സംസ്ഥാനത്ത് സർക്കാർ നടത്തുന്നത് യുദ്ധ സമാനമായ ഒരുക്കങ്ങൾ ; മഴ ഇനിയും ഉണ്ടാകുമെന്ന സാധ്യത കണക്കിലെടുത്ത് കൂടുതൽ ജില്ലകളിൽ റെഡ് അലർട്ട്
സമാനതകളില്ലാത്ത പ്രതിസന്ധി ഘട്ടത്തിലൂടെയാണ് സംസ്ഥാനം കടന്ന് പോകുന്നത്. പ്രളയ കെടുതിയിൽ ജനങ്ങൾ ബുദ്ധിമുട്ടുകയാണ്. സംസ്ഥാനത്ത് അയ്യായിരം കോടിയുടെ സാമ്പത്തിക നഷ്ടം ഉണ്ടായതായി വിലയിരുത്തൽ. മഴ ഇനിയും ഉണ്ടാകുമെന്ന സാധ്യത കണക്കിലെടുത്ത് കൂടുതൽ ജില്ലകളിൽ റെഡ് അലർട്ട് പ്രഖ്യാപിച്ചിരിക്കുകയാണ്.
സംസ്ഥാനത്ത് യുദ്ധ സമാനമായ ഒരുക്കങ്ങൾ തന്നെയാണ് സർക്കാർ നടത്തുന്നത്. പതിനാലാം തീയതി വരെ മഴ തുടരും എന്ന് കാലാവസ്ഥാ നിരീക്ഷണ കേന്ദ്രത്തിന്റെ റിപ്പോർട്ടാണ് ഇതിന് കാരണം. വയനാട് ജില്ലയില് ആഗസ്റ്റ് 14 വരെയും ഇടുക്കി ജില്ലയില് ആഗസ്റ്റ് 13 വരെയും തീവ്രമായ മഴയുടെ സാഹചര്യത്തില് ആലപ്പുഴ, കോട്ടയം, എറണാകുളം, പാലക്കാട്, മലപ്പുറം, കോഴിക്കോട് ജില്ലകളില് ആഗസ്റ്റ് 11 വരെയും റെഡ് അലര്ട്ട് പ്രഖ്യാപിച്ചു. ഉരുള്പൊട്ടല് സാധ്യത ഉള്ളതിനാല് രാത്രി സമയത്ത് മലയോരമേഖലയിലേക്കുള്ള യാത്ര പരിമിതപെടുത്തുവാന് പൊതുജനങ്ങള് ശ്രദ്ധിക്കണം. ബീച്ചുകളില് കടലില് ഇറങ്ങാതിരിക്കുവാന് പൊതുജനങ്ങള് ശ്രദ്ധിക്കണം
പുഴകളിലും തോടുകളിലും ജല നിരപ്പ് ഉയരുവാന് സാധ്യതയുണ്ട്. പുഴകളിലും, ചാലുകളിലും, വെള്ളകെട്ടിലും ഇറങ്ങാതിരിക്കുവാന് പൊതുജനങ്ങള് ശ്രദ്ധിക്കണം. മലയോര മേഘലയിലെ റോഡുകള്ക്ക് കുറുകെ ഉള്ള ചെറിയ ചാലുകളിലൂടെ മലവെള്ള പാച്ചിലും ഉരുള്പൊട്ടലും ഉണ്ടാകുവാന് സാധ്യതയുണ്ട് എന്നതിനാല് ഇത്തരം ചാലുകളുടെ അരികില് വാഹനനങ്ങള് നിര്ത്താതിരിക്കുവാന് പൊതുജനങ്ങള് ശ്രദ്ധിക്കണം. മരങ്ങള്ക്ക് താഴെ വാഹനം പാര്ക്ക് ചെയ്യാതിരിക്കുവാന് പൊതുജനങ്ങള് ശ്രദ്ധിക്കണം.
ഉരുള്പൊട്ടല് സാധ്യത ഉള്ള മലയോര മേഖലയിലെ ജനങ്ങള് ജാഗരൂകരായിരിക്കണമെന്ന് അഭ്യര്ത്ഥിക്കുന്നു. ഉദ്യോഗസ്ഥര് അവശ്യപ്പെട്ടാല് മാറി താമസിക്കുവാന് അമാന്തം കാണിക്കരുതെന്ന് പൊതുജനങ്ങളോട് അഭ്യര്ത്ഥിക്കുന്നു. പരിശീലനം സിദ്ധിച്ച സന്നദ്ധ പ്രവര്ത്തകര് അല്ലാതെയുള്ളവര് വെള്ളപ്പൊക്കം, ഉരുള്പൊട്ടല് എന്നിവ ബാധിച്ച സ്ഥലങ്ങളിലേക്കുള്ള സന്ദര്ശനം ഒഴിവാക്കണം. കുട്ടികള് പുഴകളിലും തോടുകളിലും വെള്ളകെട്ടിലും ഇറങ്ങി കളിക്കുന്നില്ലെന്ന് മാതാപിതാക്കള് ഉറപ്പ് വരുത്തണം.
https://www.facebook.com/Malayalivartha
