ജനം പ്രളയദുരിതത്തില്‍ ആറാടുമ്പോള്‍ പിണറായി എവിടെ. സംസ്ഥാനത്ത് പ്രളയം ഉണ്ടായിട്ടും മുഖ്യമന്ത്രി പിണറായി വിജയനെ കാണാനേ ഇല്ലെന്ന് പ്രതിപക്ഷ നേതാവ് രമേശ് ചെന്നിത്തല. ഡല്‍ഹിയില്‍ നിന്നു പോയ ശേഷം അദ്ദേഹം കര്‍ക്കിടക ചികിത്സയിലാണോ എന്നു സംശയിക്കുന്നു. മുഖ്യമന്ത്രിയും മന്ത്രിമാരും ജനങ്ങളെ ആശ്വസിപ്പിക്കാനും പ്രളയ ദുരന്ത മേഖല സന്ദര്‍ശിക്കാന്‍ ബാധ്യതയുള്ളവരുമാണ്. എന്നാല്‍, മുഖ്യമന്ത്രി പ്രളയത്തെപ്പറ്റി യാതൊന്നും പറയുന്നത്‌പോലും കേള്‍ക്കുന്നില്ല. കുട്ടനാട്, അപ്പര്‍ കുട്ടനാട് മേഖലയിലെ പ്രളയം കൈകര്യം ചെയ്യുന്നതില്‍ സര്‍ക്കാര്‍ കുറ്റകരമായ അനാസ്ഥയാണ്കാട്ടിയതെന്നും ചെന്നിത്തല ഡല്‍ഹിയില്‍ പറഞ്ഞു.

ആളുകള്‍ക്ക് ക്യാമ്പുകളില്‍ പോലും പോവാനാവാതെ ഒറ്റപ്പെട്ടു കഴിയുന്നവരുണ്ട്. തിങ്കളാഴ്ച ഭക്ഷണ സാധനങ്ങള്‍ എത്തിക്കുമെന്നാണ് അറിയുന്നത്. ഇതുവരെ അരി എത്തിച്ചിട്ടില്ല. ഒച്ചിന്റെ വേഗത്തിലാണ് ദുരിതശ്വാസ പ്രവര്‍ത്തനം നടക്കുന്നത്. ദുരന്തത്തിന് ഇരയായവര്‍ക്ക് ഒരാള്‍ക്ക്4,000 രൂപ വീതം നല്‍കുന്ന സംവിധാനം ഉണ്ടാകണം. ദുരന്ത നിവാരണ ഫണ്ടില്‍ അതിനുള്ള പണമുണ്ട്. ക്യാമ്പില്‍ വരാത്തവര്‍ക്ക്‌സൗജന്യ റേഷന്‍ നല്‍കണമെന്ന്പ്രതിപക്ഷം ആവശ്യപ്പെട്ടിട്ടും നല്‍കിയിട്ടില്ല. കടലാക്രമണം നേരിടാന്‍ രണ്ട്‌വര്‍ഷമായിട്ടും ഒരു കല്ലുപോലും ഇട്ടിട്ടില്ലെന്നും ചെന്നിത്തല കുറ്റപ്പെടുത്തി. സര്‍ക്കാര്‍ സംവിധാനങ്ങള്‍ പൂര്‍ണ്ണ പരാജയമെന്നും ചെന്നിത്തല കൂട്ടിച്ചേര്‍ത്തു.