യുവാവിനെ കാറില്‍ തട്ടിക്കൊണ്ടുപോയി. മലപ്പുറം ജില്ലയിലെ മങ്കടയ്ക്ക് സമീപം വടക്കാങ്ങരയില്‍ നിന്നാണ് യുവാവിനെ തട്ടിക്കൊണ്ടുപോയത്. സംഭവത്തെ തുടര്‍ന്ന് മലപ്പുറം, കോഴിക്കോട് ജില്ലകളില്‍ പൊലീസ് തിരച്ചില്‍ നടത്തുകയാണ്. ഇന്നലെ ഉച്ചയ്ക്കാണു സംഭവം.

മങ്കടയില്‍ നിന്ന് മഞ്ചേരിയിലെത്തിയ കാറിന്, പതിവു വാഹനപരിശോധനയുടെ ഭാഗമായി പൊലീസ് കൈകാണിച്ചെങ്കിലും നിര്‍ത്താതെ പോയി. കാര്‍ മലപ്പുറം – കോഴിക്കോട് ഭാഗത്തേക്ക് പോയതായി പൊലീസ് പറയുന്നു.

മറ്റൊരു കാറുമായി ഉരസിയിട്ടും വാഹനം നിര്‍ത്താതെ പോകുന്നതിന്റെ സിസിടിവി ദൃശ്യം ലഭിച്ചിട്ടുണ്ട്. കോഴിക്കോട് സ്വദേശിയുടെ പേരിലുള്ള കാര്‍ മറ്റൊരാള്‍ക്കു വാടകയ്ക്കു നല്‍കിയതാണെന്നു കണ്ടെത്തി. കുഴല്‍പ്പണ സംഘങ്ങള്‍ തമ്മിലുള്ള സംഘര്‍ഷത്തിന്റെ ഭാഗമാണോ സംഭവമെന്നും അന്വേഷിക്കുന്നുണ്ട്. ട്യൂഷന്‍ കഴിഞ്ഞുപോയ കുട്ടിയെ തട്ടിക്കൊണ്ടുപോയെന്ന് നേരത്തെ അഭ്യൂഹമുണ്ടായിരുന്നു.