സംസ്ഥാന തലസ്ഥാനത്ത് നിരവധി സിപിഐ പ്രവർത്തകരാണ് പാർട്ടി വിട്ട് സിപിഎമ്മിലേക്ക് ചേക്കേറുന്നത്. വെമ്പായം, തേക്കട എൽസിയിൽ നിന്ന് നൂറുകണക്കിന് പ്രവർത്തകർ സിപിഐ വിടാൻ തീരുമാനിച്ചു. കഴിഞ്ഞ ദിവസം ജില്ലാ സെക്രട്ടറിയുടെ സാനിധ്യത്തിൽ ചേർന്ന സിപിഐഎം മണ്ഡലം കമ്മിറ്റി യോഗത്തിൽ പുതിയ സെക്രട്ടേറിയറ്റിനെ തെരഞ്ഞെടുത്തതോടെയാണ് പ്രവർത്തകർ പാർട്ടി വിടുന്നത്. പുതിയതായി നാല് അംഗങ്ങളെ ഉൾപ്പെടുത്തിയാണ് മണ്ഡലം സെക്രട്ടേറിയറ്റ് പുനർസംഘടിപ്പിച്ചത്.

കരിപ്പൂർ എൽസിയിൽ നിന്ന് സാം , കരകുളം എൽസിയിൽ നിന്ന് രാജീവ്, പോത്തൻകോട് എൽസിയിൽ നിന്ന് അനിൽകുമാർ, വെമ്പായം എൽസിയിൽ നിന്ന് എസ്ആർ വിജയൻ എന്നിവരെയാണ് തെരഞ്ഞെടുത്തത്. 2011 മുതൽ സംഘടനാ രംഗത്ത് സജീവമല്ലാത്ത ആളെ ഉൾപ്പെടുത്തിയത്തിലുള്ള പ്രതിഷേധം രൂക്ഷമാണ്. കമ്മിറ്റിയിൽ യാതൊരു ചർച്ചയും കൂടാതെ തീരുമാനം അടിച്ചേൽപിക്കുകയായിരുന്നു എന്ന വിമർശനവും ഉയർന്നു. 2011 ലെ തെരഞ്ഞെടുപ്പിൽ പി. രാമചന്ദ്രൻ നായരെ പരാചയപെടുത്താൻ ശ്രമിച്ചതിന് ഇയാൾക്കെതിരെ നടപടി എടുത്തതായും വാർത്തകളുണ്ട്. സിപിഐക്കെതിരെ പലകുറി പ്രവർത്തനം നടത്തുകയും കോൺഗ്രസിന്റെ കൂട്ട് പിടിക്കുകയും ചെയ്ത ആളെ തിരികെ പാർട്ടിയിലെത്തിച്ചതാണ് പ്രവർത്തകർക്ക് ഇടയിൽ അതൃപ്തിക്ക് കാരണമായത്. ക്വൊറിയിൽ നിന്നും കോഴ വാങ്ങിയത് അടക്കമുള്ള വിവാദങ്ങൾ ഈ നേതാവിനെതിരെ നിലനിൽക്കുകയും ചെയ്യുന്നു. അതേസമയം ഇതൊരു പ്രാദേശിക വിഷയം മാത്രമല്ല എന്ന സൂചനയും ലഭിക്കുന്നു. അഴിമതി ആരോപണ വിധേയനായ നേതാവിനെ പുറത്താക്കിയില്ലെങ്കിൽ കൂടുതൽ പ്രവർത്തകർ പാർട്ടി വിടുമെന്ന സൂചനയും ലഭിച്ചു കഴിഞ്ഞു.