അര്‍ദ്ധരാത്രിയില്‍ ഒറ്റയ്ക്കായിപ്പോയ വീട്ടമ്മയ്ക്ക് കെഎസ്ആര്‍ടിസി ജീവനക്കാരും യാത്രക്കാരും കൂട്ടായി. തിരുവനന്തപുരത്തുനിന്നും മൈസൂരിലേക്ക് പോയ കെഎസ്ആര്‍ടിസി സ്‌കാനിയ ബസിലെ യാത്രക്കാരിയായ ഇരിങ്ങാലക്കുട സ്വദേശി റെജി തോമസ് എന്ന വീട്ടമ്മയ്ക്കാണ് ജീവനക്കാരുടെയും യാത്രക്കാരുടെയും സംരക്ഷണം ലഭിച്ചത്.

ഞായറാഴ്ച പുലര്‍ച്ചെ ഒന്നേമുക്കാലോടെ റെജി സഞ്ചരിച്ച ബസ് ചാലക്കുടി പനമ്ബള്ളി കോളേജ് സ്‌റ്റോപ്പിലെത്തിയത്. അവിടെ സ്‌റ്റോപ്പ് ഇല്ലാതിരുന്നിട്ടും റെജിയുടെ ആവശ്യപ്രകാരം ബസ് നിര്‍ത്തി.എന്നാല്‍ റെജിയെ കൂട്ടിക്കൊണ്ടുപോകാന്‍ ബസ് സ്‌റ്റോപ്പില്‍ ആരുമുണ്ടായിരുന്നില്ല. ഭര്‍ത്താവെത്താന്‍ 10 മിനിറ്റ് വൈകുമെന്നതിനാല്‍ റെജി ജീവനക്കാരോട് പൊയ്‌ക്കൊള്ളാന്‍ പറഞ്ഞു എന്നാല്‍ ബസിലെ െ്രെഡവര്‍ കം കണ്ടക്ടര്‍മാരായ പ്രകാശും ഹനീഷും ഇതിന് വിസമ്മതിച്ചു.

അര്‍ദ്ധരാത്രയില്‍ വിജനമായ സ്ഥലത്ത് ഒരു സ്ത്രീയെ തനിച്ച് നിര്‍ത്തി പോകുന്നത് ഉചിതമല്ലെന്നായിരുന്നു ഇവരുടെ തീരുമാനം. കണ്ടക്ടറും ഇവരുടെ ഭര്‍ത്താവ് എത്തുന്നത് വരെ ബസ് നിര്‍ത്തിയിട്ട് കാത്തിരുന്നു. കാര്യം അറിഞ്ഞ സഹയാത്രികരും ബസ് ജീവനക്കാര്‍ക്ക് പിന്തുണ നല്‍കി. ഈ സംഭവം റെജി തോമസ് തന്നെയാണ് ഫേസ്ബുക്കിലൂടെ ജനങ്ങളെ അറിയിച്ചത്.