സംസ്ഥാനത്തെ ഏറ്റവും വലിയ ജലവൈദ്യുതി പദ്ധതിയായ ഇടുക്കി അണക്കെട്ടില്‍നിന്ന് വെള്ളം തുറന്നുവിടേണ്ടി വരുമെന്ന് വൈദ്യുതി ബോര്‍ഡിന്റെ മുന്നറിയിപ്പ്. കനത്ത മഴയില്‍ ജലനിരപ്പ് 2391.12 അടിയില്‍ എത്തിയതോടെയാണ് ജാഗ്രത നിര്‍ദേശം. ഇനി 8.8 അടി ജലം കൂടി ഒഴുകിയെത്തിയാല്‍ ഇടുക്കി ഡാം തുറക്കും. 2403 അടിയാണ് പൂര്‍ണ സംഭരണശേഷി. എന്നാല്‍, 2400ല്‍ എത്തിയാല്‍ തുറക്കാനാണ് തീരുമാനം. ഇപ്പോഴത്തെ നീരൊഴുക്കിന്റെ തോത് കണക്കാക്കിയാല്‍ ഒരാഴ്ചകൊണ്ട് ഡാം തുറക്കേണ്ടിവരും. 2,400 അടിയെത്തിയാല്‍ അധികമായി ഒഴുകിയെത്തുന്ന ജലം ചെറുതോണി ഡാമിന്റെ ഷട്ടറുകള്‍ ഉയര്‍ത്തി ഒഴുക്കിക്കളയുമെന്ന് കെ.എസ്.ഇ.ബി സുരക്ഷ വിഭാഗം എക്‌സിക്യൂട്ടിവ് എന്‍ജിനീയറാണ് വ്യാഴാഴ്ച അറിയിപ്പ് നല്‍കിയത്. 

ഡാം ശേഷിയുടെ 85 ശതമാനമാണിത്. 2.12 അടി ജലമാണ് വ്യാഴാഴ്ച മാത്രം വര്‍ധിച്ചത്. രണ്ട് ദിവസത്തിനുള്ളില്‍ അണക്കെട്ടിന് സമീപം കണ്‍ട്രോള്‍ റൂം തുറക്കും. തുടര്‍ന്ന് അരമണിക്കൂര്‍ ഇടവിട്ട് പ്രത്യേകമായി ജലനിരപ്പ് രേഖപ്പെടുത്തും. തുടര്‍ച്ചയായി ജനങ്ങള്‍ക്ക് മുന്നറിയിപ്പ് നല്‍കുന്നതും ഈ ഘട്ടത്തിലാണ്. ചെറുതോണി ഡാമിന്റെ താഴ്ന്ന പ്രദേശങ്ങളിലുള്ളവരും ചെറുേതാണി, പെരിയാര്‍ നദികളുടെ ഇരുകരയിലുള്ളവരും ജാഗ്രത പുലര്‍ത്തണമെന്ന് എക്‌സിക്യൂട്ടിവ് എന്‍ജിനീയര്‍ വി.എസ്. ബാലു അറിയിച്ചു. ഡാം സുരക്ഷ വിഭാഗം ഉദ്യോഗസ്ഥര്‍ യോഗം ചേര്‍ന്ന് സ്ഥിതിഗതി വിലയിരുത്തിയതായും എക്‌സിക്യൂട്ടിവ് എന്‍ജിനീയര്‍ പറഞ്ഞു. ഇടുക്കിക്കൊപ്പം പമ്പ, കക്കി, ഇടമലയാര്‍ ഡാമുകളും തുറക്കേണ്ടി വരും. പൊന്മുടി, നേര്യമംഗലം, ലോവര്‍ പെരിയാര്‍, പെരിങ്ങല്‍ക്കുത്ത് ഡാമുകള്‍ ഇപ്പോള്‍ തുറന്നുവിട്ടിരിക്കുകയാണ്.