കേരള ക്രിക്കറ്റ് ടീമില്‍ പൊട്ടിത്തെറി; ക്യാപ്റ്റന്‍ സച്ചിന്‍ ബേബിക്കെതിരെ സഹതാരങ്ങള്‍ രംഗത്ത്; സച്ചിന്‍ ബേബി സ്വാര്‍ഥനാണെന്നും അഹങ്കാരിയാണെന്നും പെട്ടെന്ന് ക്ഷോഭിക്കുന്നവനാണെന്നും ഏകാധിപതിയെപ്പോലെയാണ് പെരുമാറുന്നതെന്നും കത്തില്‍
ചരിത്രത്തിലാദ്യമായി കേരള ടീമിനെ രഞ്ജി ട്രോഫി ക്വാര്‍ട്ടറിലെത്തിച്ച ക്യാപ്റ്റന്‍ സച്ചിന്‍ ബേബിക്കെതിരെ സഹതാരങ്ങള്‍ രംഗത്തെത്തിയിരിക്കുന്നു. പുതിയ സീസണ്‍ തുടങ്ങുന്നതിന് മുമ്പ് സച്ചിനെ മാറ്റി പുതിയ ക്യാപ്റ്റനെ തിരഞ്ഞെടുക്കണമെന്ന് ആവശ്യപ്പെട്ട് കേരള ക്രിക്കറ്റ് അസോസിയേഷന് 13 താരങ്ങള്‍ ഒപ്പിട്ട കത്ത് കൈമാറിക്കഴിഞ്ഞു. കത്ത് മലയാളി വാര്‍ത്തയ്ക്ക് ലഭിച്ചു
'പ്രതീക്ഷകളോടെ പുതിയ സീസണ്‍ നോക്കിക്കാണുന്ന അവസരത്തില്‍ ടീമെന്ന നിലയിലുള്ള ആശങ്കയാണിത്. സച്ചിന്‍ ബേബി സ്വാര്‍ഥനാണെന്നും അഹങ്കാരിയാണെന്നും പെട്ടെന്ന് ക്ഷോഭിക്കുന്നവനാണെന്നും ഏകാധിപതിയെപ്പോലെയാണ് പെരുമാറുന്നതെന്നും കത്തില്‍ പറയുന്നു. ടീം വിജയിച്ചാല്‍ എല്ലാ ക്രെഡിറ്റും ക്യാപ്റ്റനെടുക്കുന്നു. തോറ്റാല്‍ മറ്റു താരങ്ങളെ കുറ്റപ്പെടുത്തുന്നു. ക്യാപ്റ്റന്റെ ഈ സമീപനം താരങ്ങളെ വേദനിപ്പിക്കുന്നുണ്ട്. കത്തില്‍ ചൂണ്ടിക്കാട്ടുന്നു.
കഴിഞ്ഞ സീസണില്‍ കേരളത്തിന്റെ ചരിത്ര വിജയത്തില്‍ പങ്കാളികളായ ടീമംഗങ്ങളില്‍ ചിലര്‍ മറ്റു സംസ്ഥാനങ്ങള്‍ക്കായി കളിക്കാന്‍ പോയെന്നും കത്തില്‍ പറയുന്നു. ഇതിന് കാരണവും സച്ചിന്‍ ബേബി തന്നെയാണെന്നാ ആരോപണം. കെ.സി.എ സെക്രട്ടറിയ്ക്ക് നല്‍കിയ കത്തില്‍ അഭിഷേക് മോഹന്‍, കെ.സി അക്ഷയ്, കെ.എം ആസിഫ്, ഫാബിദ് ഫാറൂഖ്, വി.എ ജഗദീഷ്, മൊഹമ്മദ് അസ്ഹറുദ്ദീന്‍, എം.ഡി നിധീഷ്, വി.ജി റൈഫി, രോഹന്‍ പ്രേം, സന്ദീപ് വാര്യര്‍, സഞ്ജു സാംസണ്‍, സല്‍മാന്‍ നിസാര്‍, സിജോമോന്‍ എന്നിവരാണ് ഒപ്പുവെച്ചത്. അതേസമയം, കത്തില്‍ പേരുണ്ടെങ്കിലും പി.രാഹുലും, വിഷ്ണു വിനോദും ഒപ്പിട്ടിട്ടില്ല.
കെ.സി.എയ്ക്ക് അയച്ച കത്ത്
https://www.facebook.com/Malayalivartha
