെന്നും മന്ത്രി പറഞ്ഞു.