പത്തനംതിട്ടയിൽ അമ്മയെ അസഭ്യം പറഞ്ഞത് ചോദ്യം ചെയ്ത മകനെ കുത്തിക്കൊന്നു
പത്തനംതിട്ട ഓമല്ലൂരില് പട്ടാപകല് യുവാവ് കുത്തേറ്റ് മരിച്ചു. ഐമാലി ലക്ഷംവീട് കോളനി കോയിപ്പുറത്ത് ഓമനക്കുട്ടന്റെ മകന് മഹേഷ് (26) ആണ് മരിച്ചത്. ഓമല്ലൂര്-പ്രക്കാനം റോഡില് ഊപ്പമണ് ജംഗ്ഷനിൽ ചൊവ്വാഴ്ച ഉച്ചയ്ക്ക് 12.40 ഓടെയാണ് സംഭവം.
ബൈക്കില് വന്ന സഹോദരങ്ങളായ സാംകുട്ടി, സാബു എന്നിവര് ചേര്ന്ന് മഹേഷിന്റെ ബൈക്ക് തടഞ്ഞു നിര്ത്തിയ ശേഷം കുത്തി വീഴ്ത്തുകയായിരുന്നു. പത്തനംതിട്ട ജനറല് ആശുപത്രിയില് എത്തിച്ചതിന് ശേഷമാണ് മഹേഷ് മരിച്ചത്. സാംകുട്ടിയാണ് കുത്തിയതെന്ന് ദൃക്സാക്ഷികള് പറഞ്ഞു. പ്രതികളില് ഒരാള് കസ്റ്റഡിയില് ഉള്ളതായും സൂചനയുണ്ട്.
പത്തനംതിട്ട ജില്ലാ സ്റ്റേഡിയത്തില് സെക്യൂരിറ്റി ജീവനക്കാരനാണ് മഹേഷ്. ഇയാളുടെ മാതാവിനെ കഴിഞ്ഞ ദിവസം സാംകുട്ടി അസഭ്യം വിളിച്ചിരുന്നു. ഇതിനെപ്പറ്റി മഹേഷും സാംകുട്ടിയും തമ്മില് ഇന്നലെ വൈകിട്ട് വാക്കേറ്റവും സംഘട്ടനവുമുണ്ടായി. മഹേഷ് ഇയാളെ മര്ദിക്കുകയും ചെയ്തു. മര്ദനമേറ്റതിന്റെ വിരോധം തീര്ക്കാനായിട്ടാണ് ഇയാള് സഹോദരനുമൊത്ത് വന്ന മഹേഷിനെ കുത്തി വീഴ്ത്തിയത്. മഹേഷിന്റെ മൃതദേഹം ജനറല് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്.
https://www.facebook.com/Malayalivartha
