ഇടുക്കി അണക്കെട്ടിലെ ജലനിരപ്പ് 2393.70അടിയായി ഉയര്‍ന്നു. നീരൊഴുക്ക് ശക്തമായതിനെ തുടര്‍ന്ന് 2393.08 അടിയായിരുന്നു ഇന്നലെ ജലനിരപ്പ്. പദ്ധതി പ്രദേശത്ത് മഴ കുറഞ്ഞെങ്കിലും നീരൊഴുക്ക് ശക്തമാണ്. ഇത് തുടര്‍ന്നാല്‍ ബുധനാഴ്ചയോ വ്യാഴാഴ്ചയോ ഇടുക്കി പദ്ധതിയുടെ ഭാഗമായ ചെറുതോണി ഡാം തുറക്കും.

ഇടുക്കി ഡാമിലെ സംഭരണ ശേഷി 2403 ആണെങ്കിലും അതുവരെ 2400 അടി വരെ എത്താന്‍ കാത്തിരിക്കേണ്ട ആവശ്യമില്ലന്ന് മന്ത്രി എം.എം. മണി നിര്‍ദ്ദേശിച്ചു. ജലനിരപ്പ് 2395 ആകുമ്പോള്‍ അതീവ ജാഗ്രതാ നിര്‍ദ്ദേശം നല്‍കണം. ഡാം തുറക്കുന്നത് പകല്‍ സമയത്ത് ആയിരിക്കണമെന്നും മന്ത്രി നിര്‍ദ്ദേശിച്ചു.

ജനവാസമുള്ള പെരിയാര്‍ തീരത്ത് പൊലീസ്, ഫയര്‍ ഫോഴ്‌സ്, കെ.എസ്.ഇ.ബി, റവന്യൂ ഉദ്യോഗസ്ഥരുടെ നേതൃത്വത്തില്‍ ശക്തമായ സുരക്ഷ ഏര്‍പ്പെടുത്താനും മന്ത്രി നിര്‍ദ്ദേശിച്ചു. വാര്‍ത്താ വിനിമയ സംവിധാനങ്ങള്‍ ഒരുക്കണം. വേണ്ട സ്ഥലങ്ങളില്‍ വെളിച്ചം ഏര്‍പ്പെടുത്തണം.

മരങ്ങള്‍ കടപുഴകിയാല്‍ ഉടന്‍ മുറിച്ചു മാറ്റുന്നതിന് പ്രദേശവാസികളെയും ടീമില്‍ ചേര്‍ക്കണം. പെരിയാറിന്റെ താഴ്ന്ന ഭാഗത്ത് താമസിക്കുന്നവരെ മാറ്റിപ്പാര്‍പ്പിക്കുന്നതടക്കം നടപടിള്‍ സ്വീകരിക്കണം. ഇത്തരം കാര്യങ്ങളില്‍ ജില്ലാ ഭരണകൂടത്തിന് ആവശ്യത്തിന് പണം ചെലവഴിക്കാമെന്നും മന്ത്രി പറഞ്ഞു.

റവന്യൂ അഡിഷണല്‍ ചീഫ് സെക്രട്ടറി പി.എച്ച്. കുര്യന്‍ സുരക്ഷാ മുന്‍ കരുതലുകള്‍ ഏകോപിപ്പിക്കും. വിവിധ വകുപ്പുകളുടെ സഹകരണത്തോടെ 20 ടീമുകളായി തിരിഞ്ഞ് ഉദ്യോഗസ്ഥര്‍ പെരിയാറില്‍ 20 കിലോ മീറ്റര്‍ ദൂരത്തെ സ്ഥിതിഗതികള്‍ വിലയിരുത്തിത്തുടങ്ങി. റവന്യൂ ഇറിഗേഷന്‍, വൈദ്യുത വകുപ്പ് ഉദ്യോഗസ്ഥര്‍ അണക്കെട്ടിന്റെ താഴ്ഭാഗത്ത് നേരത്തേ തന്നെ സര്‍വേ നടത്തിയിരുന്നു.