കാലവര്ഷക്കെടുതി കാരണം അധ്യയനദിനങ്ങള് മുടങ്ങുന്നതിനാല് ഈ വര്ഷത്തെ എസ്എസ്എല്സി പരീക്ഷ നീട്ടിയേക്കും
കാലവര്ഷക്കെടുതി കാരണം തുടര്ച്ചയായി അധ്യയന ദിനങ്ങള് മുടങ്ങുന്നതിനാല് ഈ വര്ഷത്തെ എസ്എസ്എല്സി പരീക്ഷ നീട്ടിയേക്കും. മാര്ച്ച് അവസാനവാരം ആരംഭിച്ച് ഏപ്രില് ആദ്യവാരം അവസാനിപ്പിക്കുന്ന വിധത്തില് ടൈംടേബിള് ക്രമീകരിക്കാനാണ് വിദ്യാഭ്യാസവകുപ്പ് ആലോചിക്കുന്നത്. ഇതു സംബന്ധിച്ച ശുപാര്ശ വ്യാഴാഴ്ച ചേരുന്ന ക്യുഐപി യോഗത്തില് മുന്നോട്ടുവയ്ക്കും.ഒരു അധ്യയനവര്ഷത്തില് കുറഞ്ഞത് 200 പ്രവൃത്തി ദിനം ഉറപ്പാക്കാന് പൊതുവിദ്യാഭ്യാസ ഡയറക്ടറുടെ നേതൃത്വത്തില് സ്കൂള് തുറക്കുന്നതിനുമുമ്പുതന്നെ ക്രമീകരണം ഏര്പ്പെടുത്തിയിരുന്നു.
എന്നാല്, നിപാ വൈറസ് ബാധയെത്തുടര്ന്ന് മലപ്പുറം, കോഴിക്കോട്, വയനാട് റവന്യൂ ജില്ലയിലും തലശേരി വിദ്യാഭ്യാസ ജില്ലയിലും സ്കൂള് തുറന്നത് രണ്ടാഴ്ചയോളം വൈകിയാണ്. അതിരൂക്ഷമായ കാലവര്ഷത്തില് എല്ലാ ജില്ലയിലും നിരവധി പ്രവൃത്തിദിനങ്ങള് നഷ്ടപ്പെട്ടു.
കുട്ടനാട്ടിലും കോട്ടയത്തും പല സ്കൂളുകളും ഇപ്പോഴും വെള്ളത്തിലാണ്. നിരവധി സ്കൂളുകള് ദുരിതാശ്വാസകേന്ദ്രങ്ങളായി മാറിയതിനാല് ക്ലാസുകള് നടക്കുന്നില്ല. ഈ സാഹചര്യത്തിലാണ് എസ്എസ്എല്സി പരീക്ഷ ഏപ്രില് ആദ്യവാരം തീര്ക്കുന്നവിധം പുനഃക്രമീകരിക്കാന് ആലോചിക്കുന്നത്.
കാലവര്ഷക്കെടുതി തുടരുന്നതിനാല് സ്കൂള് കലോത്സവം, കായികമേള എന്നിവയുടെ തീയതികളിലും മാറ്റം വേണോ എന്നതും ക്യുഐപി ചര്ച്ച ചെയ്യും.
https://www.facebook.com/Malayalivartha
