ബി.ജെ.പി. സംസ്ഥാന അധ്യക്ഷനായി നിയമിതനായ പി.എസ്. ശ്രീധരന്‍ പിള്ളയുടെ കണക്കുകൂട്ടല്‍ കണ്ട് അത്ഭുതപ്പെട്ടിരിക്കുകയാണ് എല്ലാവരും. അത്രയ്ക്ക് സിംപിളായിട്ടാണ് അദ്ദേഹത്തിന്റെ കണക്കുകൂട്ടല്‍. 
കേരളത്തില്‍ എന്‍.ഡി.എയുടെ അടിത്തറ വിപുലീകരിക്കുമെന്നാണ് അദ്ദേഹം പറയുന്നത്. കോണ്‍ഗ്രസില്‍ ഒരു വിഭാഗം അസംതൃപ്തരാണ്. അവര്‍ അടര്‍ന്ന് പുതിയ പാര്‍ട്ടി രൂപീകരിച്ച് എന്‍.ഡി.എയില്‍ വരുമെന്നാണ് വിശ്വാസം. പല നേതാക്കളും സംസാരിച്ചിട്ടുണ്ട്. മറ്റ് പാര്‍ട്ടികളെ സ്വാഗതം ചെയ്യുകയാണ്. 

അസാദ്ധ്യം എന്ന വാക്ക് ഞങ്ങളുടെ നിഘണ്ടുവില്‍ ഇല്ല. സംസ്ഥാനത്ത് ഞങ്ങള്‍ക്ക് 21 ലക്ഷം അംഗങ്ങള്‍ ഉണ്ട്. ഈ അംഗങ്ങള്‍ ഒരു വോട്ട് വീതം കാന്‍വാസ് ചെയ്താല്‍ ഞങ്ങള്‍ക്ക് ഏഴു സീറ്റില്‍ ജയിക്കാന്‍ സാധിക്കുമെന്നും ശ്രീധരന്‍ പിള്ള പറയുന്നത്.

എന്‍ എസ് എസിനേയും എസ് എന്‍ ഡിപിയേയും ഒപ്പം നിര്‍ത്തുന്ന രാഷ്ട്രീയ നിലപാടാകും ബിജെപി സ്വീകരിക്കുക. പിപി മുകുന്ദന്‍ അടക്കമുള്ളവരെ തിരിച്ചു കൊണ്ടു വരാനും ശ്രമിക്കും. പഴയ നേതാക്കള്‍ക്ക് പാര്‍ട്ടിയില്‍ സ്ഥാനം നല്‍കുമോയെന്ന ഇന്നലെ കോഴിക്കോട് നടന്ന മുഖാമുഖത്തിലെ ചോദ്യത്തിന് അദ്ദേഹം വ്യക്തമായ ഉത്തരം നല്‍കിയില്ല. ശബരിമല പ്രശ്‌നത്തില്‍ എന്‍.എസ്.എസ് പ്രസിഡന്റ് സുകുമാരന്‍ നായരുടെ അഭിപ്രായം ഗൗരവത്തോടെ കാണണം. ചെങ്ങന്നൂര്‍ ഉപതിരഞ്ഞെടുപ്പ് വേളയില്‍ തനിക്കെതിരെയായിരുന്നുവെങ്കിലും വെള്ളാപ്പള്ളിയുടെ നിലപാട് ശരിയായിരുന്നു. പാര്‍ട്ടി ചില വാഗ്ദാനങ്ങള്‍ നല്‍കിയിരുന്നു. അത് പാലിക്കാന്‍ കഴിഞ്ഞില്ല. അതുകൊണ്ടാണ് അത്തരമൊരു നിലപാട് അദ്ദേഹത്തിന് എടുക്കേണ്ടി വന്നതെന്നും വിശദീകരിച്ചു.

ബിജെപിയെക്കുറിച്ച് ന്യൂനപക്ഷങ്ങളില്‍ ചിലര്‍ ഭയപ്പാട് സൃഷ്ടിച്ചിട്ടുണ്ട്. ഇത് മാറ്റിയെടുക്കും. മുമ്പും ഇത്തരം പ്രചാരണങ്ങള്‍ ഉണ്ടായിരുന്നു. ന്യൂനപക്ഷ വിരുദ്ധരാണ്, ഫാസിസ്റ്റാണ്, വര്‍ഗീയ ശക്തിയാണ് എന്നൊക്കെ. എന്നാല്‍ നൂറു ശതമാനം ന്യൂനപക്ഷങ്ങളുള്ള ലക്ഷദ്വീപിലും ന്യൂനപക്ഷ വിഭാഗം കൂടുതലുള്ള മൂവാറ്റുപുഴയിലും ബി.ജെ.പി മുന്നണിയാണ് വിജയിച്ചത്.